Wonembewa na Yohani 8:12-59
8 12 Pamwapo Yesu adayankhula nawo pomwe kuti: “Ine ndine kugwerewera kwa dziko. Aliyese wonitewera inepano adzafambelini mumdima, koma adzakhale na kugwerewera kwa moyo.”
13 Pamwapo Afalisi adauza Yesu kuti: Iwepo udzichitira wekha umboni koma umboni wako moyu ni chaiwolini.”
14 Yesu pakudawira adati: “Podiya kuti nidzichitira nekha umboni, umboni wangu ni chaiwo, ndawa ninkudziwa komwe nidachokera na komwe ninkuyenda. Koma imwepo munkudziwalini komwe nidachokera komasoti komwe ninkuyenda.
15 Imwepo muweruza potengera momwe munthu ankuwonekera. Inepano niweruzalini munthu aliyese.
16 Koma nikafuna kuweruza, niweruza mwachilungamo, ndawa niweruzalini nekha koma inepano pabodzi na Ababa womwe adanituma tiweruzira pabodzi.
17 Ndipo mu Chilamulo chanu chimwechi adanembamo kuti umboni wa wanthu awiri ni wokwana.’
18 Inepano panekha nidzichitira umboni ndipo Ababa womwe adanituma anichitirambo umboni.”
19 Pamwapo iwo adamubvunza kuti: “Ababa wako ali kuponi?” Yesu adadawira kuti: “Imwepo munkunidziwalini inepano panango Ababa wangu. Sembe munidziwa inepano mudakawadziwa pomwe Ababa wangu.”
20 Yesu adanena mawu mwaya ali pa malo yosungira vopereka pomwe angapfunzisa mu kachisi. Koma palibe yemwe adamuphata ndawa nthawe yake yenze ikalibe kukwana basi.
21 Pamwapo iye adawauza pomwe kuti: “Inepano nikuchoka ndipo mudzanifagefage, koma mudzafe mudakali wochimwa. Komwe inepano ninkuyenda, imwepo mungakwaniselini kuyendako.”
22 Manje Ayuda mwawo adayamba kunena kuti: “Ko ankufuna kudzipha? Manje ndawa chani ankunena kuti: ‘Komwe inepano ninkuyenda imwepo mungakwaniselini kuyendako?’”
23 Iye adapitiriza kuwauza kuti: “Imwepo ndimwe wochokera pasi pano koma ine ndine wochokera kudzulu. Imwepo ndimwe wochokera mudziko ino, koma inepano ndinelini wochokera mudziko ino.
24 Ndipomwapa nakuuzani kuti: Imwepo mudzafe mudakali wochimwa. Ndawa peno munkukhulupiriralini kuti yemwe munkumudikhirira ule ndinepano, mudzafe mudakali wochimwa.”
25 Pamwapo iwo adayamba kunena kuti: “Ko ndiwe mbani?” Yesu adadawira kuti: “Ko ninkutairanyi nthawe yangu kuyankhula na imwepo?
26 Ninavinthu vizinji vakuti ninene pa nkhani ya imwepo nkukuweruzani. Ndipo yemwe adanituma inepano anena chaivo mwakuti vomwe nidabva kwa iye ni vomwe ninkuviyankhula mudziko iyi.”
27 Iwo alibe kuzindikira kuti ambayankhula nawo va Ababa.
28 Patsogolo pake Yesu adati: “Mukadzamukwiza Mwana wa munthu, pamwapo mudzadziwe kuti yemwe mungamudikhirira ule ndine komasoti nilibe kuchita chilichose chochokera mumsolo mwangu. Koma vomwe niyankhula vikhala vobverana ndendende na vomwe Ababa adanipfunzisa.
29 Ndipo yemwe adanituma ali nane. Iye alibe kunisiya nekha, ndawa nichita vinthu vomwe vimukondweresa nthawe zose.”
30 Pambayankhula vimwevi, wanthu azinji adayamba kumukhulupirira.
31 Pamwapo Yesu adapitiriza kuuza Ayuda womwe angamukhulupirira wale kuti: “Mukapitiriza kusunga mawu yangu, ndiye kuti ndimwedi wopfunzira wangu.
32 Mudzadziwe chonadi ndipo chonadi chidzakumasuleni.”
33 Iwo adamudawira kuti: ‘Isepano ndise wana wa Abulahamu, ndipo tikalibe kukhalako akapolo wa munthu. Manje iwepo unkulewa kuti: ‘Mudzamasuliwe’?”
34 Yesu adawadawira kuti: “Shuwa ninkukuuzani, aliyese yemwe ankuchita chimo ni kapolo wa chimo.
35 Komasoti kapolo akhalalini mu nyumba ya abwana wake mpakana kalekale, koma mwana ndiye yemwe akhalamo mpakana kalekale.
