Wonembewa na Yohani 5:1-47
5 Vimwevi pavidamala, kwenze chikondwerero cha Ayuda ndipo Yesu adanyamuka nkuyenda ku Yerusalemu.
2 Ku Yerusalemu pa Nsuwo wa Nkhosa penze damu yomwe mu Chiheberi ichemerewa kuti Betizata. M’mbali mwa khonde mwiyo mwenze makhonde 5 yomwe yanavipilala.
3 Mumo mumbagona wanthu azinji wodwala, wosaona, wopunduka komasoti wozizira vidzo.
4 * ——
5 Penze pomwe mwamuna munango yemwe wenze dwale kwa magole 38.
6 Padawona munthu moyu ali gone komasoti padadziwa kuti wakhala ankudwala kwa nthawe itali, Yesu adamubvunza kuti: “Ko unkufuna kupola?”
7 Munthu wodwala muyo adamudawira kuti: “Palibe munthu yemwe anganivuwike mu damu mwiyi ya madzi yakawinduka, ndipo nikafuna kungenamo munango anipitirira nkukangena.”
8 Yesu adamuuza kuti: “Nyamuka, nyamula machira yako aya nkuyamba kufamba.”
9 Nthawe mwiyoletu munthu ule adapola ndipo adanyamula machira yake yale nkuyamba kufamba.
Mweyi yenze ntsiku ya Satade.
10 Pamwapo Ayuda adayamba kuuza munthu yemwe adachirisiwa ule kuti: “Lero ni Satade, ni vosabvumizika kuti unyamule machira yako aya.”
11 Iye adawadawira kuti: “Yemwe wanipolesa uyo waniuza kuti: “Nyamula machira yako aya nkuyamba kufamba.’”
12 Iwo adamubvunza kuti: “Ni mbani wakuuza kuti: ‘Nyamula machira uyambe kufamba’?”
13 Koma munthu muyo alibe kudziwa kuti wenze mbani, ndawa Yesu wenze adangena pa gulu ya wanthu womwe enze pa malo mwayo.
14 Patsogolo pake Yesu adagumana na munthu ule mukachisi nkumuuza kuti: “Ona wachira manje. Ayi kuti ukachimwe pomwe kuti chinthu chirichose choipa kuposha matenda, ayi kuti chidzakuchitikire.”
15 Munthu ule adachoka nkukauza Ayuda wale kuti Yesu ndiye wanipolesa.
16 Ayuda mwawo padabva vimwevi adayamba kumushupisa Yesu, ndawa ambachita vinthu vimwevi pa ntsiku ya Satade.
17 Koma iye adawauza kuti: “Ababa wangu ankupitiriza kuphata basa mpakana manjeuno, inembo ninkupitiriza kuphata basa.”
18 Ndawa ya vimwevi Ayuda mwawo adayamba kufagafaga njira yakuti amuphere, kuingizira pa kuleka kubvera lamulo ya Satade, anganena pomwe kuti Mulungu ni Ababa wake, kudziyesa wolingana na Mulungu.
19 Pamwapo Yesu pakudawira adawauza kuti: “Shuwa ninkukuuzani, Mwana angachitelini chirichose chomwe wandoganiza yekha, koma chomwe waona Ababa wake ankuchita. Ndawa virivose vomwe Ababa mwawo achita, Mwana achitambo vimwevo molingana na momwe Ababa achitira.
20 Ababa mwawo akonda Mwana wake ndipo amuwonesa vose vomwe iwo achita. Iwo adzamuwonese basa zikuluzikulu kuposha zimwezi kuti imwepo mudabwe.
21 Molingana na Ababa womwe amukisa wakufa nkuwapasa moyo, nayembo Mwana apereka moyo kwa womwe afuna kuti awapase.
22 Ababa aweruzalini munthu aliyese, koma wapereka udindo wose woweruza kwa Mwana,
23 kuti wose alemekeze Mwana ninge momwe alemekezera Ababa. Aliyese yemwe alemekezalini Mwana alemekezalini Ababa yemwe adamutuma.
