1-7 Abril
SALIMO 23-25
Nyimbo Na. 4 na pemphero | Mawu yoyamba (1 min.)
1. “Yahova ni nyakabusa wangu”
(10 min.)
Yahova atitsogolera (Sl 23:1-3; w11-CN 5/1 tsa. 31 ndi. 3)
Yahova atiteteza (Sl 23:4; w11-CN 5/1 tsa. 31 ndi. 4)
Yahova atidyesa (Sl 23:5; w11-CN 5/1 tsa. 31 ndi. 5)
Ninge momwe nyakabusa wachikondi asamalilira nkhosa zake, Yahova asamalirambo atumiki wake.
DZIBVUNZENI KUTI: ‘Ko Yahova achanisamalira tani inepano panekha?’
2. Mpfundo zothandiza
(10 min.)
Sl 23:3—Ko ‘tunjira twachilungamo’ ni chani, ndipo ni chani chomwe chingatithandize kuti osati tibulemo? (w11-CN 2/15 tsa. 24 ndi. 1-3)
Ko mwapfunzira chani pa kuwerenga Baibolo kwa sondo ino?
3. Kuwerenga Baibolo
(4 min.) Sl 23:1–24:10 (th pfunziro 5)
4. Kuyambisa macheza
(3 min.) ULALIKI WA MWAMWAYI. Muwerengereni lemba yolimbikisa ya m’Baibolo munthu yemwe walewa kuti ni wokwinyirira ndawa ya kudzongeka kwa chilengedwe. (lmd msolo 2 mpfundo 5)
5. Kupitiriza
(4 min.) NYUMBA NA NYUMBA. Muwoneseni momwe pfunziro ya Baibolo ichachitikira munthu yemwe wabvuma kabulosha kakuti Kondwani na moyo mpaka kalekale! (lmd msolo 9 mpfundo 3)
6. Kupfunzisa wanthu
(5 min.) lff msolo 14 mpfundo 4 (lmd pfunziro 11 mpfundo 3)
Nyimbo Na. 54
7. Isepano tilamba mawu ya munthu yemwe timudziwalini
(15 min.) Nkhani yokambirana.
Nkhosa zidziwa mawu ya nyakabusa wake ndipo zimulondola. Koma zikabva mawu ya munthu yemwe zimudziwalini, izo zithawa. (Yoh 10:5) Molingana na vimwevi, ise tichabva mawu ya Yahova na Yesu omwe ni anyakabusa wathu wachikondi na wothembeka. (Sl 23:1; Yoh 10:11) Koma isepano tilamba kubvesera mawu ya munthu yemwe timudziwalini yomwe yachafokesa chikhulupiriro chathu yomwe ni ‘mawu ya bodza.’—2Pe 2:1, 3.
Genesis msolo 3 ifotokoza va nthawe yoyamba pomwe mawu yabodza yadabveka pano padziko yapasi. Satana adanamiza Hava ndipo alibe kudzidziwikisa momwe iye aliri koma adadziwonesa ninge wenze shamwali wake, iye adatsutsa mawu ya Yahova na cholinga chake ndipo Hava adamubvera. Vimwevi vidabweresa bvuto ikulu maninge kwa iye na wanthu wose.
Ntsiku zino Satana achayesesa kutichitisa kuti timbakayikire Yahova na Gulu yake. Iye achita vimwevi pa kuphatisa basa nkhani zoipa na mabodza. Tikabva mawu yachilendo, tichadekanalini kuyabvesera! Ni ngozi ikulu podiya kundoyabvesera pang’ono. Kumbukirani kuti Satana adakwanisa kunamiza Hava na mawu yang’onong’ono basi. (Ge 3:1, 4, 5) Manje tingachite tani peno munthu yemwe atikonda ankufuna kutiwonesa nkhani za bodza zokhudza gulu ya Yahova?
Nyang’anirani VIDIYO yakuti: Lambani “mawu ya munthu wosadziwa.” Patsogolo pake bvunzani obvera kuti:
Ko mwapfunzira chani momwe Jade adachitira vinthu na amayi wake?
