MSOLO 35
Ko tingachitetani vosalula vabwino?
Aliyese wa ise achadekana kusalula vochita. Ndipo vosalula vathu vingatikhudze maninge isepano pabodzi na ushamwali wathu na Yahova. Mwakulinganiza, tingafunikane kusaina komwe tichafunikana kukhala, momwe tingadzisamalilire mwakuthupi panango peno ninkhani ya kulowola na kulowodwa. Tikambachita vosalula vabwino tingakhale na moyo wokondwa na wokondweresa Yahova.
1. Ko mungaphatise tani basa Baibolo kuti ikuthandizeni kuchita vosalula vabwino?
Mukanati mwachita vosalula, pempherani kwa Yahova ndipo onani momwe Baibolo ichawonera nkhani mweyi. (Lewengani Miyambo 2:3-6.) Panthawe zinango, Yahova achaperekeratu malamulo yobveka bwino. Vikakhala tene, kusalula kubvera malamulo mwaya ni chosalula chabwino maninge chomwe mungachite.
Manje ko tani peno palibiretu malamulo ya sitiliti m’Baibolo pankhani mweyo? Yahova angapitirize basi kukutsogolerani ‘munjira yomwe imwepo muchadekana kufambamo.’ (Yesaya 48:17) Ko achachitatani? Panango pangakhale mpfundo zinango zomwe zingakutsogolereni imwepo. Mpfundo za m’Baibolo ni chonadi chomwe chichathandiza kudziwa maganizo ya Yahova na momwe iye achabvera. Tichadziwa momwe Yahova achabvera pankhani inango tikakhala kuti tinkulewenga nkhani za m’Baibolo. Tikambazindikira momwe Yahova achabvera tichazindikira kuchita vosalula vomwe vichamukondweresa iye.
2. Ko ni vinthu viponi vomwe muchadekana kuwona mukanati mwachita vosalula?
Baibolo ichati: ‘Munthu wochenjera achaganizira momwe akufambira.’ (Miyambo 14:15) Vimwevi vinkutanthauza kuti tikanati tachita vosalula tichadekana kukhala na nthawe yoganiza vati tisalule. Mukambaganizira mpfundo iliyose payokha dzibvunzeni kuti: ‘Ko ningaphatise tani basa mpfundo za m’Baibolo pamwapa? Ko ni mpfundo iponi yomwe ningaiphatise basa yomwe inganipase ntendere wa m’maganizo? Ko vosalula vangu vingakhudze tani anango? Koma mbvunzo wodekana maninge ni wakuti, ko vimwevi vingakondwerese Yahova?’—Deuteronomo 32:29.
Yahova ndiye anaudindo wakutiuza vabwino na vakuipa. Tikambayadziwa bwinobwino malangizo yake pabodzi na mpfundo zake tichakhala wosaina kuyatewedza ndipo tichakhala na chikhumbumtima chabwino. Chikhumbumtima ni umunthu wathu wankati womwe uchatithandiza kuzindikira chabwino na chakuipa. (Aroma 2:14, 15) Chikhumbumtima chopfunzisiwa bwino chidzatithandize kuchita vosalula vabwino.
PFUNZIRA VIZINJI
Khalani na nthawe yowona momwe mpfundo za m’Baibolo pabodzi na chikhumbumtima viliri vodekana maninge pakuchita vosalula.
3. Bvumani kuti Baibolo ikutsogolereni
Ko mpfundo za m’Baibolo zingakuthandizeni tani imwepo mukambachita vosalula? Wonesani VIDIYO, ndipo patsogolo pake kambiranani mibvunzo aya.
-
Ko ufulu wosalula ni chani?
-
Ndawa chani Yahova adatipasa ufulu wosalula?
-
Ko ni chani chomwe Yahova adatipasa chomwe chichatithandiza kuphatisa basa bwino ufulu wathu wosalula?
Kuti muwone chitsanzo cha mpfundo za m’Baibolo, lewengani Aefeso 5:15, 16. Ndipo patsogolo pake kambiranani momwe ‘mungaphatisire bwino nthawe yanu’ pa . . .
-
kulewenga Baibolo nthawe zose.
-
kukhala mwamuna, nkazi panango mwana wabwino.
-
kugumanika pa misonkhano.
4. Pfunzisani chikhumbumtima chanu kuti mumbachite vosalula vabwino
Pakakhala kuti paliretu lamulo yodziwikiratu bwino ya m’Malemba pa nkhani inango kusalula vochita kungawoneke kosashupa. Manje tani peno palibe lamulo yasitiliti? Wonesani VIDIYO, ndipo patsogolo pake kambiranani mbvunzo uyu.
