PFUNZIRO 03
Ko mungaikhulupirire Baibolo?
Baibolo ichapolomisa vinthu vizinji vabwino vakutsogolo ndipo ichapereka malangizo. Panango mungakhale na chidwi kuti mudziwe vomwe iyo ichanena. Koma pabodzibodzipo mungakhale na mibvunzo. Ko imwepo mungakhulupirire mapolomisi na malangizo ya m’bukhu ya kale-kale? Ko tingakhulupiriredi Baibolo va kukhala na moyo wokondwa manjeuno na kutsogolo? Wanthu mamidyau yazinji achawona kuti ni vodekana. Ko imwepo mungakhulupirirembo vimwevi?
1.Ko nkhani za m’Baibolo zidachitikadi?
Baibolo ichanena kuti onemba adanemba ‘molondola mawu ya choonadi.’ (Mlaliki 12:10) Baibolo ichafotokoza vochitika chaivo na wanthu chaiwo. (Lewengani Luka 1:3; 3:1, 2.) Wanthu azinji wonemba mbiri na ofukula vakale, achanena kuti Baibolo ikambanena va madata, wanthu, malo na vochitika, vichakhaladi chaivo.
2.Ndawa chani tingakhulupirire Baibolo podiya kuti ni yakalekale?
Baibolo ni bukhu yakuti munjira zizinji idafotokoza vinthu votsogola. Mwakulinganiza, iyo ichanena nkhani zinango za sayantsi. Pomwe Baibolo idanembewa, wanthu azinji ambakhulupiralini vomwe iyo inganena pankhani mwezi. Koma manjeuno sayantsi ichakhulupirira kuti vomwe Baibolo ichanena ni chaivo. Mawu yake ‘ni yothembeka manjeuno mpakana kale-kale.’—Salimo 111:8.
3.Ndawa chani tingakhulupirire vomwe Baibolo ichanena vakutsogolo?
Baibolo ichasimba va maulosi * yofotokoza ‘vinthu vomwe vikanati vachitika.’ (Yesaya 46:10) Mwakulinganiza, vinthu vizinji vomwe vidachitika pamoyo wa wanthu, venze vidanembewa kale m’Baibolo. Baibolo idafotokoza bwino-bwino momwe dziko idzakhalire munthawe ino. Mu pfunziro mwaino, tidziwe yanango mwa maulosi ya m’Baibolo. Kuwona momwe maulosi mwaya yadakwanirisikira ninga momwe Baibolo idanenera, ni vopasa chidwi!
PFUNZIRANI VIZINJI
Onani momwe sayantsi manjeuno inkubveranirana na Baibolo, ndipo fagani-fagani maulosi yanango yopasa chidwi.
4. Sayantsi inkubverana na Baibolo
Munthawe zakale, wanthu azinji ambakhulupirira kuti dziko imbadjirikiriwa pa chinthu chinango. Wonesani VIDIYO.
Wonani vomwe vidanembewa m’bukhu ya Yobu magole 3.500 kumbuyo. Lewengani Yobu 26:7, ndipo kambiranani mbvunzo uyu:
-
Ndawa chani nivopasa chidwi Baibolo kunena kuti dziko ili ‘kolowekewe munlengalenga’?
Wanthu adadzabvesa bwino-bwino vomwe vichachitika kuti nvula igwe magole 200 kumbuyo. Koma ni vinthu vomwe Baibolo yenze idaleweratu magole mamidyau yazinji kumbuyo. Lewengani Yobu 36:27, 28, ndipo kambiranani mibvunzo aya:
-
Ndawa chani vomwe vichachitika kuti titambire madzi ni vochitisa chidwi?
-
Ko malemba yamwalewenga aya, yakuchitisani kuti mumbakhulupirire maninge Baibolo?
5. Baibolo idafotokozeratu vochitika vapadera
Lewengani Yesaya 44:27–45:2, patsogolo pake kambiranani mbvunzo uyu:
-
Kukali magole 200, ko Baibolo idafotokozeratu chani va momwe Babulo adzachenekerewe?
Mbiri ichawonesa kuti Koresi Mpfumu ya ku Perisiya na masocha yake, adacheneka thaundi ya Babulo mu gole ya 539 Yesu akanati wabwera. Iwo adakhonesa madzi yomwe yenze nkamadzi komwe kangateteza thaundi, ndipo adangena vitseko viri fungule. Ndawa ya vimwevi, iwo adacheneka Babulo mosashupa. Manjeuno, papita magole yoposha 2.500 Babulo ali kale matongwe. Onani vomwe Baibolo idaneneratu.
Lewengani Yesaya 13:19, 20, ndipo kambiranani mbvunzo uyu:
-
Ko ulosi moyu udakwanirisika tani?
Matongwe ya Babulo ntsiku zino ku Iraque
6. Baibolo yenze idanena kale vinthu vomwe tinkuwona ntsiku zino
Baibolo ichatiuza kuti tinkukhala mu ‘ntsiku zomalizira.’ (2 Timoteyo 3:1) Onani vomwe Baibolo idaneneratu va ntsiku zomalizira.
Lewengani Mateyu 24:6, 7, ndipo kambiranani mbvunzo uyu:
-
Ko Baibolo idafotokoza kuti nchani chomwe chidzachitike mu ntsiku zomalizira?
Lewengani 2 Timoteyo 3:1-5, ndipo patsogolo pake kambiranani mibvunzo aya:
-
Ko Baibolo idafotokoza kuti wanthu adzakhale na makhalidwe yanyi mu ntsiku zomalizira?
-
Pa makhalidwe yoipa mwaya, ni yaponi yamunkuwona kuti yankukwanirisika??
WANTHU ANANGO ACHATI: ‘Baibolo ni bukhu ya vinzano na nkhani zopeka.’
-
Kuwonambo kwanu, nchani chikutsimikizira kuti Baibolo ichalewa chaivo?
CHIGWATO
Mbiri, sayantsi na maulosi, vose vingakuthandizeni kuti mumbakhulupirire Baibolo.
Kubwerezera
-
Ko nkhani zosimbiwa m’Baibolo zidachitikadi?
-
Ko ni vitsanzo viponi vomwe vinkuwonesa kuti sayantsi ni yobverana na Baibolo?
-
Ko munkukhulupirira kuti Baibolo ingalewedi vakutsogolo? Ndawa chani mwadawira tene?
KUTI MUDZIWE VIZINJI
Ko wasayantsi adagumanako kale chinthu chotsutsana na Baibolo?
‘Ko sayantsi ni yobverana na Baibolo?’ (Nkhani ya pa intaneti)
Nchani chikutsimikizira kuti tiri mu ntsiku zomalizira?
‘Maulosi 6 yomwe yankukwanirisika ntsiku zino’ (Nsanja ya Olonda ya 1 Maio, 2011)
Onani momwe maulosi ya m’Baibolo yadakwanisikira ku ulamuliro wa Agiriki.
Onani momwe maulosi ya m’Baibolo yadachinjira kaganizidwe ka mwamuna munango pa momwe angawonera Baibolo.
‘Inepano nimbakhulupiriralini kuti Mulungu aliko’ (Nsanja ya Olonda Na. 5 2017)
^ ndi. 9 Maulosi ni mawu ya Mulungu yonena vakutsogolo.
