MSOLO 16
Ko Yesu adachita chani pewenze padziko yapasi?
Wanthu azinji akambaganizira va Yesu achaganizira za kamwana kang’onong’ono, mneneri wanzeru panango munthu yemwe wandosala pang’ono kufa. Koma tikambapfunzira va moyo wake pewenze pano padziko, tichawona kuti iye adachita vinthu vizinji maninge. Kuposha vimwevi, mu msolo uno tiwone vinthu vinango vodekana maninge vomwe Yesu adachita na momwe vingachinjire moyo wanu.
1. Ko basa yodekana maninge ya Yesu yenze iponi?
Basa yodekana maninge ya Yesu yenze ‘kulalikira ntontholo wabwino wa Ufumu wa Mulungu.’ (Lewengani Luka 4:43.) Ntontholo wabwino womwe Yesu angalalikira ungafotokoza va ufumu panango kuti boma ya Mulungu yomwe idzamalise mabvuto yose ya wanthu. a Yesu adalalikira ntontholo moyu wopereka chidikhira kwa wanthu kwa magole yatatu na hafu.—Mateyu 9:35.
2. Ndawa chani Yesu ambachita vodabwisa?
Baibolo ichafotokoza va ‘basa za mphanvu, mwa vodabwisa koma soti mwavizindikiro vomwe Mulungu adachita kudzera mwa [Yesu].’ (Machitidwe 2:22) Na mphanvu zomwe Mulungu adamupasa, Yesu adakwanisa kulamulira mphanvu za muchilengedwe, kudyesa wanthu mamidyau yazinji, kuchiza wodwala mpakana kumukisa wakufa. (Mateyu 8:23-27; 14:15-21; Maliko 6:56; Luka 7:11-17) Vodabwisa vomwe Yesu ambachita vimbawoneseratu kuti iye adatumiziwa na Mulungu. Vodabwisa vimwevi vidawoneseratu pomwe kuti Yahova angakwanise kumaliziratu mabvuto yose.
3. Ko tingapfunzire chani na vochitika pa moyo wa Yesu?
Yesu nthawe zose angabvera Yahova. (Lewengani Yohane 8:29.) Iye adachita vimwevi kwa moyo wake wose, podiya panthawe yomwe iye angatsutsiwa. Iye adawonesa kuti wanthu angakwanise kutumikira Mulungu podiya kuti ankuboneresewa. Mwakuchita vimwevi, Yesu ‘adatisiyira chitsanzo [ise] kuti titewedzere bwinobwino mapazi yake.’—1 Petulo 2:21.
PFUNZIRANI VIZINJI
Wonani momwe Yesu angalalikirira ntontholo wabwino na momwe angachitira vodabwisa.
4. Yesu ambalalikira ntontholo wabwino
Yesu adafamba m’misewu makilometro yazinji padziko yapasi koma na cholinga chibodzi basi, chomwe ni kulalikira ntontholo wabwino kwa wanthu azinji. Lewengani Luka 8:1, ndipo patsogolo pake kambiranani mibvunzo aya:
-
Ko Yesu ambandolalikira wanthu womwe ambabwera kwa iye basi?
-
Ko Yesu ambachita khama yanyi kuti awagumane wanthu?
Mulungu adaleweratu kuti Mesiya adzalalikire ntontholo wabwino. Lewengani Yesaya 61:1, 2, ndipo patsogolo pake kambiranani mibvunzo aya:
-
Ko Yesu adakwanilisa tani ulosi moyu?
-
Ko imwepo munkuwona kuti wanthu ntsiku zino achadekana kubvambo ntontholo moyu?
5. Yesu adapfunzisa chonadi chodekana maninge
Kuingizira pa kulalikira ntontholo wabwino wolewa va Ufumu wa Mulungu, Yesu angapereka malangizo yabwino maninge. Wonani vitsanzo vinango pa vomwe iye adalewa pa Ulaliki wake wa paphiri. Lewengani Mateyu 6:14, 34 na 7:12, ndipo patsogolo pake kambiranani mibvunzo aya:
-
Ko m’mavesi mwaya, Yesu adapereka malangizo yabwino yaponi?
