Tikakhala kuti tilipakati pa wokhulupirira anzathu, tichabva ninge momwe Mpfumu Davide adabvera iye adati: ‘Nivabwino ndipo ni vokomedza maninge abale akakhala pabodzi mobverana!’ (Salimo 133:1) Ngwirizano wathu sikuti undochitikambo mwangozi neye. Aliyese wa ise achachita khama kuti awukhazikise.

1. Ko ni chinthu chiponi chomwe ni chosayebweka pakati pa wanthu wa Mulungu?

Peno imwepo mudayendako kale kumisonkhano ya mpingu ku dziko inango, panango imwepo mumbabvalini chiyankhulidwe chawo, koma iwo adakutambirani na moyo wose. Ndawa chani? Ndawa yakuti kulikose tichapfunzira Baibolo mwakuphatisira basa mabukhu yolingana. Ndipo tichayesesa kuwonesa chikondi kwa anzathu. Vilibe basa komwe tichakhala, tose ‘tichachemera pa dzina ya Yahova, na kumutumikira mobverana.’—Zefaniya 3:9.

2. Ko imwepo mungachite chani kuti mukhazikise ngwirizano?

‘Kondanani kuchokera pasi pa moyo.’ (1 Petulo 1:22) Ko mungaphatise tani basa malangizo mwaya? M’malo moyikhira nzeru pa vophonya va anango, yesesani kuwona makhalidwe yawo yabwino. M’malo mokhala na wale okha omwe muchachita nawo chidwi, yesesani kudziwa abale na alongo wochokera m’vikhalidwe vosiyanasiyana. Tingayesese pomwe kuchita khama kuchosa chidani chilichose chomwe tingakhale nacho mu m’moyo mwathu.—Lewengani 1 Petulo 2:17. a

3. Ko imwepo mungachite tani peno mwapesana mawu na Nkhrisitu mwanzanu?

Ndise wobverana, komasoti ndise wanthu tilibe ungwiro. Nthawe zinango tingakhumudwisane na mwanzathu. Mawu ya Mulungu yachatiwuza kuti ‘pitirizani . . . kukhululukirana,’ yachayingizira pomwe kuti: ‘Ninge momwe Yahova adakukhululukirani na moyo wose, imwepombo muchadekanambo kukhululukirambo anango.’ (Lewengani Akolose 3:13.) Isepano tichamuphonyera Yahova maulendo yosawerengeka, koma iye achatikhululukira basi. Ndipo iyembo achadikhira kuti isembo timbakhululukire abale wathu. Tikazindikira kuti takhumudwisa munango, tichadekana kuyamba ndise kukhazikisa ntendere.—Lewengani Mateyu 5:23, 24. b

 PFUNZIRANI VIZINJI

4. Malisani mtima woonana kuipa

Tichada kukonda abale wathu wose. Koma nthawe zinango vingatishupe kukonda wanthu omwe ndise wosiyana nawo chikhalidwe. Ko ni chani chomwe chingathandize? Lewengani Machitidwe 10:34, 35, ndipo patsogolo pake kambiranani mibvunzo aya:

• Yahova achatambira wanthu wakhaindi iliyose kuti akhale Mboni zake. Ko vimwivi vichadekana kutikhudza tani na wanthu omwe niwochokera madziko yanango yosiyana na yathu?

• Ko nikuzondana kuponi komwe kulipo kudera yanu komwe imwepo muchadekana kukupewa?

Lewengani 2 Akorinto 6:11-13, ndipo patsogolo pake kambiranani mbvunzo uyu:

• Ko imwepo mungapfunzire tani kukonda abale na alongo wanu wa m’madziko yosiyanasiyana?

5. Khululukiranani na moyo wose ndipo khazikisani ntendere

Yahova achatikhululukira na moyo wose olo kuti isepano tichadekanalini kumukhululukirambo. Lewengani Salimo 86:5, ndipo patsogolo pake kambiranani mibvunzo aya:

• Ko Yahova achakhululukira mpaka paponi?

• Ndawa chani imwepo ndimwe wotembeja maninge ndawa yokhululuka kwake?

• Ko ni vochitika viponi vomwe vingachitise kukhala voshupa maninge kwa ise wanthu kuti tikhululukirane?

Ko tingatewedzere tani Yahova mwa kupitiriza kubverana na abale na alongo wathu? Lewengani Miyambo 19:11, ndipo patsogolo pake kambiranani mbvunzo uyu:

• Munthu munango akakukhumudwisani, ni chani chomwe imwepo mungachite kuti muchitise vinthu kukhala bwino?

Nthawe zinango tichakhumudwisa anango. Vimwivi vikachitika, tichadekana kuchita chani? Wonesani VIDIYO, ndipo patsogolo pake kambiranani mbvunzo uyu.

• Mu vidiyo, ko mulongo ule ni chani chomwe iye wachita kuti akhazikise ntendere?

 CHIGWATO

Imwepo mungathandize kuti mumpingu mupitirize kukhala na ngwirizano mwakupitiriza kukhululukira anango na kuwakonda.

Kubwerezera

• Ko mungachite tani kuti musambawawone kuipa abale na alongo wanu?

• Ko ni chani chomwe imwepo mudzachite mukadzakhala kuti mwakhumudwisana na Mkhrisitu mwanzanu?

• Ndawa chani tichadekana kutewedzera chitsanzo cha Yahova pankhani yokhululukira anango?