MSOLO 46
Ndawa chani tichadekana kudzipereka na kubatizika?
Imwepo muchadzipereka mwekha kwa Yahova mwa ku mupolomisa kuti mudzatumikire iye yekha basi na kumuikha pamalo yakuyamba pamoyo wanu. (Salimo 40:8) Patsogolo pake muchabatizika. Mwakuchita vimwivi imwepo muchawonesa kwa anango kuti imwepo mudadzipereka. Kusalula kudzipereka kwa Yahova ni chosalula chakudekana maninge chomwe munthu angachite. Ko ni chani chomwe chingakulimbikiseni kuti muchite kusalula kwa siliyasi tene na kuchinja kukulu?
1. Ko ni chani chomwe chichalimbikisa munthu kuti adzipereke?
Kudzipereka kwathu kwa Yahova kuchatsogolerewa na chikondi. (1 Yohane 4:10, 19) Baibolo ichatilimbikisa kuti: ‘Mumbakonde Yahova Mulungu wanu na moyo wanu wose, mtima wanu wose, nzeru zanu zose na mphanvu zanu zose.’ (Maliko 12:30) Tichawonesa kuti tichakonda Mulungu osati pa vomwe tichanena chabe komasoti pa vomwe tichachita. Ninge momwe wanthu awiri achakondanirana mpakana kufika pakulowolana, isembo chikondi kwa Yahova chichatilimbikisa kuti tidzipereke kwa iye na kubatizika.
2. Ko ni madaliso yaponi yomwe Yahova achapereka kwa Mboni zake zobatizika?
Imwepo mukabatizika, muchakhala m’banja ya Yahova yokondwa. Patsogolo pake imwepo muchabva chikondi munjira zizinji, ndipo muchamufenderera maninge kuposha mwaviriri lero. (Lewengani Malaki 3:16-18.) Kuingizira Yahova kukhala Baba wanu, imwepo mudzakhale na banja yauzimu ya abale na alongo padziko yose yapasi omwe achakonda Yahova na imwepo. (Lewengani Maliko 10:29, 30.) Mosakaika imwepo muchadekana kuchita vinango mukanati mwabatizika. Imwepo muchadekana kupfunzira va Yahova kumukonda na kukhulupirira mwana wake. Pamapeto pake imwepo muchadekana kupereka moyo wanu kwa Yahova. Mukatewedza njira mwezi patsogolo pake nkubatizika, mudzakhale wokondwa mpaka kalekale. Mawu ya Mulungu yachati: ‘Ubatizo omwe unkukupulumusani.’ —1 Petulo 3:21.
PFUNZIRANI VIZINJI
Onani kudekana kochinja moyo wanu kuti mudzipereke kwa Yahova na kubatizika.
3. Aliyese wa ise achadekana kusalula yekha yemwe achada kumutumikira
Mu nthawe za Aizirayeli, wanthu anango angaganiza kuti angakwanise kumbatumikira Mulungu pabodzi na mulungu wabodza Baala. Koma Yahova adauza mneneri wake Eliya kuti akawayeruze nzeru zawo zoipa mwezi. Lewengani 1 Mafumu 18:21, patsogolo pake kambiranani mbvunzo uyu:
-
Ko ni chosalula chiponi chomwe Aizirayeli angadekana kuchita?
Ninge Aizirayeli isembo tichadekana kusalula yemwe tichada kumutumikira. Lewengani Luka 16:13, ndipo patsogolo pake kambiranani mibvunzo aya:
-
Ndawa chani vingakwanisikelini kutumikira Yahova na munthu panango na chinthu chinango?
-
Ko tingawonesetani Yahova kuti tidasalula kutumikira iye?
4. Ganizirani va chikondi cha Yahova kwa imwepo
Yahova adatipasa mphaso zizinji maninge. Ko isepano tingamupasembo chiyani? Wonesani VIDIYO.
