MSOLO 49
Ko banja yanu ingakhale tani yokondwa?—Mbali 1
Wanthu akalowolana achaganiza kuti chimwemwe chawo chipitirize basi patsogolo pa ukwati wawo. Ndipo vingachitikedi. Akhrisitu omwe adalowolana kalekale ndipo akhala ankuyesayesa kuphatisira basa pfundo za m’Baibolo achadziwa kuti vimwivi ni vokwanisika.
1. Ko ni malangizo yaponi yomwe Baibolo ichapereka kwa amuna?
Yahova adayikha amuna ninge msolo wa banja. (Lewengani Aefeso 5:23.) Yahova achadikhira kuti mwamuna ambachite vosalula vomwe vingathandize banja yake. Baibolo ichauza amuna kuti: ‘Pitirizani kukonda akazi wanu.’ (Aefeso 5:25) Ko vimwivi vichathandauza chani? Mwamuna wachikondi achachita vinthu na nkazi wake mwanjira yachikondi, akakhala pamuyi olo pagulu. Achamuteteza ku vinthu voipa ndipo achachita vomwe angakwanise kuti amusamalire mwakuthupi na m’maganizo. (1 Timoteyo 5:8) Vakudekana maninge pa vose iye achatsogolera pa vinthu vauzimu. (Mateyu 4:4) Mwakulinganiza, iye angambapemphere na kulewenga Baibolo pabodzi na nkazi wake. Ndipo mwamuna akakhala kuti ankuchita vinthu mwachikondi na nkazi wake, iye achakhala paushamwali wabwino maninge na Yahova.—Lewengani 1 Petulo 3:7.
2. Ko ni malangizo yanyi yomwe Baibolo ichapereka kwa akazi?
Mawu ya Mulungu yachalewa kuti akazi ‘achadekana kukhala na ulemu ukulu na amuna wawo.’ (Aefeso 5:33) Ko nkazi angachitetani vimwivi? Iye angambaganizire va makhalidwe yabwino na khama yomwe mwamuna wake achachita kuti amusamalire pabodzi na wana wake. Iye angawonese pomwe ulemu mwa kuthandizira vomwe mwamuna wake wachita, na kuyankhula naye mwachikondi olo kuti iye ni wosakhulupirira.
3. Ko olowolana angalimbisetani banja yawo?
Pakulewa va wanthu wolowolana Baibolo ichanena kuti: ‘Awiri awo adzakhale thupi ibodzi.’ (Mateyu 19:5) Mwevi vinkuthandauza kuti iwo achadekana kuchita khama kuti ushamwali wawo ukhale wolimba. Iwo angachite vimwivi mwakukhalira pabodzi nthawe ikulu nkumbayankhula momasuka na kuwuzana vakumoyo mwachikondi. Iwo achadekanalini kubvuma kuti chilichose panango kuti aliyese akhale wodikana maninge pa banja yawo kuposha Yahova. Iwo achakhala wosamala maninge kuti aleke kukulisa ushamwali na wanthu anango.
PFUNZIRANI VIZINJI
Onani pfundo za m’Baibolo zomwe zingalimbise banja yanu.
4. Amuna, kondani na kusamalira bwino akazi wanu
Baibolo ichanena kuti ‘amuna achadekana kukonda azikazi wawo ninge momwe achadzikondera okha.’ (Aefeso 5:28, 29) Ko vimwivi vichathandauza chani? Wonesani VIDIYO, patsogolo pake kambiranani mbvunzo uyu.
-
Ko ni njira zinango ziponi zomwe mwamuna angawonesere kuti achakonda na kusamalira nkazi wake?
Lewengani Akolose 3:12, patsogolo pake kambiranani mbvunzo uyu:
-
Ko mwamuna angawonesetani makhalidwe mwaya m’banja?
