MSOLO 19

Ko Mboni za Yahova ni Akhrisitudi chaiwo?

IMBISANI

Isepano wa Mboni za Yahova tichakhulupirira kuti ndisedi Akhrisitudi chaiwo. Ndawa chani? Mu mpfunziro mwaino tione kuti ko vomwe tichakhulupirira vichachokera kuponi, ndawa yake tichachemerewa kuti Mboni za Yahova, na momwe tichawonesera chikondi kwa anzathu.

1. Ko Mboni za Yahova chikhulupiriro chawo chichachokera kuponi?

Yesu adati: ‘Mawu yanu [Mulungu] ni chonadi.’ (Yohane 17:17) Ninge Yesu, isepano chikhulupiriro chathu nthawe zose chichachokera m’Mawu ya Mulungu. Onani momwe tidachitira vimwivi mu mbiri yathu ya m’magole ya manjemanje mu 1870, pa nthawe mweyire kagulu ka wanthu kopfunzira Baibolo kadayamba kupfunzira Baibolo mosamala maninge. Iwo angada kudziwa vomwe Baibolo ichapfunzisa, akabvesa chipfunziso cha m’Baibolo iwo angakhulupiriratu vimwevo, podiya kuti venze vosiyana na vomwe mutchetchi yangapfunzisa. Patsogolo pake ambayambiratu kupfunzisa anango va chonadi chimwecho. a

2. Ndawa chani tinadzina yakuti Mboni za Yahova?

Yahova achachemera wanthu womwe achamutumikira kuti Mboni zake ndawa yakuti iwo achafotokoza chonadi cholewa va iye. (Aheberi 11:4–12:1) Mwakulinganiza, kalekale Yahova adawuza wanthu kuti: ‘Imwepo ndimwe Mboni zangu.’ (Lewengani Yesaya 43:10.) Yesu achachemerewa kuti ‘Mboni yokhulupirika.’ (Chivumbulutso 1:5) Ndipomwapa, kundochokera mu gole ya 1931 tidayamba kuphatisira basa dzina yakuti Mboni za Yahova. Tichaimekera maninge dzina mweyi.

3. Ko Mboni za Yahova zichatewedza tani chikondi chomwe Yesu adachiwonesa?

Yesu angawakonda maninge ateweri wake ndipo angawawona ninge wanthu wa m’banja mwake. (Lewengani Maliko 3:35.) Mwakulingana na mwevi Mboni za Yahova ni zobverana ninge banja ibodzi ya padziko yose. Ndipomwapa iwo achachemerena kuti abale na alongo. (Filimoni 1, 2) Isembo tichatewedza lamulo yakuti: ‘Kondani gulu yose ya abale.’ (1 Petulo 2:17) Mboni za Yahova zichawonesa chikondi mwechi munjira zosiyanasiyana, makamaka pomwe abale wathu achadekana thandizo.

PFUNZIRANI VIZINJI

Dziwani vizinji pa mbiri ya Mboni za Yahova, ndipo wonani mawumboni yanango yowonesa kuti iwo ni Akhrisitu chaiwo.

Akhrisitu chaiwo achakhulupirira ntontholo wa m’Baibolo ndipo achawuza anango

4. Vomwe tichakhulupirira vichachokera m’Baibolo

Yahova adaleweratu kuti kubvesesa kwathu Baibolo kudzayende kunkuyingizirika. Lewengani Danieli 12:4, ndipo patsogolo pake kambiranani mbvunzo uyu:

Pomwe wanthu wa Mulungu angafagafaga panango kuti kupfunzira Baibolo, nchani chomwe iwo ‘angagumana’?

Onani momwe gulu ya wopfunzira Baibolo, pakati pa gulu mweyi penze munthu munango dzina yake Charles Russel, momwe angapfunzirira mawu ya Mulungu. Wonesani VIDIYO, ndipo patsogolo pake kambiranani mbvunzo uyu.

