MSOLO 44
Ko Vikondwerero vose vichalemekeza Yahova?
Yahova achada kuti timbakondwe na moyo mpakana nthawe zinango nkumbakondwererambo. Koma ko vikondwerero vose na maferiado vichamulemekeza iye? Ko tingawonesetani chikondi chathu kwa Yahova pankhani mweyi?
1. Ndawa chani vikondwerero vizinji vichakondweresalini Yahova?
Mungadabwe maninge kuona kuti vikondwerero vizinji vichachokeralini m’Malemba ndipo ni vipfunziso vachikunja. Vikondwerero ninge vimwevi vingakhale vobverana maninge na vipembedzo vabodza. Vingakhale pomwe vobverana na mizimu na nzeru yakuti mzimu uchafalini. Volinga va vikondwerero vinango ni kufagafaga mwayi. (Yesaya 65:11) Yahova achachenjeza atumiki wake kuti: ‘Lekanani nawo . . . ayi kugumirira vinthu vopsyipiziwa.’—2 Akorinto 6:17. a
2. Ko Yahova achabvatani na vikondwerero vomwe chakulinga chake ni kulemekeza wanthu?
Yahova achatichenjeza kuti ayi kuti tigwere mu msampha ‘wokhulupirira wanthu.’ (Lewengani Yeremiya 17:5.) Maferiyado yanango yachalemekeza wolamulira panango masocha. Pomwe anango achakondwerera vizindikiro va dziko ninge ntsiku yomwe adatambira ufulu. (1 Yohane 5:21) Pomwe anango achalimbikisa ndale panango ngwirizano wa m’magulu. Ko Yahova achabva tani tikambapereka ulemerero kwa munthu panango kwa gulu inango, makamaka vikakhala kuti ni vosiyana maganizo na chakulinga chake?
3. Ko ni vochitika viponi vomwe vingachitise kuti vikondwerero vikhale vosabvumizika?
Baibolo ichalambiza ‘kumwa mwauchidakwa, mafesta yazungo na kumwa mwampikisano.’ (1 Petulo 4:3) M’maphwando yanango wanthu azinji achachita vinthu mosadziletsa ndipo achachita vinthu vizinji vachigololo. Kuti tipitirize kukhala azishamwali wa Yahova, tichadekana kukhala kutali na vinthu vopsyipiza mwevi.
PFUNZIRANI VIZINJI
Onani momwe imwepo mungakondweresere Yahova pankhani yosalula bwino pankhani ya maferiyado na vikondwerero.
4. Lambani vikondwerero vomwe vichalemekezalini Yahova
Lewengani Aefeso 5:10, ndipo patsogolo pake kambiranani mibvunzo aya:
-
Ko ni chani chomwe tichadekana kutsimikizira peno tichada kukondwerera chikondwerero chinango panango feriyado?
-
Ko ni Maferiyado yaponi yomwe niyodziwika maninge kudera komwe muchakhala?
-
Ko imwepo munkuganiza kuti maferiyado mwaya yachamukondweresa Yahova?
Ko imwepo mudadzibvunzako kale vomwe Mulungu achaganiza pankhani ya ntsiku yobadwa na vikondwerero? Mu Baibolo tichagumanalini pomwe palinembe kuti atumiki wa Yahova angakondwerera ntsiku yobadwa, koma ichafotokoza vikondwerero viwiri vomwe wanthu omwe angatumikiralini Yahova angakondwerera. Lewengani Genesis 40:20-22 na Mateyu 14:6-10. Patsogolo pake kambiranani mibvunzo aya:
-
Ko nikubverana kuponi komwe kulipo pakati pa chikondwerero na ntsiku yobadwa?
-
Mobverana na nkhani za m’Baibolo, ko munkuganiza kuti Yahova achabvatani na ntsiku zobadwa?
Panango mudakadzibvunza kuti, ‘Ko Yahova achayikhira nzeru nikagumanika pachikodwerero chokondwerera ntsiku yobadwa panango chikondwerero chinango chomwe ni cha m’Malembalini?’ Lewengani Ekisodo 32:1-8. Patsogolo pake, wonesani VIDIYO ndipo patsogolo pake kambiranani mibvunzo aya.
-
Ndawa chani tichadekana kutsimikizira kuti vinthu vobvumizika kwa Yahova niviponi?
-
Ko tingachite tani vimwevi?
Ko tingadziwetani kuti chikondwerero ichi chichakondweresalini Mulungu
-
Ko ni vosachokera mu chipfunziso cha m’malemba? Kuti mudziwe, faganifagani komwe vikondwerero mwevi vidayambira.
