MSOLO 26
Ndawa chani vinthu voipa vichachitika ndipo ndawa chani tichabonera?
Kukachitika vinthu voipa wanthu achadzibvunza kuti: ‘Ndawa chani vimwevi vachitika?’ Nivokomedza maninge kudziwa kuti Baibolo ichapereka mdawiro wa mbvunzo moyu!
1. Ko Satana adayambisa tani vinthu voipa padziko yapasi?
Satana Mdyerekezi adapandukira Mulungu. Satana ambafuna kuti ambatonge anango. Ndipomwapa adanamiza wanthu woyambirira Adamu na Hava kuti apandukirembo Mulungu. Ko Satana adachita tani vimwivi? Iye adawuza bodza Hava. (Genesis 3:1-5) Iye adachitisa Hava kuganiza kuti Yahova angamumana vinthu vinango vabwino. Satana adalewa kuti wanthu woyambirira wale adakakhala wokondwa adakaleka kubvera Mulungu. Ndawa ya vimwevi, iye adamuuza bodza nkazi ule yomwe ni bodza yoyamba pa bodza zose. Iye adati Hava adakafalini. Ndipomwapa Baibolo ichachemera Satana kuti ‘wabodza komasoti baba wake wabodza.’—Yohane 8:44.
2. Ko Adamu na Hava adasaina kuchita chani?
Yahova adapasa Adamu na Hava vinthu vose vabwino. Iye adawauza kuti angadye vipaso va m’muti uliwose womwe wenze m’munda wa Edeni ule kuchosapo ubodzi wokha basi. (Genesis 2:15-17) Koma iwo adasaina va kudya vipaso va m’muti womwe wenze adawalambiza ule. Hava ‘adathyola chipaso cha m’muti ule nkudya.’ Patsogolo pake, Adamu ‘nayembo adadya.’ (Genesis 3:6) Iwo alibe kubvera Mulungu. Ndawa yakuti Adamu na Hava enze waungwiro, venze vosashupa kuti iwo achite vinthu vomwe nivabwino. Koma iwo adasalula kuti aleke kubvera Yahova, padachita vimwivi iwo adachimwa. Ndipo adalamba utongi wa Mulungu. Chosalula chimwechi chidabweresa bvuto ikulu kwa iwo.—Genesis 3:16-19.
3. Ko vosalula va Adamu na Hava vinkutikhudza tani isepano?
Pomwe Adamu na Hava adachimwa, iwo adakhala wanthu alibe ungwiro, ndawa ya vimwivi, adapereka uchimo moyu kwa wana wawo wose. Pakulewa va Adamu Baibolo ichalewa kuti: ‘Ninge momwe uchimo udangenera mudziko kudzera mwa munthu m’bodzi na impfa kudzera mwa uchimo, impfa nkudzala kwa wanthu wose.’—Aroma 5:12.
Isepano tichabonera ndawa ya vinthu vosiyanasiyana. Nthawe zinango tichabonera ndawa ya vinthu voipa vomwe tichasalula. Nthawe zinango tichabonera ndawa ya vosalula voipa va wanthu anango. Ndipo nthawe zinango tichabonera ndawa yakuti tili pa malo yoipa na nthawe yophonyeka.—Lewengani Mlaliki 9:11..
PFUNZIRANI VIZINJI
Wonani ndawa yake Mulungu ni wosaphonya pa voipa vomwe vichachitika na mabvuto yomwe tichawona mudziko ntsiku zino. Wonani pomwe momwe iye achabvera tikambabonera.
4. Yemwe ni wophonya pa mabvuto yomwe tichagumana nanyo
Wanthu azinji achakhulupirira kuti Mulungu ndiye ankutonga dziko yapasi. Ko vimwivi nchaivodi? Wonesani VIDIYO.
Lewengani Yakobo 1:13 na 1 Yohane 5:19, ndipo patsogolo pake kambiranani mbvunzo uyu:
-
Ko Mulungu ndiye wophonya pa vinthu voipa na mabvuto yomwe tinkugumana nayo?
