MSOLO 24
Ko angelo ni mbani ndipo iwo achachita chani?
Yahova achada kuti tidziwe va banja yake yakudzulu. Banja mweyi inkuphatanidzapo angelo womwe achachemerewa kuti ‘wana wa Mulungu.’ (Yobu 38:7) Ko Baibolo ichalewa chani va angelo? Ko iwo achawachitira chani wanthu? Ndipo ko ni angelo wose womwe ali m’banja ya Mulungu?
1. Ko angelo ni mbani?
Yahova adasika angelo kudzulu akanati wasika dziko yapasi. Molingana na Mulungu, angelo achawonekalini ndipo achakhala kudzulu. (Aheberi 1:14) Pana mamidyau yazinji ya angelo kudzulu. Ndipo mngelo aliyese anamakhalidwe yapadera maninge. (Chivumbulutso 5:11) Iwo achatamanda ‘mawu ya [Yahova] na kubvera malamulo yake.’ (Salimo 103:20) Kalekale, Yahova angaphatisa basa angelo pakutumiza ntontholo kuthandiza panango kupulumusa wanthu wake womwe ali pangozi. Ntsiku zinombo angelo achathandiza Akhrisitu kugumana wanthu womwe achada kupfunzira va Mulungu.
2. Ko Satana na viwanda vake ni mbani?
Angelo anango alibe kukhala wokhulupirika kwa Yahova. Mngelo wakuyamba yemwe adayamba kupanduka achachemerewa kuti ‘Mdyerekezi na Satana yemwe ankusokeresa dziko yose yapasi komwe kuna wanthu.’ (Chivumbulutso 12:9) Satana ambafuna kutonga wanthu anango, ndipomwapo iye adakwanisa kuchitisa Adamu na Hava pabodzi na angelo anango kukhala kumbali yake yopanduka. Angelo mwawa wopanduka ac hadziwika kuti viwanda. Yahova adathamangisa angelo mwawa kudzulu ndipo manjeuno iwo ali pano padziko yapasi ndipo iwo adzadzongewe.—Lewengani Chivumbulutso 12:9, 12.
3. Ko Satana na viwanda vake achatinamiza tani?
Satana na viwanda achanamiza wanthu azinji mwa kulosera vakutsogolo, pakulosera vakutsogolo wanthu achayesa kubverana maninge na viwanda. Vimwivi ni vophonyeka. Mwakulinganiza, wanthu anango achakhulupirira nyenyezi, maloto pabodzi na ng’anga. Pomwe wanthu anango achanyang’ana mankhwala mwakuchita kuwombeza. Satana achachitisa pomwe wanthu kukhulupirira kuti angakwanise kuyankhula na wanthu wakufa. Koma Yahova achati: ‘Ayi kuyenda kwa woyankhula na mizimu ndipo ayi kubvunzira wolosera vakutsogolo.’ (Levitiko 19:31) Iye achatichenjeza kwa Satana na viwanda vake, iwo ni azondi wa Mulungu ndipo achada kutidzonga.
PFUNZIRANI VIZINJI
Pfunzirani za vinthu vabwino vomwe angelo achachita, na kuipa kubvunzira vakutsogolo na momwe tingadzitetezerere kwa Satana na viwanda vake.
4. Angelo achathandiza wathu kupfunzira va Yahova
Angelo achalalikiralini sitiriti wanthu. M’malo mwake, iwo angakwanise kuthandiza atumiki wa Mulungu kugumana wanthu womwe achada kupfunzira va Yahova. Lewengani Chivumbulutso 14:6, 7, ndipo patsogolo pake kambiranani mibvunzo aya:
-
Ndawa chani tichadekana thandizo ya angelo pakulalikira?
-
Ko ni volimbikisalini kudziwa kuti angelo angakwanise kuthandiza imwepo kugumana munthu yemwe achada kupfunzira va m’Baibolo? Ndawa chani?
