Wonembewa na Yohani 7:1-52
7 Mwevi pavidamala, Yesu adapitiriza kuphata basa yake mu Galileya. Iye alibe kufuna kuchita vimwevi mu Yudeya ndawa Ayuda ambafunisisa kumupha.
2 Koma Chikondwerero cha Misasa cha Ayuda chenze chidafendera.
3 Manje azibale wake adamuuza kuti: “Muyende ku Yudeya kuti wopfunzira wanu akawonembo vomwe munkuchita.
4 Ndawa palibe munthu yemwe achita vinthu vachintsintsi koma akufuna kudziwika kwa wanthu. Peno imwepo muchita vinthu vimwevi, mudziwonesere pachena ku dziko iyi.”
5 Azibale wake mwawo angamukhulupiriralini.
6 Yesu adawauza kuti: “Nthawe yangu ikalibe yafika, koma kwa imwepo, nthawe iriyose ikhala yofunika.
7 Dziko iribe chifukwa chokuzonderani, koma izonda inepano, ndawa nichitira umboni kuti basa zake ni zoipa.
8 Imwepo nyamukani muyende kuchikondwerero kumuko. Inepano niyendekolini manjeuno, ndawa nthawe yangu ikalibe kufika.”
9 Padawauza vimwevi, iye adakhala ku Galileya.
10 Koma azibale wake mwawo padanyamuka nkuyenda kuchikondwerero kumuko, iyembo adanyamuka. Alibe kuyenda modziwonesera koma mwachintsintsi.
11 Manje Ayuda adayamba kumufagafaga ku chikondwerero kumuko. Iwo anganena kuti: “Ko munthu ule ali kuponi?”
12 Ndipo wanthu ambanena vinthu vizinji va iye mu gulu yose mwiyo. Anango ambanena kuti: “Mwaule ni munthu wabwino.” Koma anango ambanena kuti: “Neye ni munthulini wabwino mwaule. Iye ankusokeresa wanthu azinji.”
13 Koma penze palibe yemwe ambayankhula mowonekera va iye ndawa ambagopa Ayuda.
14 Chikondwerero mwicho pachidafika pakatikati, Yesu adangena mu kachisi ndipo adayamba kupfunzisa.
15 Ayuda mwawo adadabwa nkubvunza kuti: “Pakuti munthu moyu alibe kuyenda kushikola,* ko Malemba mwaya adayadziwa tani?”
16 Yesu adawadawira kuti: “Vomwe ine nipfunzisa, ni vangulini koma ni va yemwe adanituma.
17 Peno munthu akufuna kuchita vomwe Mulungu afuna, adzadziwe kuti peno vomwe nipfunzisa vichokera kwa Mulungu, panango ni va mumsolo mwangu.
18 Woyankhula va mumsolo mwake adzifagira yekha ulemerero. Koma wofagira ulemerero iye yemwe adamutuma, muyu ni chaiye ndipo iye achita vinthu mwachilungamo.
19 Mose adakupasani Chilamulo, ntenolini? Koma palibe m’bodzi wa imwepo yemwe abvera chilamulo icho. Manje ndawa chani mukufuna kunipha?”
20 Gulu ya wanthu mwiyo idadawira kuti: “Iwepo unachiwanda. Akufuna kukupha ni mbani?”
21 Yesu pakudawira adawauza kuti: “Nandochita chinthu chibodzi ndipo mose imwe mukudabwa.
22 Ndawa ya vimwevi Mose adakupasani mdulidwe.* Sikuti mdulidwe muyo ni wochokera kwa Mose neye, koma ni wochokera kwa azibereki wakale, ndipo muchita mdulidwe pa ntsiku ya satade.
23 Peno munthu achita mdulidwe pa ntsiku ya satade pakufuna kuleka kuphonyesa Chilamulo cha Mose, ko mukunikalipira maninge ndawa napolesa munthu pantsiku ya satade?
24 Lekani kumbaweruza pakuwona mawonekedwe yakunja, koma mumbaweruze mwachilungamo.”
25 Manje wanthu anango wokhala mu Yerusalemu adayamba kunena kuti: “Ko munthu yemwe akufagiwa kuti aphewe ni muyulini?
26 Koma onani! Ni uyulini akuyankhula mosadzibisa ndipo akumuchitalini chinthu! Ko wolamulira mwawa atsimikiza manje kuti moyu ni Khrisitu?
27 Isepano tinkudziwa komwe munthu moyu ankuchokera. Koma Khrisitu muyo akadzabwera, palibe yemwe adzadziwe komwe wachokera.”
28 Manje ankupfunzisa mu kachisi mumo Yesu adakuwa kuti: “Imwepo mukunidziwa komasoti munkudziwa komwe ninkuchokera. Inepano niribe kubwera mwa kufuna kwangu, koma yemwe adanituma alipo ndipo imwepo mukumudziwalini.