-
Ko imwepo munkuwona kuti malangizo mwaya yangathandize wanthu ntsiku zino?
6. Yesu adachita vodabwisa
Yahova adamupasa mphanvu Yesu kuti achite vodabwisa vizinji. Wonani chitsanzo chibodzi, lewengani Maliko 5:25-34 panango wonesani VIDIYO. Ndipo patsogolo pake kambiranani mibvunzo yali m’nyantsi.
-
Tawona kuti nkazi ule wenze wodwala maninge, koma podiya venze tene ko iye angakhulupirira chani?
-
Ko pa chodabwisa chomwe Yesu adachita imwepo mwakondwa maninge na chani?
Lewengani Yohane 5:36, ndipo patsogolo pake kambiranani mbvunzo uyu:
-
Ko vodabwisa vomwe Yesu adachita ‘vidapereka umboni wanyi’ panango kuti vidatsimikizira chani va iye?
Ko munkudziwa?
Pafupifupi vose vomwe tichadziwa polewa va Yesu vidanembewa m’mabukhu ya m’Baibolo yomwe ni Mateyu, Maliko, Luka na Yohane. Ndipo mabukhu mwaya yachachemerewa kuti ntontholo wabwino. Nivopasa chidwi kuti munembi aliyese wa mitontholo mwaya adanemba chinthu chomwe munango alibe kuchinemba. Tikaphatanidza vochitika vose vimwevi tichakhala ninge tinkuwona moyo wa Yesu pewenze pano padziko yapasi.
-
MATEYU
ni ntontholo wabwino wakuyamba kunembewa. Mu ntontholo moyu tichagumanamo vinthu vizinji vomwe Yesu adapfunzisa, makamaka pa nkhani ya Ufumu wa Mulungu.
-
MALIKO
ni bukhu ing’ono pa mabukhu yose ya ntontholo wabwino. Ichafotokoza vinthu mwamphanvu ndipo inavochitika vizinji.
-
LUKA
ichafotokoza momwe pemphero yenzere yodikana kwa Yesu na momwe Yesu ambachitira vinthu na akazi.
-
YOHANE
ichafotokoza macheza yazinji yomwe Yesu wenze nayo na azishamwali wake pabodzi na wanthu anango, vimwevi vichatithandiza kuwona makhalidwe ya Yesu.
WANTHU ANANGO ACHATI: ‘Yesu wenzelini mwana wa Mulungu koma wenze munthu wabwinombo basi.’
-
Ko munkuganiza tani?
CHIGWATO
Yesu adalalikira va Ufumu wa Mulungu, adachita vodabwisa ndipo adabvera Yahova mu vose.
Kubwerezera
-
Ko basa yodekana maninge ya Yesu pewenze pano padziko yapasi ni iponi?
-
Ko vodabwisa vomwe Yesu angachita vichapereka umboni uponi?
-
Ko Yesu adapereka malangizo yabwino yaponi?
KUTI MUDZIWE VIZINJI
Ko Yesu angakonda maninge kuyankhula va chani?
‘Ndawa chani Ufumu wa Mulungu wenze wofunika maninge kwa Yesu?’ (Nsanja ya Olonda ya 1 Outubro 2014)
Wonani ndawa yake tichadekana kukhulupirira kuti vodabwisa vomwe Yesu adachita vidachitikadi.
‘Vodabwisa va Yesu ko vinkutipfunzisa chani?’ (Nsanja ya Olonda ya 15 Julho 2004)
Werengani va mwamuna munango yemwe adachinja khalidwe yake ndawa yakupfunzira momwe Yesu angakhalira na wanthu.
‘Nimbandodziganizira nekha’ (Nsanja ya Olonda ya 1 Outubro 2014)
Wonani vinthu vikuluvikulu vomwe Yesu adachita moyendera ndandanda.
a Mu msolo 31-33 udzafotokoze vizinji pankhani ya Ufumu wa Mulungu .
