MSOLO 52
Ndawa chani tichadekana kuganizira momwe tichavalira momwe tinkuwonekera?
Aliyese waise anavosalula vosiyanasiyana pankhani ya kavalidwe na kudzikhuzisa. Koma tikambatewedza mpfundo za m’Baibolo, tichasalula osati vokondweresa ise tekha koma vomwe vingakondwerese pomwe Yahova. Naboni tikambirane zinango mwa mpfundo mwezi.
1. Ko ni mpfundo iponi yomwe ichadekana kutitsogolera pakusalula vovala na kudzikhuzisa?
Tichadekana kusalula vovala ‘munjira yakudzichepesa na moganizira anango,’ na kupititiriza kukhala na maonekedwe yochena yomwe yachawonesa kuti ndise ‘wodzipereka kwa Mulungu.’ (1 Timoteyo 2:9, 10) Ganizirani mpfundo zinayi izi: 1) Vovala vathu vichadekana kukhala ‘voyenerera.’ Peno imwepo mudaikhirako nzeru pamisonkhano ya mpingu, wanthu wa Yahova anavosalula vosiyanasiyana, koma kavalidwe kathu na kapfekulidwe kathu ka tsitsi kachawonesa ulemu kwa Mulungu wathu yemwe tichamutumikira. 2) ‘Kuvala modzichepesa’ kuchathandauza kuti maonekedwe yathu yachadekanalini kuchitisa wanthu kuganizira va chigololo, panango kundoganizira va ise tekha. 3) Tichawonesa kuti ‘tinkuvala mwanzeru’, tikaleka kutewedzera mafasho yakudziko pabodzi na kudzikhuzisa kwake. 4) Kaonekedwe kathu, nthawe zose kachadekana kuwonesa kuti ndise ‘wodzipereka kwa Mulungu’, na kuwonesa anango kuti tichatumikira Mulungu chaiye.—1 Akorinto 10:31.
2. Ko maonekedwe yathu yangakhudze tani Akhrisitu anzathu?
Olo kuti aliyese wa ise anaufulu pa vomwe achada kuvala, tichadekana kuganizira momwe maonekedwe yathu yangakhudzire anango. Tichayesesa kuchita vose vatingakwanise kuti tileke kukhumudwisa anango koma m’malo mwake, ‘timbaganizire vofuna va anzathu kuti tiwalimbikise.’—Lewengani Aroma 15:1, 2.
3. Ko momwe tichaonekera vingalimbikise tani anango kufuna kukhalambo mu chipembedzo chaicho?
Tichayesesa kuvala vovala voyenerera pa vochitika vilivose, tikambagumanika pamisonkhano ya mpingu na tikambalalikira tichawonesesa kuti tavala bwino. Tikufuna kuti wanthu ambayikhire nzeru pa ntontholo wathu womwe tinkulalikira osati momwe tinkuwonekera. Ndipo maonekedwe yathu yangachitise kuti wanthu akopeke na chonadi chathu ‘kuti akomesere chipfunziso cha mpulumusi wathu Mulungu.’—Tito 2:10.
PFUNZIRANI VIZINJI
Onani momwe tingakhalire wotsimikizira kuti vovala vathu na maonekedwe yathu nivoyenerera ninge Akhrisitu.
Kaonekedwe kathu kachawonesa kuti peno tichalemekeza wanthu omwe anamaudindo. Olo kuti Yahova achawona vomwe vili mu mtima mwathu, kaonekedwe kathu kachadekana kuonesa pomwe kuti peno tichamulemekeza iye
4. Maonekedwe yabwino yachawonesa kuti yachalemekeza Yahova
Ko ni ndawa ikulu iponi yomwe tichadekanirana kusamala na maonekedwe yathu? Lewengani Salimo 47:2, ndipo patsogolo pake kambiranani mibvunzo aya:
-
Ko tingasalule vovala vakhaindi yanyi tikaganizira kuti maonekedwe yathu yachitisa wanthu kuganizira va Yahova?
-
Ko imwepo munkuganiza kuti ni vabwino kuganizira va maonekedwe yathu tikakhala pamisonkhano yampingu na kulalikira? Peno nteno, ndawa chani?
5. Ko tingasalule tani bwino pankhani ya vovala na kudzikhuzisa?
Peno vovala vathu ni vodula peno nivosadula, nthawe zose vichadekana kukhala vochena na voyenerera mobverana na chochitika chilichose chomwe tili. Lewengani 1 Akorinto 10:24 na 1 Timoteyo 2:9, 10. Patsogolo pake kambiranani kuti ndawa chani tichadekana kupewa kuvala vovala vomwe ni . . .
-
vopsyipa na vosawoneka bwino.
-
vothina maninge vochitisa anango kuganizira va chigololo.
Olo kuti Akhrisitu manjewuno achatewedzeralini chilamulo cha Mose, koma chichatithandiza kudziwa vomwe Yahova achaganiza. Lewengani Deuteronomo 22:5, ndipo patsogolo pake kambiranani mbvunzo uyu:
-
Ndawa chani tichadekana kupewa vovala panango kudzikhuzisa kochitisa kuti mwamuna awoneke ninge nkazi panango nkazi awoneke ninge mwamuna?
Lewengani 1 Akorinto 10:32, 33 na 1 Yohane 2:15, 16, ndipo patsogolo pake kambiranani mibvunzo aya:
-
Ndawa chani tichadekana kusamala kuti peno mawonekedwe yathu yachakhumudwisa omwe tichakhala nawo kudera yathu panango anzathu mumpingu?
-
Ko ni khaindi yanyi yakavalidwe na kudzikhuzisa komwe ni kodziwika maninge mu dera yanu?
-
Ko munkuganiza kuti yanango mwa mafasho mwaya niyosayenerera kwa Akhrisitu? Peno nteno ndawa chani?
Tingavale na kudzikhuzisa munjira zosiyanasiyana koma nkupitiriza basi kutamanda Yahova
WANTHU ANANGO ACHATI: ‘Ninaufulu wosalula vomwe nichada kuvala.’
-
Ko imwepo munkubverana navo vimwevi? Peno nteno, ndawa chani?
CHIGWATO
Tikambachita vosalula vabwino pankhani ya maonekedwe yathu tichawonesa kuti tichakonda Yahova na anango.
Kubwerezera
-
Ndawa chani kuvala kwathu na kudzikhuzisa nikodekana maninge kwa Yahova?
-
Ko ni pfundo zinango ziponi zomwe zichadekana kutitsogolera pankhani ya maonekedwe yathu?
-
Ko maonekedwe yathu yachakhudza tani anango momwe achawonera kupemphera chaiko?
KUTI MUDZIWE VIZINJI
Onani kuti ko vovala vanu vichafotokoza ntontholo wotani.
Onani kudikana koganiza mukanati mwadzinembanemba.
‘Ko Baibolo ichanena chani pankhani ya kudzinembanemba?’ (Nkhani ya pa intaneti)
Onani pfundo zinango zoingizira zomwe zingatithandize pakuchita vosalula.
‘Ko kavalidwe kanu kachalemekeza Yahova?’ (Nsanja ya Olonda ya Setembro, 2016)
Ko nkazi munango adakhala tani na maganizo yabwibo pankhani ya momwe anango angadzikhuzisira?
‘Kuvala na kudzikhuzisa chenze chiyeso changu’ (Galamukani! ya 22 Dezembro, 2003)