29 Ine nikumudziwa ndawa ndine ntumi wake. Iye ndiye adanituma.”
30 Pamwapo iwo adayamba kufagafaga njira yomuphatira, koma palibe yemwe adamuphata ndawa nthawe yake yenze ikanati kufika.
31 Koma wanthu azinji pa gulu mwiyo adamukhulupirira ndipo ambanena kuti: “Ko Khrisitu akadzabwera, adzachite vizindikiro vizinji kuposha vomwe munthu moyu wachita?”
32 Afalisi adabva gulu ya wanthu mwiyo inkuwerewesana vimwevi pa nkhani ya Yesu ndipo wantsembe akulu komasoti Afalisi adatuma magwarda kuti yakamuphate.*
33 Patsogolo pake Yesu adanena kuti: “Nipitirize kukhala namwe kanthawe kang’ono nikanati kuyenda kwa iye yemwe adanituma.
34 Mudzanifagefage koma mudzanigumanelini, ndipo kwati nidzayende imwepo mudzakwaniselini kufikako.”
35 Pamwapo Ayuda mwawo adayamba kubvunzana kuti: “Ko munthu muyu akufuna kuyenda kuponi, komwe isepano tingakwaniselini kumugumana? Panango akufuna kuyenda kwa Ayuda omwe adamwazikana pakati pa Agiriki nkukapfunzisa Agiriki mwawo?
36 Ko akutanthauza chani pomwe akunena kuti: “Mudzanifagefage koma mudzanigumanelini, ndipo komwe ine nidzayende mudzakwaniselini kufikako’?”
37 Pa ntsiku yomalizira, yomwe yenze ntsiku ikulu ya chikondwerero mwicho, Yesu adaimirira nkukuwa kuti: “Peno munango akubva nyota, abwere kwa inepano adzamwe madzi.
38 Mobverana na vomwe lemba inena, aliyese wokhulupirira ine, nkati mwake chaimo mudzabule tukamadzi twa madzi yamoyo.’”
39 Pamwapa anganena va mzimu womwe wose omwe adamukhulupirira enze adasala pang’ono kutambira. Pa nthawe mweyi wanthu enze akanati kutambira mzimu ndawa Yesu wenze akanati kutambira ulemerero wake.
40 Anango mu gulu mwiyo omwe adabva mawu mwaya, adayamba kunena kuti: “Shuwa moyu ni mneneri.”
41 Anango ambanena kuti: “Khrisitu ule ni moyu.” Koma anango ambanena kuti: “Ko Khrisitu angachokere ku Galileya?
42 Ko si pale lemba inena kuti Khrisitu adzachokere mwa wana wa Davide komasoti ku Betelehemu, muyi womwe Davide angakhala?”
43 Pamwapo gulu ya wanthu mwiyo ingabvesesanalini pankhani yonena va iye.
44 Anango pa wanthu mwawo ambafuna kumuphata,* koma palibe olo m’bodzi yemwe adakwanisa.
45 Patsogolo pake magwarda yale yadabwerera kwa antsembe akulu na Afalisi ndipo iwo adayabvunza kuti: “Ndawa chani mulibe kubwera naye?”
46 Magwarda mwayo yadadawira kuti: “Palibe munthu yemwe adayankhulako kale ninge iye kuchokera kalekale.”
47 Pamwapo Afalisi mwawo adati: “Ko namwembo mwasokeresewa?
48 Ko alipo omwe ankumukhulupirira pakati pa wolamulira wathu panango Afalisi?
49 Koma gulu yose ya wanthu wosadziwa chilamulo mwawa ni yotembererewa.”
50 Nikodemo yemwe m’mambuyo umu wenze adayenda kwa Yesu, komasoti wenze m’bodzi wa Afalisi, adawauza kuti:
51 “Chilamulo chathu chiweruzalini munthu akanati kufotokoza maganizo yake pakuyamba na kudziwa vomwe akuchita, ntenolini?”
52 Pakudawira iwo adamuuza kuti: “Ko iwembo ndiwe wochokera ku Galileya? Fagafaga ndipo ugumanelini pomwe padanembewa kuti mu Galileya mudzachoke mneneri.”*
Mawu ya m’nyantsi
^ Yamwaya ni mashikola yomwe yangapfunzisa atsogoleri wa vipembedzo.
^ Mdulidwe ni kugwata kakhanda ka kuntsonga kwa chidzo chobalira cha amuna. Udziwika pomwe kuti circuncisão.
^ Panango kuti: “yakamumange.”
^ Panango kuti: “kumumanga.”
^ Mipukutu yakalekale na yothembeka yalibe vesi 53 na msolo 8 vesi 1 mpaka 11.
