Wonembewa na Yohani 9:1-41
9 Akufamba adawona munthu yemwe adabadwa na bvuto yosawona.
2 Wopfunzira wake adamubvunza kuti: “Mpfunzisi,* ko adachimwa ni mbani kuti munthu muyu abadwe na bvuto mwiyi yosawona? Ndiye panango azibereki wake?”
3 Yesu adadawira kuti: “Munthu moyu panango azibereki wake, wose alibe kuchimwa. Koma vimwevi vidachitika kuti basa za Mulungu ziwonekere pakuphatisa basa iye.
4 Tifunika kuphata basa za Mulungu yemwe adanituma kudakali masikati. Usiku ukubwera pomwe munthu angakwaniselini kuphata basa.
5 Pomwe ine nili mudziko, ndine kugwerewera kwa dziko mweyi.”
6 Padanena vimwevi, adalavulira mata pasi nkukanya matope na mata mwayo, patsogolo pake adapakasira matope mwayo m’maso mwa munthu muyo.
7 Pamwapo adamuuza kuti: “Yenda ukasambe mu dziwe ya Siloamu” (dzina yomwe kutsumbudzulira kwake ni “Wotumiziwa”). Pamwapo adayenda kukasamba ndipo adabwerako akuwona.
8 Manje wanthu omwe angakhala naye pafupi na wanthu anango omwe ambamuwona akukumbirakumbira adayamba kunena kuti: “Ko uyu ni ulelini yemwe ambakhala pasi kumbandokhalira kukumbira vinthu?”
9 Anango ambanena kuti: “Ni moyu.” Anangombo ambanena kuti: “Neye, andolingana.” Koma munichiro uyo ambawauza kuti: “Inde, ndinepano.”
10 Pamwapo adamubvunza kuti: “Manje maso yako aya yafunguka tani?”
11 Iye adadawira kuti: “Munthu munango dzina yake Yesu wakanya matope nkupakasira m’maso mwangu umu. Patsogolo pake waniuza kuti: ‘Yenda ku Siloamu ukasambe.’ Manje nayendadi kukasamba ndipo nayamba kuona.”
12 Padateno, wanthu mwawo adamubvunza kuti: “Ali kuponi munthu muyo?” Iye adanena kuti: “Ninkudziwalini.”
13 Iwo adatenga munthu ule yemwe pakuyamba ambawonalini nkuyenda naye kwa Afalisi.
14 Ntsiku yomwe Yesu adakanya matope nkufungula maso ya munthu muyo yenze Satade.
15 Panthawe mwiyo Afalisi adayamba kubvunza munthu ule momwe wayambira kuwona. Iye adawafotokozera kuti: “Wapakasira matope m’maso mwangu, manje panayenda kukasamba, basi nayamba kuwona.”
16 Manje anango pa Afalisi mwawo adayamba kunena kuti: “Munthu moyu ni wochokeralini kwa Mulungu, ndawa asungalini Satade.” Anango ambanena kuti: “Ko munthu wochimwa angachite tani vizindikiro ninge vimwevi?” Pamwapo wanthu mwawo ambabvesesanalini.”
17 Afalisi mwawo adabvunza pomwe munthu yemwe wenze wosawona ule kuti: “Manje iwe ungatiuze chani va munthu moyu, pakuti wakufungula maso?” Munthu muyo adati: “Ni mneneri.”
18 Koma Ayuda mwawo alibe kukhulupirira kuti munthu muyu wenzedi wosawona ndipo wayamba kuwona, mpakana adachemeresa azibereki wake wa munthu muyo.
19 Iwo adabvunza azibereki mwawo kuti: “Ko uyu ni mwana wanu yemwe mukuti adabadwa wosawona? Manje vakwanisika tani kuti ayambe kuwona?”
