KUYAMBISA MACHEZA
MSOLO 4
Kudzichepesa
Mpfundo: ‘Modzichepesa mumbawone anango kukhala okuposhani.’—Afil. 2:3.
Vomwe Paulo adachita
1. Nyang’anirani VIDIYO, panango werengani Machitidwe 26:2, 3. Patsogolo pake ganizirani mibvunzo aya:
-
Ko Paulo adawonesa tani kudzichepesa m’mawu yake kwa Mpfumu Agiripa?
-
Ko Paulo adawonesa tani kuti ambaikhira nzeru kwa Yahova na Malemba m’malo mwakundoganizira va iye yekha?—Onani Machitidwe 26:22.
Ko tinkupfunzira chani kwa Paulo
2. Ntontholo wathu ukhala wokondwesa tikambayankhula modzichepesa na mwaulemu.
Tewedzerani Paulo
3. Mbayankhulani mwaulemu. Mbapewani kumbachita vinthu vowonesa ninge imwepo mudziwa vinthu vose kuposha anzanu. Mbayankhulani nawo mwaulemu.
4. Athandizeni kudziwa kuti vomwe munkuwapfunzisa vinkuchokera m’Baibolo. M’mawu ya Mulungu munampfundo zomwe zifika wanthu pantima. Ndipomwapa tikambaziphatisa basa pakupfunzira na wanthu tiwathandiza kuti chikhulupiriro chawo chilimbe yomwe ndiyo maziko yabwino.
5. Mbakhalani wofatsa. Ayi kumbangingimira pa mpfundo yanu. Pewani kumbagegedzana nawo. Wonesani kudzichepesa mwa kukhala chete na kudziwa nthawe yamungachokepo. (Miy. 17:14; Tito 3:2) Kudawira mopfatsa kungathandize kuti mudzakhale na macheza yabwino nthawe inango.
