MSOLO 50

Ko Banja yanu ingakhale tani yokondwa—Mbali 2

IMBISANI

Wana ni mphaso yochokera kwa Yahova. Ndipo iye achadikhira kuti azibereki aisamalire bwino mphaso mweyi. Yahova adapereka malangizo yanzeru yomwe yangathandize azibereki kuti akwanise kuchita vimwevi. Malangizo yake yangathandize pomwe wana kuti athandizire kuti banja ikhale yokondwa.

1. Ko ni malangizo yaponi yomwe Yahova achapereka kwa azibereki?

Yahova achadikhira kuti azibereki ambakonde wana wawo na kukhala nawo pabodzi kwa nthawe itali momwe angakwanisire. Iye achada pomwe kuti azibereki ambateteze wana wawo kuvinthu voipa na kuphatisira basa pfundo za m’Baibolo kuti awapfunzise bwino. (Miyambo 1:8) Iye achawuza azibereki kuti: ‘Pitirizani kupfunzisa wana wanu munjira ya Yahova.’ (Lewengani Aefeso 6:4.) Yahova achakondwa maninge akambawona azibereki ankutewedza malangizo yake pomwe ankulera wana wawo ndipo achatengalini udindo moyu nkupereka kwa anango.

2. Ko ni malangizo yaponi yomwe Yahova achapereka kwa wana?

Yahova achalangiza wana kuti: ‘Bverani azibereki wanu.’ (Lewengani Akolose 3:20.) Wana akambabvera na kulemekeza azibereki wawo achachitisa Yahova na azibereki wawo kukhala wokondwa. (Miyambo 23:22-25) Yesu adapereka chitsanzo chabwino maninge pomwe wenze mwana. Olo kuti iye wenze wangwiro iye ambabvera na kulemekeza azibereki wake.—Luka 2:51, 52.

3. Ko imwepo mungafenderere tani Mulungu ninge banja?

Peno imwepo ndimwe m’bereki mosakaika muchada kuti wana wanu ambakonde Yahova ninge momwe imwepo munkuchitira. Ko mungakwanirise tani chakulinga chimwechi? Mwakuchita vomwe Baibolo ichanena: ‘Mumbakhomereze [Mawu ya Yahova] mwa wana wanu ndipo mumbayankhule nawo mukakhala pasi nyumba mwanu na mukambafamba pa msewu.’ (Deuteronomo 6:7) ‘Kukhomereza’ kuchathandauza kupfunzira mobwerezabwereza chinthu chinango. Ndipomwapa imwepo muchadekana kubwerezabwereza chinthu chomwe wana wanu angadzachiyebwelini. Mwevi vichathandauza kuti imwepo muchadekana kunyang’ana mwayi woyankhula pafupipafupi va Yahova na wana wanu. Ninzeru yabwino kupatula nthawe sondo iliyose yochita pfunziro ya pabanja. Peno imwepo mulibe wana, mungaphindule kukhala na nthawe sondo iliyose yopfunzira mawu ya Mulungu.

PFUNZIRANI VIZINJI

Onani mpfundo zinango zomwe zingathandize kuti banja ikhale yokondwa na yotetezeka.

4. Apfunziseni wana wanu mwachikondi

Kupfunzisa wana ni basa ikulu. Ko Baibolo ingakuthandizeni tani? Lewengani Yakobo 1:19, 20, patsogolo pake kambiranani mibvunzo aya:

Ko azibereki angawonesetani chikondi akambayankhula na wana wawo?
Ndawa chani azibereki achadekanalini kulangiza wana wawo akakhala kuti alikalipe? a

5. Tetezani wana wanu

Tetezani wana wanu, ndipo nivakudekana maninge kukambirana na wana wanu va nkhani yogonana adakali wana. Nthawe zinango vimwivi vingakhale voshupa. Wonesani VIDIYO, patsogolo pake kambiranani mibvunzo aya.