5. Wonani vomwe vachitika ndawa ya utongi wa Satana
Lewengani Genesis 3:1-6, ndipo patsogolo pake kambiranani mibvunzo aya:
-
Ko ni bodza iponi yomwe Satana adanena?—Onani vesi 4 na 5.
-
Ko Satana adachita tani kuti viwoneke ninge Yahova angabisa vinthu vabwino kwa wanthu?
-
Malingana na vomwe Satana adanena, ko wanthu achadekana Yahova kukhala ntongi wawo kuti akhale wokondwa?
Lewengani Mlaliki 8:9, ndipo patsogolo pake kambiranani mbvunzo uyu:
-
Tawona kale kuti Yahova ndiyelini ankutonga dziko, ko nchani chachitika ndawa ya vimwevi?
-
Adamu na Hava enze alibe uchimo ndipo ambakhala mu paradaiso. Koma iwo adabvera Satana nkupandukira Yahova
-
Padapanduka, dziko idadzala na uchimo, kubonera na impfa
-
Yahova adzachose uchimo, kubonera na impfa. Pamwapo, wanthu adzakhale alibe uchimo ndipo adzakhale mparadaiso
6. Yahova achaikhira nzeru mabvuto yathu
Ko Yahova achaikhira nzeru mabvuto yomwe tichagumana nayo? Naboni tiwone vomwe Mpfumu Davide pabodzi na mtumi Petulo adanemba. Lewengani Salimo 31:7 na 1 Petulo 5:7, ndipo patsogolo pake kambiranani mbvunzo uyu:
-
Ko imwepo munkubva tani pamwadziwa kuti Yahova achawona ndipo achadera nkhawa kubonera kwathu?
7. Mulungu adzamalise kubonera kose kwa wanthu
Lewengani Yesaya 65:17 na Chivumbulutso 21:3, 4, ndipo patsogolo pake kambiranani mbvunzo uyu:
-
Ndawa chani ni vabwino kudziwa kuti Yahova adzamalise vinthu vose voipa vomwe wanthu ankukugumana navo ntsiku zino?
Ko mukadziwa?
Pomwe Satana adanena bodza yakuyamba iye adapsyipiza dzina ya Yahova. Iye adachita vimwivi mwa kuchitisa wanthu kuwona kuti Yahova ni wotongalini wabwino, alibe chilungamo ndipo alibe chikondi. Manjemanje Yahova adzamalise kubonera kose ndipo adzawonese kuti Utongi wake ni wabwino maninge. Iye adzachenese dzina yake ku mabodza yose mwaya. Mweyi ndiyo nkhani yodikana maninge muchilengedwe chose.—Mateyu 6:9, 10.
WANTHU ANANGO ACHATI: ‘Mabvuto ni mbali ya cholinga cha Mulungu kwa ise.’
-
Ko imwepo mungalewe kuti tani?
CHIGWATO
Satana Mdyerekezi na wanthu awiri woyambirira ndiwo wophonya pa vinthu voipa vomwe vili padziko. Yahova achatidera nkhawa maninge ndipo manjemanje iye adzamalise kubonera kose.
Kubwerezera
-
Ko ni bodza iponi yomwe Satana Mdyerekezi adawuza Hava?
-
Ko vomwe Adamu na Hava adasalula vidakhudza tani moyo wathu?
-
Ko tichadziwa tani kuti Yahova achatidera nkhawa tikambabonera?
KUTI MUDZIWE VIZINJI
Wonani kuti ko Baibolo ichanena kuti chimo ni chani.
Dziwani vizinji pa vomwe Satana Mdyerekezi adanena m’munda wa Edeni.
‘Ndawa chani Mulungu wabvuma kuti timbabonere?’ (Nsanja ya Olonda ya 1 Janeiro, 2014)
Wonani midawiro yomwe yachakhazika moyo pasi pa mibvunzo yoshupa maninge.
Wonani vomwe mwamuna munango adapfunzira pa mabvuto yomwe adagumana nayo.