5. Akazi kondani na kulemekeza amuna wanu
Baibolo ichalimbikisa akazi kuti ambalemekeze amuna wawo peno iwo achatumikira Yahova panango neye. Lewengani 1 Petulo 3:1, 2, patsogolo pake kambiranani mibvunzo aya:
-
Peno imwepo muna mwamuna yemwe ni wosakhulupirira mosakaika imwepo muchada kuti iyembo ambatumikire Yahova. Ko munkuwona kuti ni chiyani chomwe chingakhale chothandiza maninge—Ko nikumulalikira pafupipafupi panango ni kumuwonesa ulemu mu vochita vanu? Ndawa chani?
Amuna na akazi angachite vosalula vabwino maninge pabodzi. Olo kuti nthawe zinango nkazi angabveranelini navo vomwe mwamuna wasalula. Nkazi achadekana kufotokoza maganizo yake mwaulemu, nkazi achadekana pomwe kuganizira kuti Yahova adapereka udindo kwa mwamuna wake wosalula vinthu vomwe ni vabwino kwa banja yake. Iye angachite vomwe angakwanise pakuthandizira vomwe mwamuna wasalula. Mwakuchita vimwivi iye angathandizire kuti m’banja mukhale malo yabwino na yokomedza. Lewengani 1 Petulo 3:3-5, patsogolo pake kambiranani mbvunzo uyu:
-
Ko Yahova achabvatani nkazi akambawonesa ulemu kwa mwamuna wake?
6. Imwepo mungakwanise kupirira mabvuto ya m’banja mwanu
Palibe banja yomwe ni yangwiro. Ndipomwapa wose m’banja achadekana kuchita khama kuti amalise mabvuto. Wonesani VIDIYO, patsogolo pake kambiranani mibvunzo aya.
-
Mu vidiyo, ko ni vizindikiro viponi vomwe vingawonesa kuti aliyese m’banja angachita vinthu payekha?
-
Ko ni chani chomwe iwo achita kuti alimbise banja yawo?
Lewengani 1 Akorinto 10:24 na Akolose 3:13. Mukamaliza kulewenga lemba iliyose, kambiranani mbvunzo uyu:
-
Ko kuphatisira basa malangizo mwaya kungalimbise tani banja?
Baibolo ichanena kuti tichadekana kulemekezana. Kulemekezana kuchaphatanidzapo kuchitirana vinthu mwachifundo na mwaulemu. Lewengani Aroma 12:10, patsogolo pake kambiranani mibvunzo aya:
-
Ko nkazi panango mwamuna achadikhira kuti mwanzake wa muwukwati ayambe ndiye kumulemekeza? Ndawa chani?
WANTHU ANANGO ACHATI: ‘Ine na mwanzangu wa muwukwati tinkukondanalini maninge ninge mwevenzere pakuyamba.’
-
Ko imwepo mungalewe chani pakufuna kuwawuza kuti Baibolo ingawathandize?
CHIGWATO
Mwamuna na nkazi angakhale wokondwa akakhala kuti ankukondana, kulemekezena na kuphatisa basa pfundo za m’Baibolo.
Kubwerezera
-
Ni chani chomwe mwamuna angachite kuti athandizire kuti banja ikhale yokondwa?
-
Ni chani chomwe nkazi angachite kuti athandizire kuti banja ikhale yokondwa?
-
Peno imwepo muli pabanja ni pfundo iponi ya m’Baibolo yomwe ingakuthandizeni kuti mulimbise banja yanu?
KUTI MUDZIWE VIZINJI
Onani pfundo zomwe zingakuthandizeni imwepo kukhala na banja yokondwa.
Nyang’anirani vidiyo ya nyimbo yomwe inkufotokoza va madaliso yakuluyakulu yobwera ndawa yophatisira basa malangizo ya Mulungu m’banja.
Onani kuti ko kukhala wogonjera kwa mwamuna ninge msolo kuchathandauza chani.
‘Ndawa chani akazi achadekana kugonjera mwamuna ninge msolo?’ (Nsanja ya Olonda ya 15 Maio, 2010)
Ko banja inango idamalisa tani mabvuto yakulu, kuphatanidzapo kumala kwa banja yawo?