VIDIYO: Tetezani wana wanu ku vinthu voipa (2:58)

Ko bvuto ichakhala iponi kwa azibereki anango akafuna kuyankhula na wana wawo pankhani ya kugonana?
Ni mwanjira yanyi yomwe azibereki anango achafotokozera wana wawo va nkhani yogonana?

Ninge mwavidalosererewa, dziko ya satana iyi inkuyenda inkuyipiraipira. Lewengani 2 Timoteyo 3:1, 13, patsogolo pake kambiranani mbvunzo uyu:

Anango mwa wanthu oipa omwe afotokozewa mu vesi yake ya 13 achaphatanidzapo wanthu omwe achachitira vinthu voipa wana. Ndawa chani nivakudekana kuti azibereki ambawafotokozere wana nkhani yogonana na momwe angambadzitetezere kwa wanthu omwe achaponderera wana?

Ko munkudziwa?

Mboni za Yahova zichakonza vinthu vizinji vomwe vichathandiza azibereki kupfunzisa wana wawo pankhani ya kugonana na kuwateteza kwa wanthu omwe achaponderera wana. Mwakulinganiza, onani:

6. Lemekezani azibereki wanu

Wana pabodzi na alumbwana achadekana kuonesa ulemu kwa azibereki wawo mwa kuyankhula nawo. Wonesani VIDIYO, patsogolo pake kambiranani mibvunzo aya.

VIDIYO: Ko ningayankhule tani na azibereki wangu? (2:19)

Ndawa chani ni vaphindu kwa wana kuyankhula mwaulemu na azibereki wawo?
Ko alumbwana angayankhule tani na azibereki wawo munjira yowonesa kuwalemekeza?

Lewengani Miyambo 1:8, patsogolo pake kambiranani mbvunzo uyu:

Ko achilumbwana angachitetani azibereki wawo akawapasa malangizo?

7. Tumikirani Yahova ninge banja

Mabanja ya Mboni za Yahova achakhala na nthawe sondo iliyose yopfunzirira pabodzi. Ko pfunziro ya banja mweyi ichadikana kumbakhala tani? Wonesani VIDIYO, patsogolo pake kambiranani mibvunzo aya.

VIDIYO: Pfunziro ya banja—Mabvuto na madaliso yake (8:04)

Ko banja ingakhale tani na pologalama yopfunzira Baibolo nthawe zose?
Ko ni chani chomwe azibereki angachite kuti pfunziro ya banja ikhale yokomedza na yabwino?—Onani foto yoyamba mu msolo uno.
Ko ni chani chomwe chichakhala choshupa kuti muchitire pabodzi pfunziro ya Baibolo?

Mu nthawe ya Aizirayeli, Yahova angafuna kuti mabanja yambakambirane pafupifupi malemba. Lewengani Deuteronomo 6:6, 7, patsogolo pake kambiranani mbvunzo uyu:

Ko imwepo mungaphatise tani basa mpfundo mweyi?

Vamungachite pa pfunziro ya banja:

Kukonzekera misonkhano ya mpingu.
Kulewenga na kukambirana nkhani za m’Baibolo na banja yanu zomwe ni zokomedza.
Peno imwepo munawana ang’onoang’ono, bulusani panango dindani masenzeka yomwe yachagumanika pa jw.org.
Peno imwepo munawana wachilumbwana, kambiranani nkhani za chilumbwana pa jw.org.
Kambiranani nkhani za m’Baibolo na wana wanu.
Nyang’anirani na kukambirana vidiyo za pa jw.org. Watch and discuss a video on jw.org.

WANTHU ANANGO ACHATI: ‘Baibolo ni yoshupa maninge kwa wana.’

Ko imwepo mungalewe chani?

CHIGWATO

Yahova achada kuti azibereki ambakonde, kupfunzisa na kuteteza wana wawo, ndipo achada kuti wana ambalemekeze na kubvera azibereki wawo, ndipo banja yose imbatumikire Yahova.