Ko ni njira zinango ziponi zomwe Yahova ankuwonesera chikondi kwa imwepo? Lewengani Salimo 104:14, 15 na 1 Yohane 4:9, 10, patsogolo pake kambiranani mibvunzo aya:
-
Ko ni mphaso iponi yochokera kwa Yahova yomwe muchawona kuti ni yapadera kwa imwepo?
-
Ko mukaganizira va mphaso zimwizi muchawona kuti iye ni wotani?
Tikatambira mphaso yomwe takomedzewa nayo tichada kuonesa kuti tinkutembeja maninge ule yemwe watipasa. Lewengani Deuteronomo 16:17, patsogolo pake kambiranani mbvunzo uyu:
-
Mukaganizira vinthu vose vomwe Yahova wakuchitirani imwepo, ko muchalimbikisiwa kumuchitirambo chiyani iye?
5. Kudzipereka kwa Yahova kuchabweresa madaliso yazinji
Wanthu azinji achaganiza kuti kudziwika, basa yabwino, panango kobiri vingawachitise kukhala wokondwa. Mwevi ni shuwadi? Wonesani VIDIYO, pastogolo pake kambiranani mibvunzo aya.
-
Olo kuti womenya bola ule muvidiyo angakonda maninge kumenya bola, ndawa chani iye adasiya basa yake mweyi?
-
Iye adasalula kupereka moyo wake, osati kwa bola, koma kwa Yahova. Ko imwepo munkuwona kuti iye adachita bwino kusalula vimwivi? Ndawa ya chani?
Mtumi Paulo akanati wakhala Mkhrisitu iye wenze na basa yolemekezeka. Iye adapfunzisiwa na ticha munango yemwe wenze wodziwika maninge. Koma iye adasiya vimwivi kuti akhale Mkhrisitu. Ko mtumi Paulo adadzilinga? Lewengani Afilipi 3:8, patsogolo pake kambiranani mibvunzo aya:
-
Ko ndawa ya chani mtumi Paulo adalewa kuti vinthu vomwe iye angachita akanati wakhala Mkhrisitu angaviwona ninge ‘lixo’?
-
Ko ni chani chomwe iye adaphindula m’malo mwake?
-
Ko imwepo mungasiyanisetani kutumikira kwanu Yahova na njira iliyose yomwe mungaphatise basa moyo wanu?
Pomwe Paulo adakhala Mkhrisitu, adaphindula maninge kuposha vomwe adasiya
WANTHU ANANGO ACHATI: ‘Ni vosabveka kupereka moyo wako kwa Mulungu.’
-
Ndawa chani munkuganiza kuti ni vobveka kupereka moyo wanu kwa Yahova?
CHIGWATO
Chikondi chichatilimbikisa kupereka moyo wathu kwa Yahova na kubatizika.
Kubwerezera
-
Ndawa chani tichadekana kutumikira Yahova na moyo wathu wose?
-
Ko Yahova achadalisa tani Mboni zake zobatizika?
-
Ko imwepo mungakonde kudzipereka kwa Yahova?
KUTI MUDZIWE VIZINJI
Onani kuti ndawa chani woimba munango na wothamanga munango adasalula kudzipereka kwa Yahova.
Zimene Achinyamata Amafunsa—Kodi ndidzachite zotani pamoyo wanga?—Zimene Anasankha (6:54)
Onani vifukwa vinango vomwe vingatichitise kuti tidzipereke kwa Yahova.
‘Ndawa chani muchadekana kudzipereka kwa Yahova?’ (Nsanja ya Olonda, 15 Janeiro 2010)
Mu vidiyo ya nyimbo, onani momwe wale adapereka moyo wawo kwa Yahova aliri wokondwa.
Onani chomwe chidalimbikisa nkazi munango kuzindikira vomwe adakayikha pakuyamba moyo wake mu nkhani yakuti “Kwa magole yazinji ningadzibvunza kuti ndawa chani tinamoyo?’”
‘Baibolo ichachinja moyo’ (Nsanja ya Olonda, 1 Novembro, 2012)
