MSOLO 17
Ko Yesu ni munthu wotani?
Tikambapfunzira vinthu vomwe Yesu adachita na kunena padziko yapasi, tichazindikira makhalidwe yake. Vimwivi vichachitisa kuti timufenderere iye na Ababa wake Yahova. Ko yanango mwa makhalidwe yake ni yaponi? Ndipo ko tingatewedzere tani Yesu pamoyo wathu?
1. Ni mwanjira yanyi momwe Yesu alili ninga Ababa wake?
Yesu adakhala magole yazinji maninge na Ababa wake kudzulu ndipo adapfunzira vizinji na iye. Ndipomwapa Yesu achaganiza na kuchita vinthu ninge Ababa wake Yahova. (Lewengani Yohane 5:19.) Shuwadi, Yesu achatewedzera bwinobwino makhalidwe ya Ababa wake ndipo adalewa kuti: ‘Yemwe waona ine, waona pomwe Ababa.’ (Yohane 14:9) Imwepo mukambapfunzira makhalidwe ya Yesu, mudzakhale mukupfunzira pomwe vizinji va Yahova. Mwakulinganiza, mukawona momwe Yesu angachitira vinthu na wanthu na kuwaganizira, vichawonesa momwe Yahova achakuganizirirani imwepo.
2. Ko Yesu adawonesa tani kuti achakonda Yahova?
Yesu adati: ‘Kuti dziko idziwe kuti inepano nichakonda Ababa, nichachita ndendende ninga momwe Ababa adaniuzira.’ (Yohane 14:31) Pewenze padziko yapasi, Yesu adawonesa kuti angakonda maninge Ababa wake mwa kuwabvera pa vinthu vilivose olo panthawe yomwe kuchita vimwevi kwenze koshupa. Kuingizira mwapa, Yesu angakonda kuuza anango va Ababa wake na kuthandiza anango kukhala paushamwali na Mulungu.—Yohane 14:23.
3. Ko Yesu adawonesa tani kuti achakonda wanthu?
Baibolo ichati Yesu ‘achakonda maninge wanthu.’ (Miyambo 8:31) Yesu angakhala bwino na wanthu wose ndipo wose angawawona chibodzibodzi. Kuingizira mwapa, nthawe zose ambayankhula mawu yolimbikisa ndipo wenze wokonzeka kuthandiza. Vodabwisa vomwe iye adachita sikuti vidandowonesa kuti iye anamphanvu, koma kuti ambabvera pomwe ntsisi wanthu. (Maliko 1:40-42) Mawu yake yenze yokhazika moyo pasi wanthu wose womwe ambamubvesera. Yesu wenze wokonzeka kubonera mpakana kufa ndawa yokonda wanthu. Koma iye achakonda mwapadera wale womwe achakonda vomwe iye achapfunzisa.—Lewengani Yohane 15:13, 14.
PFUNZIRANI VIZINJI
Dziwani vizinji va makhalidwe ya Yesu. Wonani momwe mungawonesere chikondi na moyo wopasa ninge momwe iye angachitira.
4. Yesu achakonda Ababa wake
Chitsanzo cha Yesu chichatipfunzisa momwe tingawonesere kuti tikonda Mulungu. Lewengani Luka 6:12 na Yohane 15:10; 17:26. Mukamaliza kuwerenga malemba yose mwaya, kambiranani mbvunzo uyu:
-
Ko tingatewedzere tani Yesu na kuwonesa kuti tichakonda Yahova?
Yesu ambakonda Ababa wake wakudzulu ndipo ambayankhula nawo mpemphero
5. Yesu achaikhira nzeru wanthu womwe achada kuthandiziwa
Yesu ambaganizira maninge wanthu kuposha momwe ambadziganizirira. Iye angaphatisira basa nthawe yake pakuthandiza wanthu olo pewenze woneta. Lewengani Maliko 6:30-44, patsogolo pake kambiranani mibvunzo aya:
-
Ko ni mwanjira yanyi momwe Yesu adawonesera kuti achadera nkhawa wanthu?—Onani vesi 31, 34, 41, na 42.
-
Ndawa chani Yesu ambafuna kuthandiza wanthu?—Onani vesi 34.
-
Tawona kuti Yesu angatewedzera makhalidwe ya Ababa wake, ko vimwevi vinkutipfunzisa chani va Yahova?
-
Ni mwanjira yanyi momwe tingawonesere kuti tidera nkhawa wanthu ninge momwe Yesu angachitira?
6. Yesu ni wopasa
Yesu wenze alibe vinthu vizinji, koma vewenze navo ambagawirambo anango. Iye adati timbamutewedzere. Lewengani Machitidwe 20:35, ndipo patsogolo pake kambiranani mbvunzo uyu:
-
Mobverana na mawu ya Yesu, nchani chingatithandize kuti tikhale wokondwa?
Wonesani VIDIYO, patsogolo pake kambiranani mbvunzo uli m’nyantsi.
-
Ko ni njira zinango ziponi zomwe tingakhalire wopasa olo kuti tinavinthu vochepa vakuthupi?
Ko munkudziwa?
Baibolo ichatipfunzisa kupemphera kwa Yahova mudzina ya Yesu. (Lewengani Yohane 16:23, 24.) Tikambachita vimwevi, tichawonesa kuti tinkutembeja Yesu pa vomwe adatichitira kuti tikhale paushamwali wa Yahova.
WANTHU ANANGO ACHATI: ‘Mulungu achaikhiralini nzeru pa mabvuto ya wanthu.’
-
Tadziwa kuti Yesu ambatewedzera makhalidwe ya Yahova. Ko vimwevi vinkuwonesa tani kuti Yahova atiikhira nzeru?
CHIGWATO
Yesu achakonda Yahova na wanthu. Pakuti Yesu ali ninge Ababa wake, mukambadziwa Yesu mudzamudziwe pomwe bwino Yahova.
Kubwerezera
-
Ko tingawonese tani kuti timukonda Yahova ninge momwe Yesu adachitira?
-
Ko tingawonese tani kuti tikonda wanthu ninge momwe Yesu adachitira?
-
Ni khalidwe iponi ya Yesu yomwe imwepo mwakomedzewa nayo maninge?
KUTI MUDZIWE VIZINJI
Onani makhalidwe yanango ya Yesu yomwe tingatewedzere.
‘Kuti mutewedzere Yesu, muchadekana . . .’ (Yesu—Ndi Njira, Choonadi ndi Moyo, tsamba 317)
Dziwani kuti ndawa chani tichadekana kupemphera mudzina ya Yesu.
‘Ndawa chani tichadekana kupemphera mudzina ya Yesu?’ (Nsanja ya Olonda ya 1 Fevereiro, 2008)
Ko Yesu wenze wooneka tani?
Ko tinkupfunzira chani pa momwe Yesu angachitira vinthu na akazi?
‘Mulungu afuna kuti akazi ambalemekezewe’ (Nsanja ya Olonda ya 1 Setembro, 2012)
