MSOLO 47
Ko ndimwe wokonzeka kubatizika?
Imwepo mwapfunzira vinthu vizinji va Yahova kuchokera pa vomwe mwapfunzira pa pfunziro yanu ya Baibolo. Ndipo pakufika pano mwachita kuchinja kukulu malingana na vomwe mwapfunzira. Panango pangakhale vinthu vinango vomwe vinkukukangisani kuti mudzipereke kwa Yahova na kubatizika. Mu msolo uno tikambirane va vinthu vinango vomwe vichachitikira azinji vomwe vingakuchitiseni kuti mumbazeze kubatizika ndipo tione pomwe momwe mungavipiririre.
1. Ko muchadekana kudziwa vinthu vizinji tani kuti mubatizike?
Kuti mubatizike imwepo muchadekana kukhala ‘na chidziwiso chotewedza cha m’Baibolo.’ (1 Timoteyo 2:4) Mwevi vinkuthandauzalini kuti muchadekana kudziwa midawiro yose ya mibvunzo ya m’Baibolo mukanati mwabatizika. Olo Akhrisitu omwe adabatizika kalekale iwo achapitiriza basi kupfunzira. (Akolose 1:9, 10) Koma imwepo muchadekana kudziwa pfundo zoyambirira zomwe Baibolo ichapfunzisa. Akulu wa mumpingu adzakuthandizeni imwepo kuti adziwe peno munachidziwiso chokwanira.
2. Ko ni njira zinango ziponi zomwe imwepo muchadekana kuchita mukanati mwabatizika?
Mukanati mwabatizika imwepo muchadekana ‘kulapa . . . na kutembenuka.’ (Lewengani Machitidwe 3:19.) Mwevi vinkuthandauza kuti muchadekana kudzibvera tsitsi pamachimo yomwe imwepo mwakhala munkuchita na kukumbira Yahova kuti akukhululukireni. Ndipo muchadekana kukhala wotsimikiza kulamba kuchita makhalidwe yoipa na kukhala na moyo wokondweresa Mulungu. Kuingizira pamwapa imwepo muchadekana kuyamba kuchita basa pabodzi na mpingu ninge kugumanika pamisonkhano na kulalikira ninge wofalisa wosabatizika.
3. Ndawa chani muchadekanalini kubvuma kuti mantha yakukangiseni?
Anango achachita mantha ndawa yakuti ankuona kuti angadzakwaniselini kuchita vomwe adapolomisa Yahova. Shuwadi nthawe zinango imwepo mudzaphonyese vinthu, koma olo amuna na akazi wogumiwa m’Baibolo adaphonyesambo. Ndipo Yahova achadikhiralini kuti atumiki wake akhale wangwiro. (Lewengani Salimo 103:13, 14.) Iye achakondwa maninge mukambachita vomwe mungakwanise! Iye adzakuthandizeni. Ndipomwapa Yahova achakutsimikizirani kuti ‘palibe chomwe chidzatilekanise kuchikonda chake.’—Lewengani Aroma 8:38, 39.
PFUNZIRANI VIZINJI
Onani momwe imwepo mungalimbanirane na mabvuto yanu kuti mubatizike mwakumudziwa bwino Yahova na kubvuma thandizo yake.
4. Mudziweni bwinobwino Yahova
Ko muchadekana kumudziwa tani Yahova mukanati mwabatizika? Imwepo muchadekana kumudziwa mwakukwana na kukomedwa na vomwe iye achakomedwa navo. Wonesani VIDIYO kuti muone momwe wopfunzira baibolo padziko yose yapasi ankuchitira vimwevi. Patsogolo pake kambiranani mbvunzo uyu.
-
Mu vidiyo, ni chani chomwe chathandiza aliyese kukonzekera kubatizika?
Lewengani Aroma 12:2, Patsogolo pake kambiranani mibvunzo aya:
-
Ko imwepo muchakaikira vomwe Baibolo ichapfunzisa panango peno Mboni za Yahova zichapfunzisa chonadi?
-
Peno teno, ko mungachite tani na vimwevi?
