MSOLO 15
Ko Yesu ni mbani?
Yesu ni munthu wodziwika maninge mu mbiri yose ya wanthu. Koma podiya vili tene, wanthu azinji achadziwalini vizinji pankhani ya iye ndipo anamaganizo yosiyanasiyana kuti ko Yesu ni mbani makamaka. Koma ko Baibolo ichanena chani va iye?
1. Ko Yesu ni mbani?
Yesu ni mngelo wamphanvu maninge yemwe adakhalako kudzulu. Yahova akanati kusika chilichose, iye adayamba kulenga Yesu. Ndipomwapa iye achachemerewa kuti ‘woyamba kubadwa wa muchilengedwe chose.’ (Akolose 1:15) Baibolo ichanena pomwe kuti Yesu ni ‘mwana wobadwa yekha’ wa Mulungu, vimwevi vinkutanthauza kuti iye adachita kulengeweratu na Yahova. (Yohane 3:16) Yesu adaphata basa pabodzi na Ababa wake Yahova. Iye adathandiza Ababa wake kusika vinthu vinango vose. (Lewengani Miyambo 8:30.) Chikondi chomwe chilipo pakati pa Yesu na Yahova ni cholimba maninge. Yesu ni wokhulupirika ndipo ni woyankhulira wa Mulungu, panango kuti ndiye angayankhula ntontholo na malangizo yochokera kwa Mulungu. Ndipomwapa Baibolo ichachemera kuti Yesu ni ‘Mawu.’—Yohane 1:14.
2. Ndawa chani Yesu adabwera padziko yapasi?
Kudakali magole 2000 kumbuyo, Yahova adachita vodabwisa. Iye adaphatisa basa mzimu wake wakuchena kuti achose moyo wa Yesu kudzulu nkumuikha m’mimba mwa nkazi munango dzina yake Mariya. Mwanjira mweyi, Yesu adabadwa ninge munthu. (Lewengani Luka 1:34, 35.) Yahova adatumiza Yesu padziko yapasi kuti adzakhale Mesiya wopolomisiwa panango kuti Khrisitu kuti adzapulumuse wanthu. a Yesu adakwanilisa maulosi yose yolewa va Mesiya, vimwevi vidathandiza wanthu kudziwa kuti Yesu wenze ‘Khrisitu Mwana wa Mulungu wamoyo.’—Mateyu 16:16.
3. Ko Yesu ali kuponi manjeuno?
Pomwe Yesu adafa adamukisiwa ninge munthu ndipo adabwerera kudzulu. Kumoku kudzulu, ‘Mulungu adamukwiza nkumuikha pa malo yapadzulu.’ (Afilipi 2:9) Manjeuno, Yesu ni mngelo wamphanvu maninge, koma Yahova ndiye anamphanvu zizinji kuposha za Yesu.
PFUNZIRANI VIZINJI
Dziwani kuti Yesu ni mbani na ndawa yake vili vodekana maninge kupfunzira va iye.
4. Yesu ni Mulungulini wa mphanvu zose
Baibolo ichapfunzisa kuti Yesu ni mngelo wamphanvu maninge kudzulu, podiya vili tene, iye achabvera Mulungu wake na Ababa wake Yahova. Ndawa chani tinkulewa tene? Wonesani VIDIYO kuti muwone momwe Baibolo ichasiyanisira pakati pa Yesu na Mulungu wa mphanvu zose.
Malemba yali m’nyantsi yachatithandiza kudziwa kuti Yahova na Yesu ni wosiyana. Lewengani iliyose ya malemba mwaya ndipo kambiranani mibvunzo yomwe yali m’nyantsi.
Lewengani Luka 1:30-32.
-
Ko mawu ya mngelo yankuwonesa tani kuti Yesu na Yahova Mulungu yemwe ‘ni wapadzulu maninge’ ni wosiyana?
Lewengani Mateyu 3:16, 17.
-
Pa ubatizo wa Yesu, ko mawu yochokera kudzulu yadalewa chani?
-
Ko imwepo munkuwona kuti yenze mawu yambani?
Lewengani Yohane 14:28.