20 Azibereki wake mwawo adadawira kuti: “Tinkudziwa kuti moyu ni mwana wathu komasoti kuti adabadwa wosawona.
21 Koma tinkudziwalini kuti vakwanisika tani kuti manjeuno ayambe kuwona, ndipo tinkumudziwalini yemwe wamufungula maso. Mubvunzeni munikachiro uyu. Ni nkulu muyu, afotokoze yekha.”
22 Azibereki wake mwawo adanena vimwevi ndawa ambagopa atsogoleri wachipembedzo wa Ayuda. Ndawa iwo enze adapangana kale kuti akandogumanika munthu yemwe angadawikize kuti Yesu ni Khrisitu, ambamuchose mu sunagoge.
23 Ndipomwapa azibereki wake mwawo adanena kuti: “Ni nkulu. Mubvunzeni munikachiro uyu.”
24 Pamwapo adachemera pomwe munthu yemwe wenze wosawona ule kachiwiri nkumuuza kuti: “Lemekeza Mulungu, ise tikudziwa kuti munthu moyu ni wochimwa.”
25 Iye adadawira kuti: “Vakuti iye ni wochimwa, ine nikudziwalini. Chibodzi chokha chomwe nikudziwa ni chakuti, pakuyamba nenze wosawona koma manje ninkuwona.”
26 Manje iwo adamubvunza kuti: “Iye wakuchita chani? Wafungula tani maso yako?”
27 Iye adawadawira kuti: “Nakuuzani kale, koma imwepo mumbabveseralini. Manje ndawa chani mukufuna kubva pomwe? Panango imwepo mukufunambo kukhala wopfunzira wake?”
28 Padanena vimwevi, iwo adamunyoza kuti: “Iwepo ndiwe wopfunzira wa munthu mwaule, koma isepano ndise wopfunzira wa Mose.
29 Tinkudziwa kuti Mulungu adayankhula na Mose, koma va munthu moyu, tinkudziwalini kuti akuchokera kuponi.”
30 Munthu muyo adawadawira kuti: “Manje ni vodabwisa shuwa! Mukudziwalini komwe wachokera, koma wanifungula maso?
31 Tikudziwa kuti Mulungu abveseralini wochimwa, koma peno munthu agopa Mulungu ndipo achita chifuniro chake, munthu muyo amubvesera.
32 Kundoyambira kalekale, tikanati tabvako kuti munthu munango wafungula maso ya munthu yemwe adabadwa wosawona.
33 Adakati munthu moyu ni wochokeralini kwa Mulungu, adakakwanisalini kuchita chirichose.”
34 Pakudawira iwo adamuuza kuti: “Wobadwira mu uchimo wokhawokha iwe. Manje ko ukufuna utipfunzise?” Pavidateno adamuchosa mu sunagoge!
35 Yesu adabva kuti munthu ule wachosewa mu sunagoge. Ndipo padagumana naye adamubvunza kuti: “Ko unkukhulupirira Mwana wa munthu?”
36 Munthu muyo adadawira kuti: “Ko Mwana wa munthu muyo ni mbani? Niuzeni kuti nimukhulupirire.”
37 Yesu adamuuza kuti: “Wamuwona kale ndipo ni moyu yemwe ankuyankhula nawe pampano.”
38 Iye adanena kuti: “Nakukhulupirirani Ambuya.” Ndipo adamugwadira.
39 Manje Yesu adanena kuti: “Nidabwera mudziko ino kudzapereka chiweruzo chakuti, wosawona ayambe kuwona ndipo womwe akuwona akhale wosawona.”
40 Afalisi omwe enze naye adabva vimwevi, ndipo adabvunza Yesu kuti: “Ko isembo ndise wosawona?”
41 Yesu adawauza kuti: “Mudakakhala kuti ndimwe wosawona, mudakakhalalini na chimo. Koma pakuti mukunena kuti: ‘Tikuwona,’ chimo yanu idzakhululukiriwelini.”
Mawu ya m’nyantsi
^ Panango kuti: “Rabi.”
