Okondewa abale na alongo:

Kukonda kwathu Mulungu na wanthu kutichitisa ‘kuyenda . . . kukapfunzisa wanthu wa makhaindi yose na kuwabatiza.’ (Mat. 28:19, 20; Maliko 12:28-31) Chikondi chaicho ni champhanvu ndipo chingafike pantima wale omwe ‘anamaganizo yabwino kuti akagumane moyo wosapera.’—Mac. 13:48.

Kalekale timbaikha mumsolo chitsanzo cha ulaliki ndipo timbasiya chofalisa chilichose. Koma manjeuno tikufuna kuyesesa kuti tikulise buya yathu yoyambisira macheza. Tinkufuna kuti timbawonese chikondi kwa anango mwa kumbacheza nawo nkhani zomwe zingawapase chidwi. Vimwevi vikuthandauza kuti timbakhale wachikatikati na wosamala pakudziwa nkhawa na vomwe vingapase chidwi munthu aliyese. Ko kabolosha mwaka katithandize tani kuchita vimwevi?

Kabulosha mwaka kanamisolo 12 yomwe yakuwonesa makhalidwe yofunika kuti timbawonese chikondi na kupfunzisa wanthu. Msolo uliwose unkuchokera mu chitsanzo cha m’Baibolo chomwe Yesu panango Akhrisitu woyambirira adawonesa mu umboni. Chakulinga chathu manje, sikuti ni kusunga mumsolo chitsanzo cha ulaliki, koma ni kuwona njira zomwe tingawonesere chikondi kwa wanthu. Makhalidwe yose niyofunika pomwe tinkulalikira. Ndipomwapa tikambirane momwe makhalidwe yanango yaliri yofunika maninge pomwe tayambisa macheza, pomwe tinkuchita maulendo yobwereza olo pomwe tinkuchitisa pfunziro ya Baibolo.

Pomwe mukupfunzira msolo uliwose, ganizirani momwe mungawoneserere khalidwe iliyose pomwe mukucheza na wanthu. Yesesani kukulisa chikondi chanu kwa Yahova na kwa wanthu. Chikondi chimwechi, chidzakuthandizeni kukwanirisa chakulinga chanu chomwe ni kupfunzisa wanthu.

Tinkutembeja mwayi wophata namwe basa pabodzi. (Zef. 3:9) Yahova apitirize kukudalisani pomwe munkupitiriza kukonda wanthu na kuwapfunzisa!