36 Ndipomwapa, peno Mwana wakumasulani, mudzakhaledi womasuka.
37 Ninkudziwa kuti ndimwe mbadwa za Abulahamu, koma munkufuna kunipha ndawa munkubverana navolini vomwe ninkupfunzisa.
38 Ine niyankhula vomwe nidaviwona penenze na Ababa wangu, koma imwepo muchita vomwe mwabva kwa ababa wanu.”
39 Iwo adamudawira kuti: “Ababa wathu ni Abulahamu.” Yesu adawauza kuti: “Mudakakhala wana wa Abulahamu, sembe munkuchita basa za Abulahamu.
40 Koma manje munkufuna kunipha, munthu yemwe nakuuzani chonadi chomwe nidachibva kwa Mulungu. Abulahamu alibe kuchita vimwevi.
41 Imwepo munkuchita basa za ababa wanu.” Iwo adanena kuti: “Isepano tilibe kubadwa ndawa ya uhule,* tili na Ababa m’bodzi, Mulungu.”
42 Yesu adawauza kuti: “Adakati Mulungu ni Baba wanu, sembe mukunikonda, ndawa inepano nidachokera kwa Mulungu ndipo nili pano. Nilibe kubwera mwa kufuna kwangu, koma Iye ndiye adanituma.
43 Ndawa chani munkubvesalini vomwe ninkunena? Ndawa yakuti munkufunalini kubvesera mawu yangu.
44 Imwepo ndimwe wochokera kwa ababa wanu Ndyerekezi ndipo munkufuna kuchita vomwe ababa wanu afuna. Iye ni wakupha wanthu kundochokera pakuyamba ndipo alibe kupitiriza kukhala mu chonadi, ndawa mwa iye mulibe chonadi. Akambanena bodza, andowonesa momwe iye alili, ndawa iye ni wabodza komasoti ni baba wa bodza.
45 Koma pakuti ine nakuuzani vazedi, munikhulupiriralini.
46 Nimbani pa imwepo yemwe angapereke umboni woonesa kuti nachita chimo? Peno ninena vazedi, ndawa chani munikhulupiriralini?
47 Wochokera kwa Mulungu abvesera mawu ya Mulungu. Ndipomwapa imwepo mubveseralini ndawa ndimwelini wochokera kwa Mulungu.”
48 Ayuda mwawo adamudawira kuti: “Ko tikunama tikambati: ‘Ndiwe wa ku Samariya ndipo unachiwanda’?”
49 Yesu adadawira kuti: “Inepano nilibe chiwanda, koma ninkulemekeza Ababa wangu ndipo imwepo munkuninyoza.
50 Sikuti ninkudzifunira nekha ulemerero. Mulungu ni yemwe ankufuna kuti nilemekezewe ndipo iye ni woweruza.
51 Shuwa ninkukuuzani, peno munthu ankusunga mawu yangu adzawonelini impfa olo pang’ono.”
52 Ayuda mwawo adanena kuti: “Apa manje tadziwa kuti unachiwanda. Abulahamu adamwalira, nchibodzibodzimbo aneneri. Koma iwepo unkunena kuti: ‘Peno munthu akusunga mawu yangu adzalawelini impfa olo pang’ono.’
53 Ko iwepo ndiwe nkulu kuposha ababa wathu Abulahamu omwe adamwalira? Aneneri nawombo adamwalira. Manje iwepo ukudziwona ninge mbani?”
54 Yesu adadawira kuti: “Peno ninkudzilemekeza nekha, ndiye kuti ulemerero wangu ulibe na basa. Ababa wangu ndiwo womwe anilemekeza, womwe imwepo munkunena kuti ni Mulungu wanu.
55 Vinkuwonekeratu kuti imwepo mumudziwalini koma inepano ninkumudziwa. Peno ninganene kuti ninkumudziwalini ningakhale wabodza ninge imwepo. Koma shuwa ninkumudziwa ndipo ninkutewedza mawu yake.
56 Ababa wanu Abulahamu ambakondwa maninge ndawa ambadikhira kuwona ntsiku yangu mwakuti adaiwonadi ndipo adakondwa.”
57 Patsogolo pake Ayuda mwawo adati: “Ukanati kukwanisa olo magole 50, manje ukunena kuti udamuwona Abulahamu?”
58 Yesu adawauza kuti: “Shuwa ninkukuzani, Abulahamu akanati kukhalako inepano nenzeko kale.”
59 Pamwapo iwo adalokota minyala kuti amubome nayo, koma Yesu adabishala nkubula mu kachisi mumo.
Mawu ya m’nyantsi
^ Onani matanthauzo ya mawu yanango.