VIDIYO: Kugumana chonadi cha m’Baibolo (7:45)

Mu vidiyo, ko Charles Russell na wopfunzira Baibolo anzake angapfunzira tani Baibolo?

Ko munkudziwa?

Nthawe zinango isepano tichachinja kabvesesedwe kathu ka Baibolo. Ndawa chani? Ndawa Mulungu achabvekesa bwinobwino vomwe viri m’Mawu yake, virininge dzuwa ikambachoka pang’onopang’ono tichakwanisa kuona chilengedwe. (Lewengani Miyambo 4:18.) Ni shuwadi kuti Baibolo ichachinjalini, koma tikambabvesesa vomwe ichanena tichachinja vomwe tichakhulupirira.

5. Isepano wa Mboni za Yahova tichachita vinthu mobverana na dzina yathu

Ndawa chani tidasalula dzina yakuti Mboni za Yahova? Wonesani VIDIYO, ndipo patsogolo pake kambiranani mbvunzo uyu.

VIDIYO: Dzina yomwe ichatidziwikisa (2:40)

Ndawa chani adachita bwino kusalula dzina yakuti Mboni za Yahova?

Ndawa chani Yahova adasalula wanthu kuti akhale Mboni zake? Ndawa yakuti Mboni zimwezi zidakayikhira Yahova kumbali ku mabodza yomwe wanthu achamunenera. Naboni tione yawiri mwa mabodza mwaya.

Vipembedzo vinango vichanena kuti Yahova achada kuti timbaphatise basa vimafano pakumutumikira, koma ko vimwevi ni shuwadi? Lewengani Levitiko 26:1, ndipo patsogolo pake kambiranani mibvunzo aya.

Ko ni shuwadi kuti Mulungu achada kuti isepano timbaphatisire basa mafano pakumutumikira? Ko Yahova achayawona tani mafano?

Matchetchi yanango yachapfunzisa kuti Yesu ni Mulungu, ko vimwevi ni shuwadi? Lewengani Yohane 20:17, ndipo patsogolo pake kambiranani mibvunzo aya:

Ko nishuwadi kuti Yesu ni Mulungu? Ko Yesu na Mulungu ni munthu mbodzi?
Yahova adasalula wanthu kuti ambafotokoza chonadi cha iye na cha Mwana wake, ko imwepo muchadzibva tani mukambadziwa vimwevi?

6. Isepano tichakondana

Baibolo ichalinganiza Akhrisitu na mbali zosiyanasiyana za thupi ya munthu. Lewengani 1 Akorinto 12:25, 26, ndipo patsogolo pake kambiranani mibvunzo aya:

Ko Nkhrisitu chaiye achadikana kumbachita chani akambawona Akhrisitu anzake ankubonera?
Ko imwepo mwabvesa chani pachikondi chomwe chilipo pakati pa Mboni za Yahova?

Mu dziko inango Mboni za Yahova zikafunika thandizo, azibale wawo wose wapadziko yapasi achazithandiza mwankankulumize. Kuti muone chitsanzo, wonesani VIDIYO. Ndipo patsogolo pake kambiranani mbvunzo uyu.

VIDIYO: Chivomezi chogunduza pasi ku Haiti (5:29)

Tawona kuti pakadikana chithandizo Mboni za Yahova zichapereka chithandizo mwankakulumize, ko vimwivi vichawonesa tani chikondi chomwe iwo anacho?

Akhrisitu chaiwo achawonesa chikondi anango

WANTHU ANANGO ACHATI: ‘Mboni za Yahova ni matchetchi mwaya yanyowani yomwe yandobwerako ntsiku zino.’

Ko Yahova adayambalini kuchemera atumiki wake kuti Mboni zangu?

CHIGWATO

Mboni za Yahova ni Akhrisitu chaiwo. Ndise banja ibodzi yapadziko yose ya atumiki wa Mulungu, vomwe tichakhulupirira vichachokera m’Baibolo ndipo tichapfunzisa chonadi cha Yahova kwa wanthu anango.