Malemba Yopatulika yadauziriwa na Mulungu ndipo yadanembewa mu Chiheberi, mu Chiaramu na Chigiriki. Kuti wanthu wa “makhaindi yose” aphindule na Mawu ya Mulungu, mpofunika kutsumbudzulira Baibolo muviyankhulo vizinji. (Mateyu 24:14) Mabukhu yokwana 27 kuchokera Mateyu mpakana Chivumbuluso yachemerewa kuti “Malemba ya Chigiriki ya Chikhrisitu” ndawa yakuti yambe na yambe yadanembewa na Akhrisitu wa mu nthawe zoyambirira.

Baibolo ya dziko inyowani ya Malemba Yachigiriki idabulisiwa koyambirira mu Chingelezi mu 1950. Idatsumbudzuliriwa pakuphatisa basa mipukutu ya Westcott na Hort, yomwe yankubverana na mipukutu ya kalekale ya Chigiriki. Potsumbudzulira Baibolo mweyi, adayesesa kutewedzera viri mʼmipukutu ya kalekale ya Chigiriki. Cholinga chathu ni kutsumbudzulira chaivo kuti vikhale vobveka bwino na vosashupa kuwerenga. Nkhani yakumapeto yakuti “Mpfundo zomwe adatewedza pakudzumbudzulira Baibolo” na yakuti “Vomwe vidachitika kuti Baibolo isungike mpakana manjeuno,” zinkufotokoza vinthu vinango vomwe vidatewedzewa pakutsumbudzulira Baibolo mweyi.

Dzina ya Mulungu yakuti Yahova inkugumanika maulendo yokwana 237 mu Baibolo ino. Baibolo mwaino inkutsindika kufunika kochenesa dzina ya Mulungu ndipo inkuthandiza wose kuti akambachemera pa dzina mweyi adzapulumuke. Dzina yakuti Yahova idabwezeresewa mʼmalo yose yomwe imbagumanika mʼMalemba ya kalekale. (Mateyu 6:9; Aroma 10:13) Nkhani ya kumapeto yakuti “Dzina ya Mulungu mMalemba ya Chigiriki” inkufotokoza vifukwa vinango vomwe vidachitisa kuti dzina ya Yahova ibwezeresewe.

Dzina yakuti Baibolo ya dziko inyowani, yachokera pa polomisi ya Mulungu yakuti adzatibweresere dziko inyowani yomwe idzaphindulise wanthu wose. (2 Petulo 3:13) Omwe adatsumbudzulira Baibolo mweyi akonda maninge Mulungu yemwe ni Munichiro wa Baibolo. Vimwevi ndivo vidawachitisa kuti achite khama nkutsumbudzulira Baibolo yotewedza na yosashupa kubva. Pemphero yathu ni yakuti Baibolo mwaino ithandize wanthu wose omwe ankufunisisa ‘kudziwa chonadi.ʼ—1 Timoteyo 2:4.