Shamwali ni ‘munthu ule wobverana na anzake ndawa yolemekezana panango kukondana.’ Mwakulinganiza, Davide padapha Goliyati, Yonatani adayamba kubvana naye maninge. (1Sa 18:1) Aliyese angakomedzewa na makhalidwe ya munzake. Ndipomwapa tingalewe kuti wanthu ayamba kubvana peno adziwana bwinobwino. Vifuna khama kuti ukwanise kumudziwa bwino munthu. Koma pa intaneti kundotinya chabe pang’ono ugumaniratu ‘azishamwali’ azinji. Pakuti pa intaneti wanthu achakhala osamala maninge, ni vosashupa kubisa khalidwe yawo chaiyo. Ndipomwapa tingafunike kusankhula bwino wanthu omwe tinkufuna kuti akhale azishamwali wathu. Peno munthu yemwe wakukumbirani ushamwali munkumudziwalini bwinobwino, nkuphonyalini kulamba. Ayi kundobvuma ndawa yogopa kuti angakalipe. Pakufuna kupewa mabvuto ninge mwaya, anango adasaina kundolekeratu kuphatisa basa intaneti. Koma peno imwepo mudasankhula kuti mumbaphatise basa intaneti, ko muchadekana kukumbukira chani?

NYANG’ANIRANI VIDIYO YAKUTI MUMBAKHALE OSAMALA MUKAMBACHEZA NA ANZANU PA INTANETI, NDIPO IKAPERA DAWIRANI MIBVUNZO AYA:

• Ko muchadekana kuganizira chani mukanati kutumiza mensaje panango foto?

• Ndawa chani muchadekana kukhala osamala mukambasankhula azishamwali pa intaneti?

• Ndawa chani muchadekana kudziikhira malire pankhani ya nthawe yomwe muchakhala mukucheza pa intaneti?—Aef 5:15, 16