Kalata ya Yuda 1:1-25
1 Ine Yuda, kapolo wa Yesu Khrisitu komasoti m’bale wake wa Yakobo. Ninkunembera wochemerewa omwe Mulungu, yemwe ni Ababa wathu, awakonda komasoti kuwateteza kuti akhale obverana na Yesu Khrisitu.
2 Mulungu aingizire chifundo, ntendere na chikondi chake kwa imwepo.
3 Abale wapamoyo, nimbafunisisa kukunemberani va chipulumuso chomwe tose isepano tinacho. Koma olo nteno, naona kuti viribwino kuti ninembe vokulimbikisani kumenya nkhondo yamphanvu yachikhulupiriro chomwe chidaperekewa kabodzi kokha kwa ochena.
4 Nachita teno ndawa yakuti anango angena mobisa pagulu yanu. Malemba yadawoneseratu kalekale kuti wanthu mwawa adzaweruziwe. Wanthu mwawa ni osagopa Mulungu ndipo atenga kukoma ntima kukulu kwa Mulungu wathu kukhala chifukwa chochitira khalidwe yopasa manyazi. Komasoti awonesa kuti ni wosakhulupirika kwa Ambuya wathu m’bodzi yekha yemwe adatigula, Yesu Khrisitu.
5 Olo kuti mukudziwa kale vose vimwevi, ninkufuna kukukumbusani kuti Yahova* adapulumusa wanthu wake powabulisa mudziko ya Iguputo, patsogolo pake adadzonga omwe enze alibe chikhulupiriro.
6 Komasoti angelo omwe adasiya utumiki womwe Mulungu adawapasa kudzulu na malo yomwe ambadikhira kukhala, Mulungu adawamanga na matcheni yomwe yangagwatikelini nkuwasunga mu mdima ukulu kuti adzawaweruze pantsiku ikulu.
7 Molingana na vimwevi, wanthu wa muthaundi ya Sodomu na Gomora komasoti mathaundi yanango ambachita chigololo* chonyantsa maninge munjira yomwe ni yachibadwalini. Wanthu mwawa adapasiwa chilango chodzongewa chosapera ndipo ni chitsanzo chotichenjeza.
8 Olo kuti viriteno, wanthu omwe angena mobisa nawombo akonda volota, aipisa mathupi yawo komasoti ya anango, anyoza ulamuliro ndipo anenera voipa wanthu omwe awapasa ulamuliro.
9 Koma Mikayeli, nkulu wa angelo, pomwe adasemphana maganizo na Ndyerekezi ndipo adagegedzana naye va chitanda cha Mose, alibe kumuweruza komasoti kumunyoza, koma adanena kuti: “Yahova* akuweruze.”
10 Koma wanthu mwawa ayankhula monyoza vinthu vose vomwe akuvibvesalini. Ndipo vomwe avibvesa mwachibadwa, molingana na nyama zomwe ziganizalini, apitiriza kudziyipisa navo.
11 Anatsoka ndawa atewera njira ya Kaini, asalula njira yophonyeka ya Balamu kuti atambire malipiro ndipo adzongeka pakuyankhula mopanduka ninge Kora.
12 Wanthu mwawa akambadya namwe pa maphwando yomwe muchita kuti muwonesane chikondi, akhala ninge minyala yakuluyakulu yobisika m’madzi. Ali pomwe ninge anyakabusa omwe adzidyesa wokha mosowa mantha, mitambo yalibe madzi yotengekatengeka na mphepo, komasoti ninge miti yalibe vipaso koma nthawe yake yobereka yasala pang’ono kumala, yoferatu komasoti yakuti yazuliwa.
13 Ali pomwe ninge mabimbi yogopsya ya munyanja yochosa phovu ya vinthu vowachitisa manyazi, komasoti nyenyezi zofamba mosowa dongosolo, ndipo Mulungu awaikha mu mdima ukulu womwe adzakhalemo mpakana kalekale.
14 Olo pomwe Inoki, wa m’badwo wa 7 kuchokera kwa Adamu, adaneneratu vakutsogolo va iwo mwawa pomwe adati: “Onani! Yahova* adabwera na angelo wake mamidyau na mamidyau
15 kudzaweruza wanthu wose, na kudzagemula kuti wose wosagopa Mulungu agumanika na mulandu ndawa ya vinthu vonyoza Mulungu vomwe adachita, komasoti ndawa ya vinthu vose voipa maninge vomwe ochimwa osagopa Mulungu mwawa ambamunenera.”
16 Wanthu mwawa akonda kung’ung’uzika, kudandaula va moyo wawo, andokonda vomwe ntima wawo wafunisisa komasoti ayankhula modzikwiza. Atamanda pomwe wanthu na cholinga chakuti agumane phindu.
17 Koma imwepo abale wapamoyo, kumbukirani mawu yomwe atumi wa Ambuya wathu Yesu Khrisitu adaneneratu kalekale.
18 Pale ambakuuzani kuti: “Mu ntsiku zomalizira kudzakhale wonyoza, omwe ambandodzachita vinthu voipa vomwe ntima wawo wafunisisa.”
19 Wanthu mwawa achitisa kuti wanthu aleke kubverana, achita vinthu ninge vinyama ndipo atsogolerewalini na mzimu wa Mulungu.
20 Koma imwepo abale wapamoyo, mumbalimbise chikhulupiriro chanu chochena maninge komasoti mumbapemphera mobverana na mzimu uchena,
21 kuti mupitirize kuchita vinthu vomwe vingakuchitiseni kuti Mulungu ambakukondeni, pomwe munkudikhira chifundo cha Ambuya wathu Yesu Khrisitu chomwe chidzachitise kuti mugumane moyo wosapera.
22 Komasoti pitirizani kuchitira chifundo wanthu omwe akaikira vomwe tikhulupirira.
23 Apulumuseni pakuwachosa mwakankulumize pamoto. Pitirizani pomwe kuchitira chifundo wanthu anango, koma mumbasamale. Pakuwachitira chifundo mwicho, mumbazonde vovala vawo vomwe avipsyipiza na makhalidwe yoipa.
24 Mulungu wathu wa ulemerero angakwanise kukutetezani kuti muleke kugwa komasoti kukuthandizani kuti muyime pamaso pake mulibe chophonya munkukondwa maninge.
25 Iye yekha ni Mulungu komasoti mpulumusi wathu mwa Yesu Khrisitu Ambuya wathu, ndipo ni woyenerera ulemerero, ufumu, mphanvu na ulamuliro kuchokera kalekale kufikira manjeuno komasoti mpakana kalekale. Ame.
Mawu ya m’nyantsi
^ Onani vakumapeto A5.
^ Onani matanthauzo ya mawu yanango.
^ Onani vakumapeto A5.
^ Onani vakumapeto A5.