-
Ko pakati pa baba na mwana, mbani nkulu pa banja?
-
Yesu adalewa kuti Yahova ni Ababa, ko vimwevi vinkutipfunzisa chani?
Lewengani Yohane 12:49.
-
Ko Yesu achadziwona kuti iye na Ababa wake ni wolingana? Ko imwepo munkuwona kuti ni wolingana?
5. Mawumboni yowonesa kuti Yesu wenzedi Mesiya
Baibolo ichafotokoza maulosi yosiyanasiyana pofuna kuthandiza wanthu kuti adziwe kuti ko Mesiya wenze mbani panango kuti ule yemwe Mulungu adamusalula kuti apulumuse wanthu. Wonesani VIDIYO kuti muwone maulosi yanango yomwe Yesu adayakwanilisa pomwe iye adabwera pano padziko.
Lewengani maulosi ya m’Baibolo aya ndipo patsogolo pake kambiranani mibvunzo aya:
Lewengani Mika 5:2 kuti muwone komwe Mesiya adakabadwira. b
-
Ko ulosi moyu udakwanirisika? —Mateyu 2:1.
Lewengani Salimo 34:20 na Zekariya 12:10 kuti muwone momwe impfa ya Mesiya idakakhalira.
-
Ko maulosi mwaya yadakwanirisika? —Yohane 19:33-37.
-
Wanthu anango achalewa kuti Yesu adachitambo vinthu vinango kuti maulosi mwaya yakwanirisike. Ko munkuwona kuti vimwevi nivobveka?
-
Ko vimwevi vichakutsimikizirani chani pakulewa va Yesu?
6. Kupfunzira va Yesu nkodekana maninge kwa isepano
Baibolo ichafotokoza kuti nivodekana maninge kupfunzira va Yesu na vomwe Mulungu achada kuti iye achite. Lewengani Yohane 14:6 na 17:3, ndipo patsogolo pake kambiranani mbvunzo uyu:
-
Ndawa chani nivodekana kupfunzira va Yesu?
Yesu adafungula njira yakuti tikhale azishamwali wa Mulungu. Iye adapfunzisa chonadi cholewa va Yahova ndipo kudzera mwa Yesu tingadzagumane moyo wosapera
WANTHU ANANGO ACHATI: ‘Mboni za Yahova zichakhulupiriralini Yesu.’
-
Ko imwepo mungawadawire tani?
CHIGWATO
Yesu ni mngelo wamphanvu. Iye ni Mwana wa Mulungu ndipo ni Mesiya.
Kubwerezera
-
Ndawa chani Yesu achachemerewa kuti ni ‘woyamba kubadwa wa muchilengedwe chose’?
-
Ko Yesu adachita chani akanati wabwera padziko yapasi?
-
Tinkudziwa tani kuti Yesu ni Mesiya?
KUTI MUDZIWE VIZINJI
Onani vinthu vinango vomwe vinkutsimikizira kuti Yesu wenzedi Mesiya.
‘Ko maulosi ya m’Baibolo yachatsimikizira kuti Yesu wenzedi Mesiya?’ (Nkhani ya pa intaneti)
Onani m’Baibolo kuti Yesu ni mwana wa Mulungu munjira iponi.
‘Ndawa chani Yesu achachemerewa kuti Mwana wa Mulungu?’ (Nkhani ya pa intaneti)
Onani kuti ndawa chani utatu ni chipfunzisolini cha m’Baibolo.
Lewengani momwe moyo wa nkazi munango udachinjira kundochokera pomwe iye adadziwa chaivo pa vomwe Baibolo ichanena pankhani ya Yesu.
‘Nkazi wachiyuda adafagafaga pomwe mwakhama pa vomwe iye angakhulupirira’ (Galamukani! ya Maio 2013)
a Mu msolo 26 na 27 tidzawone ndawa yake wanthu angadikana kupulumusiwa na momwe Yesu adatipulumusira.
b Onani Mawu yakumapeto 2 kuti muwone ulosi womwe udafotokozeratu kuti nilini pomwe Yesu adzabwere pano padziko.