5. Malizani vinthu vomwe vichakukangisani kubatizika
Tikapereka moyo wathu kwa Yahova na kubatizika, tose tichagumana na mabvuto. Kuti muone chitsanzo, wonesani VIDIYO, patsogolo pake kambiranani mibvunzo aya.
-
Mu vidiyo, ni chani chomwe Narangerel angadekana kuchita kuti atumikire Yahova?
-
Ko chikondi chake kwa Yahova chidamuthandiza tani kugwebana na mabvuto yake?
Lewengani Miyambo 29:25 na 2 Timoteyo 1:7, patsogolo pake kambiranani mbvunzo uyu:
-
Ko ni chiyani chomwe chingatilimbise moyo kuti tigwebane na mabvuto yathu?
6. Thembani thandizo ya Yahova
Yahova adzakuthandizeni kuti mumukondwerese. Wonesani VIDIYO, ndipo patsogolo pake kambiranani mibvunzo aya.
-
Mu vidiyo, ko ni chani chomwe chidachitisa wopfunzira Baibolo kuti abwerere mbuyo pankhani yobatizika?
-
Ko ni chani chomwe iye adaona chomwe chidamuthandiza kuti apitirize kuthemba kwake Yahova?
Lewengani Yesaya 41:10, 13, patsogolo pake kambiranani mbvunzo uyu:
-
Ko ni chani chomwe chinkukutsimikizirani kuti imwepo mungakwanise kukwanirisa polomisi yomwe mudachita pakudzipereka?
7. Ingizirani kutembeja kwanu chikondi cha Yahova
Mukambatembeja momwe Yahova achawonesera chikondi chake kwa imwepo, mudzaingizire kutembeja kwanu ndipo mudzafune kumutumikira mpaka kalekale. Lewengani Salimo 40:5, patsogolo pake kambiranani mbvunzo uyu:
-
Ko ni madaliso yaponi yochoka kwa Mulungu yomwe imwepo muchayatembeja maninge?
Mneneri Yeremiya angakonda maninge Yahova na mawu yake, ndipo adatembeja maninge mwayi wolalikira va dzina ya Yahova. Iye adati: “Mawu yanu yadanikondweresa ndipo yadakondweresa moyo wangu, pakuti ine nidachemerewa na dzina yanu, imwe Mulungu.” (Yeremiya 15:16) Dawirani mibvunzo aya:
-
Ndawa chani ni mwayi wapadera kukhala Mboni ya Yahova?
-
Ko imwepo munkufuna kubatizika kuti mukhala m’bodzi wa Mboni za Yahova?
-
Ko panachinthu chomwe chinkukukangisani imwepo kuti mubatizike?
-
Ko munkuganiza kuti ni chani chomwe imwepo muchadekana kuchita kuti mukwanirise chakulinga chanu chakubatizika?
WANTHU ANANGO ACHATI: ‘Ninkuwona kuti ningakwaniselini kukwanirisa udindo womwe munthu wobatizika achadekana kukhala nawo.’
-
Ko imwepo muchabvambo teno?
CHIGWATO
Na thandizo ya Yahova imwepo mungakwanise kumalisa bvuto iliyose kuti mubatizike.
Kubwerezera
-
Ko muchadekana kudziwa tani Baibolo kuti mufikane pakubatizika?
-
Ko nikuchinja kuponi komwe muchadekana kuchita mukanati mwabatizika?
-
Ndawa chani muchadekanalini kubvuma kuti mantha yakukangiseni kubatizika?
KUTI MUDZIWE VIZINJI
Onani chifukwa chomwe chingakuchitiseni kuti mubatizike.
‘Ko ndimwe wokonzeka kubatizika?’ (Nsanja ya Olonda, Março 2020)
Onani momwe mungamalizire mantha yanu yomwe yankukubwezani mbuyo.
‘Nichani chomwe chinkunikangisa inepano kuti nibatizike?’ (Nsanja ya Olonda, Março 2019)
Onani momwe mwamuna munango adapiririra mabvuto yake yakuluyakulu kuti abatizike.
Pakuyamba mwamuna munango wochemerewa kuti Ataa angazeza kubatizika. Onani chomwe chidamuthandiza kuti achinje.