-
Ko vichapereka ulemerero kwa wanthu, kwa gulu, panango kuvikondwerero va m’dziko? Kuposha aliyese tichalemekeza maninge Yahova na kumuthemba kuti iye ndiye adzamalise mabvuto yose yapadziko yapasi.
-
Ko miyambo yake na vochitika vake visiyana na pfundo za m’Babibolo? Tichada kupitiriza kukhala wochena m’maganizo.
5. Thandizani anango kuti ambalemekeze vomwe imwepo muchakhulupirira
Vingakhale voshupa maninge kupirira chiyeso vikakhala kuti anango ankukukakamizani imwepo kuti mugumanike pavikondwerero vomwe vichakondweresalini Yahova. Afotokozereni vomwe mudasalula modekha na mwaulemu. Kuti muone momwe mungachitire vimwevi, wonesani VIDIYO.
Lewengani Mateyu 7:12, patsogolo pake kambiranani mibvunzo aya:
-
Mobverana na vesi mweyi, ko imwepo muchadikana kuwuza azibale wanu womwe ni wosakhulupirira kuti aleke kukondwerera maferiyado?
-
Ko ni chani chomwe imwepo mungachite kuti muwatsimikizire azibale wanu kuti olo kuti imwepo mumbachitenawolini pomwe vikondwerero koma mudakapitiriza kuwakonda na kuwalemekeza?
6. Yahova achada kuti timbakhale wokondwa
Yahova achada kuti timbakondwe na moyo mwakukhala na nthawe yabwino na azibale na azishamwali. Lewengani Mlaliki 8:15, ndipo patsogolo pake kambiranani mbvunzo uyu:
-
Ko vesi mweyi ichawonesa tani kuti Yahova achada kuti timbakhale wokondwa?
Yahova achada kuti timbakhale wokondwa pa nthawe yabwino. Wonesani VIDIYO kuti muone momwe mwevi vichaonekerera bwino pamisonkhano yathu ya m’madziko.
Lewengani Agalatiya 6:10, ndipo patsogolo pake kambiranani mibvunzo aya:
-
Ko tichadekana kukondwerera maferiyado yakudziko kuti tiwonese kuti tinkuchita ‘vinthu vabwino’ kwa anango?
-
Ko ni kupasa kwa khaindi yanyi komwe kungakuchitiseni imwepo kukhala okondwa—ko ni kudzibva kukhala wokakamizika pa nthawe ya maferiyado panango ni kupasa pa nthawe yomwe munthu ankudikhiralini?
-
Wa Mboni za Yahova azinji achakonza nthawe yapadera na wana wawo mpakana kugulirana mphaso zinango zapadera. Peno imwepo munawana ko ni chinthu chiponi chapadera chomwe imwepo mungawachitirembo iwo?
WANTHU ANANGO ACHATI: ‘Komwe mafesta mwaya yadachokera mwevi vilibe na basa. Vomwe ni vodekana ni kundokhala na nthawe yabwino basi pabodzi na banja na azishamwali.’
-
Ko imwepo mungalewe chani?
CHIGWATO
Yahova achada kuti timbakhale na nthawe zokomedza pabodzi na azibale wathu na azishamwali wathu. Koma iye achada pomwe kuti timbapewe maphwando yomwe yachamulemekezalini iye.
Kubwerezera
-
Ni mibvunzo yaponi yomwe tingadzibvunze kuti tidziwe peno maphwando mwaya yakondweresalini Yahova?
-
Ko tingathandizetani azibale wathu pabodzi na azishamwali wathu vomwe tasalula pankhani yamaphwando?
-
Ko imwepo munkudziwa tani kuti Yahova achada kuti timbakhale wokondwa nakuti timbakhale na nthawe yokomedza?
KUTI MUDZIWE VIZINJI
Ganizirani va maferiyado yanango yomwe Mkhrisitu achadekanalini kuyakondwerera.
‘Ndawa chani wa Mboni za Yahova achakondwereralini maferiyado yanango?’ (Nkhani ya pa intaneti)
Onani vifukwa vinayi vomwe vichatitsimikizira kuti kukondwerera ntsiku yobadwa kuchakondweresalini Yahova.
‘Ndawa chani Mboni za Yahova zichakondwereralini ntsiku yobadwa?’ (Nkhani ya intaneti)
Onani momwe alumbwana angafotokozere mwaulemu ku shikola akambawuza anzawo ndawa yake achakondwereralini Khisimisi.
Mamidyau yazinji ya Akhrisitu yadasalula kuleka kukondwerera Khisimisi. Ko iwo achabva tani na vomwe adasalula?
‘Iwo adagumana chinthu chabwino’ (Nsanja ya Olonda ya 1 Dezembro, 2012)
a Onani Mawu yakumapeto 5 kuti mudziwe vomwe mungachite pankhani ya maferiado.