-
Mu vidiyo, ko mulongo ule watewedza njira ziponi kuti apfunzise chikhumbumtima chake kuti ambakwanise kusalula vinthu vomwe vingatamande Yahova?
Ndawa chani tichadekanalini kubvunza anango pa vosalula vomwe isepano tekha tingakwanise kuchita? Lewengani Aheberi 5:14, ndipo patsogolo pake kambiranani mibvunzo aya:
-
Peno tawona kuti vingakhale vopusa maninge tikabvunza anango vomwe tichadekana kusalula, ko ni vinthu viponi vomwe tichadekana kudziwa tekha?
-
Ko ni vinthu viponi vomwe vingakuthandizeni kuti mukwanise kulimbisa chikhumbumtima chanu kuti mumbachite vosalula vabwino?
Ninge mapa, chikhumbumtima chathu chichatithandiza kudziwa komwe moyo wathu unkuyenda
5. Mbalemekezani chikhumbumtima cha anango
Wanthu wosiyanasiyana angachite vosalula vosiyanasiyana. Ko tingawonese tani ulemu pa vosalula va anango? Onani vochitika viwiri ivi:
Chochitika chakuyamba: Mulongo yemwe achakonda kuphatisa basa makiaje (vodzikhuzisira) ankufulukira mu mpingu womwe muna alongo womwe achaphatisiralini basa makiaje.
Lewengani Aroma 15:1 na 1 Akorinto 10:23, 24, ndipo patsogolo pake kambiranani mibvunzo aya:
-
Mobverana na mavesi mwaya, ko mulongo ule angasaine kuchita chani? Ko imwepo mungachite tani peno munamunthu yemwe chikhumbumtima chake chimulambiza kuchita vinthu vomwe chikhumbumtima chanu chichakubvumizani kuchita?
Chochitika chachiwiri: M’bale achadziwa bwinobwino kuti kumwa mowa mwachikatikati nkosalambiziwa m’Baibolo, koma iye ankusalula kundolekeratu na kumwa uko. Iye wachemerewa kuti akacheze ndipo ankuwona kuti abale kunkule ankumwa mowa.
Lewengani Mlaliki 7:16 na Aroma 14:1, 10, ndipo patsogolo pake kambiranani mibvunzo aya:
-
Mobverana na mavesi mwaya, ko m’bale ule angasaine kuchita chani? Ko imwepo mungachite tani mukawona munthu munango ankuchita vinthu vomwe chikhumbumtima chanu chichakulambizani kuchita vinthu mwivo?
Ko ni mpfundo ziponi zomwe zingakuthandizeni kuti muchite vosalula vabwino?
1. Kumbirani Yahova kuti akuthandizeni kusaina vati muchite.—Yakobo 1:5.
2. Faganifagani m’Baibolo pabodzi na mabukhu yathu yafotokoza va m’Baibolo kuti mugumane mpfundo zoti muphatisire basa. Ndipo mungachite pomwe bwino kubvunza Akhrisitu wodziwa vizinji.
3. Ganizirani vingachitike na vosalula vanu, momwe vingakhudzire chikhumbumtima chanu na cha anango.
WANTHU ANANGO ACHATI: ‘Munthu aliyese anaufulu wosalula vomwe achada kuchita. Ko alipo womwe achaganizira va anango?’
-
Ko ndawa chani ni vabwino maninge kuganizira momwe Mulungu achabvera pabodzi na kuganizira momwe wanthu anango achabvera?
CHIGWATO
Tichakwanisa kuchita vosalula vabwino tikayamba tazindikira momwe Yahova achabvera pankhani yomwe tichada kusalula na momwe vingakhudzire chikhumbumtima chathu na momwe vingathandizire anango panango kuwadzonga.
Kubwerezera
-
Ko mungachite tani vosalula vomwe vingakondwerese Yahova?
-
Ko imwepo mungapfunzise tani chikhumbumtima chanu?
-
Ko imwepo mungalemekeze tani chikhumbumtima cha wanthu anango?
KUTI MUDZIWE VIZINJI
Ko mungachitetani vosalula vomwe vingalimbise ushamwali wanu na Mulungu?
‘Chitani vosalula vomwe vichalemekeza Mulungu’ (Nsanja ya Olonda ya 15 Abril, 2011)
Dziwani vizinji momwe Yahova achaperekera malangizo.
Onani vinthu vomwe vidathandiza mwamuna munango kuti achite vosalula voshupa.
Onani momwe mungatamandire Yahova vikakhala kuti palibe malamulo ya sitiliti pankhani yomwe muchada kusalula.
‘Ko muchadekana lamulo ya m’Baibolo nthawe zose?’ (Nsanja ya Olonda ya 1 Dezembro, 2003)