5. Lambani kukhulupirira mizimu
Satana na viwanda vake ni azondi wa Yahova. Ndipo iwombo ni azondi wathu. Lewengani Luka 9:38-42, ndipo patsogolo pake kambiranani mbvunzo uyu:
-
Ko viwanda vichachita chani na wanthu?
Tichadalini kubvuma kuti viwanda visokoneze moyo wathu. Lewengani Deuteronomo 18:10-12, ndipo patsogolo pake kambiranani mibvunzo aya:
-
Ko ninjira ziponi zomwe viwanda vichayesera kungenera pa moyo wathu na kufuna kuyankhula nase? Ko ni vinthu vobverana na viwanda viponi vomwe vichachitika mudera yanu?
-
Ko munkuwona kuti Yahova analazawu pakulambiza kubvunzira va kutsogolo? Ndawa chani?
Wonesani VIDIYO, ndipo patsogolo pake kambiranani mibvunzo aya.
-
Muvidiyo, Palesa wamangirira chithumwa pa djanja ya mwana wake. Ko munkuwona kuti kuchita vimwevi ni koipa? Ndawa chani?
-
Ko Palesa angadikana kuchita chani kuti adziteteze kwa viwanda?
Kuyambira kalekale Akhrisitu chaiwo akhala ankuzondana na viwanda. Lewengani Machitidwe 19:19 na 1 Akorinto 10:21, ndipo patsogolo pake kambiranani mbvunzo uyu:
-
Ndawa chani ni vodekana maninge kuchosa vinthu vose vomwe ni vobverana na viwanda?
6. Winani nkhondo yomenyana na Satana na viwanda vake
Viwanda vichatongewa na Satana. Koma angelo wokhulupirika achatongewa na mngelo nkulu wochemerewa kuti Mikayeli yomwe ni dzina inango ya Yesu. Ko Mikayeli anamphanvu yochita chani? Lewengani Chivumbulutso 12:7-9, ndipo patsogolo pake kambiranani mibvunzo aya:
-
Ko nimbani anamphanvu zizinji? Ni Mikayeli na angelo wake panango Satana na viwanda vake?
-
Ko imwepo munkuwona kuti wotewera wa Yesu achadikana kukhala na mantha na Satana na viwanda vake?
Imwepo mungawine nkhondo yomenyana na Satana pabodzi na viwanda vake. Lewengani Yakobo 4:7, ndipo patsogolo pake kambiranani mbvunzo uyu:
-
Ko imwepo mungadziteteze tani kwa Satana na viwanda vake?
WANTHU ANANGO ACHATI: ‘Palibe bvuto kuchita masenzeka panango kunyang’anira mavidiyo yowonesa vamizimu. Yamwaya ni masenzeka chabe.’
-
Ndawa chani kuganiza tene ni koipa?
CHIGWATO
Angelo wokhulupirika achatithandiza. Satana na viwanda vake ni azondi wa Yahova ndipo achaphatisa basa viwanda kuti anamize wanthu.
Kubwerezera
-
Ko angelo wa Yahova achathandiza tani wanthu kupfunzira va iye?
-
Ko Satana na viwanda vake ni mbani?
-
Ndawa chani imwepo muchadekana kukhala kutali na wanthu wochita vamizimu?
KUTI MUDZIWE VIZINJI
Wonani umboni wowonesa kuti Yesu ni Mikayeli nkulu wa angelo.
‘Ko nkulu wa angelo Mikayeli ni mbani?’ (Nkhani ya pa intaneti)
Wonani umboni wakuti Mdyerekezi ni munthudi chaiye osati vinthu voipa vomwe vichakhala mu mtima mwa munthu.
Wonani momwe nkazi munango adamasukira ku viwanda.
‘Iye adadziwa kuti moyo unachakulinga’ (Nsanja ya Olonda ya 1 Julho, 1993)
Wonani momwe Satana achaphatisira basa wanthu wokhulupirira mizimu kuti anamize wanthu.
‘Kudziwa chaivo pankhani ya matsenga na ufiti’ (Njira ya ku Moyo Wosatha—Kodi Mwaipeza?, chigawo 5)