24 Shuwa ninkukuuzani, aliyese yemwe wabva mawu yangu nkukhulupirira Mulungu yemwe adanituma, adzagumane moyo wosapera ndipo adzadzongewelini koma wachoka ku impfa nkuyenda ku moyo.
25 Shuwa ninkukuuzani, nthawe inkubwera, ndipo ni mwaino, pomwe wakufa adzabve mawu ya Mwana wa Mulungu ndipo omwe ankubvera adzakhale na moyo.
26 Molingana na Ababa womwe anamphanvu zopereka moyo, abvumasoti Mwana kuti akhale na mphanvu zopereka moyo.
27 Amupasa soti mphanvu zoweruza, ndawa iye ni Mwana wa munthu.
28 Ayi kudabwa navo vimwevi, ndawa nthawe inkubwera yomwe wose omwe ali m’manda yachikumbuso adzabve mawu yake
29 ndipo adzabule. Omwe ambachita vabwino adzamuke kuti atambire moyo ndipo omwe ambachita voipa adzamuke kuti aweruziwe.
30 Inepano ningachitelini chirichose chomwe nandoganiza nekha. Niweruza mobverana na vomwe nabva, ndipo chiweruzo changu ni cholungama ndawa nichitalini vomwe inepano ninkufuna koma vofuna va yemwe adanituma.
31 Peno ninkudzichitira nekha umboni ndiye kuti umboni wangu muyo ni chaiwolini.
32 Alipo munango yemwe ankuchitira umboni va ine, ndipo ninkudziwa kuti umboni omwe ankunichitira uyo ni chaiwo.
33 Imwepo mudatumiza wanthu kwa Yohani, ndipo iye wachitira umboni chonadi.
34 Koma inepano nidawikizalini umboni wochokera kwa wanthu, koma ninkunena vimwevi kuti imwepo mupulumuke.
35 Munthu muyu wenze kandyero wogaka komasoti wogwerewera, ndipo kwa kanthawe kang’onong’ono imwepo mumbafunisisa kukondwa maninge ndawa ya kugaka kwake.
36 Koma ine nili na umboni woposha wa Yohani, ndawa basa zomwe Ababa wangu adanipasa kuti nizikwanirise, basa zomwe nikuzichita izi, zikuchitira umboni kuti Ababa adanitumadi.
37 Komasoti Ababa omwe adanituma anichitira umboni. Imwepo mukalibe kubvako mawu yake nthawe iriyose panango kuwona thupi yake.
38 Mawu yake pomwe yalibe kukhazikika mwa imwepo, ndawa mulibe kukhulupirira yemwe Ababa adamutuma.
39 Imwepo mufagafaga m’Malemba ndawa muganiza kuti mudzagumane moyo wosapera pakuphatisa basa Malemba mwayo ndipo Malemba mwayo ndiyo yachitira umboni va ine.
40 Koma mufunalini kubwera kwa ine kuti mudzagumane moyo.
41 Ninkufunalini ulemerero wochokera kwa wanthu,
42 koma shuwa ninkudziwa bwino kuti m’mitima yanu mulibe chikondi cha Mulungu.
43 Ine nabwera mu dzina ya Ababa wangu koma mulibe kunitambira. Koma munango adakabwera mu dzina yake, sembe mwamutambira muyo.
44 Mungakhulupirire tani pomwe munkutambira ulemerero kuchokera kwa wanthu anzanu, koma osayesayesa kuti mugumane ulemerero wochokera kwa Mulungu chaiye?
45 Ayi kuganiza kuti ine nikakunenereni kwa Ababa. Alipo yemwe akunenerani, yemwe ni Mose yemwe imwepo mumuthemba.
46 Ndipo sembe mukhulupirira Mose, mudakakhulupirirambo inepano, ndawa iye adanemba va ine.
47 Koma peno mulibe kukhulupirira pa vomwe adanemba, mungakhulupirire tani mawu yangu?”
Mawu ya m’nyantsi
^ Onani vakumapeto A3.
