Yesu adapfunzisa kuti ubatizo ni wakudikana maninge kwa Akhrisitu. (Lewengani Mateyu 28:19, 20.) Koma ko ubatizo ni chani? Ndipo ni chani chomwe munthu angachite kuti akwanirise chakulinga chimwechi?

1. Ko ubatizo ni chani?

Mawu yakuti ‘ubatizo’ yadachokera ku mawu ya chigiriki yomwe yachathandauza kuti ‘kudibisa’ m’madzi. Pomwe Yesu adabatizika iye adamiziwiratu m’kamadzi ka Yorodano, ndipo patsogolo pake iye ‘adavuwuluka m’madzi mule.’ (Maliko 1:9, 10) Mwakulingana na vimwevi Akhrisitu chaiwo achabatiziwa mwakudibisiwa m’madzi panango kumira m’madzi.

2. Ko ubatizo uchathandauza chani?

Munthu akabatizika achakhala ankuwonesa kuti wadzipereka kwa Yahova Mulungu. Ko munthu achadzipereka tani? Akanati wabatizika, iye payekha m’pemphero achawuza Yahova kuti kuposha vose achada kumutumikira mpakana kalekale. Iye achasalula ‘kudzilamba yekha . . . na kupitiriza kutewedza’ vomwe Yesu adapfunzisa na chitsanzo chake. (Mateyu 16:24) Kudzipereka kwake na kubatizika kuchachitisa kuti iye akhale paushamwali wakulimba na Yahova pabodzi na wanthu womwe achatumikira naye pabodzi.

3. Ko munthu angapite tani patsogolo mpakana kufika pakubatizika?

Imwepo mungakonzekere kubatizika mwa kupfunzira va Yahova na kulimbisa chikhulupiriro chanu kwa iye. (Lewengani Aheberi 11:6.) Pomwe chidziwiso chanu na chikhulupiriro chanu chinkukula chikondi chanumbo na Yahova chidzakule. Mosakaika imwepo mudzafune kuti mumbalalikire va iye na kukhala na moyo mobverana na makhalidwe yake yabwino. (2 Timoteyo 4:2; 1 Yohane 5:3) Munthu akachita vimwevi iye achakhala, ankuchita vinthu ‘mobverana na vomwe Yahova achafuna kuti mumbamukondwerese pa chilichose,’ iye achasaina kupereka moyo wake kwa Mulungu na kubatizika.—Akolose 1:9, 10. a

 PFUNZIRANI VIZINJI

4. Tingapfunzire vizinji na ubatizo wa Yesu

Lewengani Mateyu 3:13-17 kuti mudziwe vizinji va ubatizo wa Yesu. Ndipo patsogolo pake kambiranani mibvunzo aya:

• Ko Yesu adabatiziwa pomwe wenze mwana?

• Ko iye adabatizika tani? Ko iye adandowaziriwa madzi basi?

Yesu adayamba basa yabwino maninge yomwe adapasiwa na Mulungu padziko yapasi pomwe adabatizika. Lewengani Luka 3:21-23 na Yohane 6:38, ndipo patsogolo pake kambiranani mbvunzo uyu:

• Ko pomwe Yesu adabatizika, ni basa iponi yomwe iye adaikha pa malo yakuyamba pa moyo wake?

5. Ubatizo ni chakulinga chomwe mungachikwanilise

Mukaganizira va kubatizika panango mungawone kuti ni voshupa maninge pakuyamba, koma podiya viritene, imwepo mungakwanise kupita patsogolo mpakana kufika panthawe yomwe mudzabve kuti mungakwanise kuchita chosalula chimwechi. Kuti mudziwe wanthu womwe adachita vimwevi, wonesani VIDIYO.

Lewengani Yohane 17:3 na Yakobo 1:5, ndipo patsogolo pake kambiranani mbvunzo uyu:

• Ko ni chani chingathandize munthu kuti akhale wokonzeka kubatizika?

1. Isepano tichadzipereka kwa Mulungu mwa nkumuuza Yahova kuti tichada kumutumikira mpaka kalekale

2. Pa ubatizo wathu, tichawonesa kwa wanthu kuti tidadzipereka kwa Mulungu

 6. Ubatizo uchatanthauza kukhala mbali ya banja ya Yahova

Tikabatizika, tichakhala mbali ya banja yobverana padziko yose yapasi. Podiya kuti ndise wa m’madziko na makhaindi yosiyanasiyana, tose tichakhulupirira vinthu vibodzi ndipo tichakhala na makhalidwe yolingana. Lewengani Salimo 25:14 na 1 Petulo 2:17, ndipo patsogolo pake kambiranani mbvunzo uyu:

• Ko ubatizo uchakhudza tani ushamwali wa munthu na Yahova na anango womwe achatumikira naye pabodzi?

 CHIGWATO

Yesu adapfunzisa kuti Akhrisitu achadekana kubatizika. Kuti akwanirise chakulinga chimwechi, munthu achadekana kulimbisa chikhulupiriro chake mwa Yahova na kumbakhala na makhalidwe yomwe Iye achafuna na kudzipereka kwa Iye.

Kubwerezera

• Ko ubatizo ni chani, ndipo ndawa chani ni wakudikana?

• Ko kudzipereka na ubatizo ni kobverana tani?

• Ko ni masitepi yaponi yomwe munthu angachite kuti abatizike?