Bukhu yakuti: Malemba yotithandiza pa moyo wathu wachikhrisitu imbakuthandizeni imwepo kuti mumbagumane mavesi na nkhani za m’Baibolo zomwe zingakhale zothandiza kuti mukwanise kugwebana na mabvuto ya ntsiku na ntsiku. Bukhu mweyi ikuthandizeni pomwe kuti mumbakwanise kugumana mavesi ya m’Baibolo yomwe yangakuthandizeni kulimbikisa anango na kuwathandiza kuti akwanise kusankhula vinthu vomwe vingalemekeze Yahova. Mukandoti mwayigumana nkhani yomwe munkufuna, basi mbalekani kuti mibvunzo na tuvigwato twa nkhani za m’Baibolo tukutsogolereni. (Onani bokosi yakuti “ Momwe mungaphatisire basa bukhu mweyi.”) Mosachebwa imwepo mungakwanise kugumana Malemba yabwino yomwe yangakulimbikeseni na kukupasani malangizo. Mudzakwanise pomwe kugumana nkhani zomwe mungauzembo wanthu anango, malemba ya m’Baibolo yomwe yangakukondwereseni, kukuthandizani pa mabvuto yomwe munkugumana nayo, kukupasani malangizo na kukulimbikisani.

Sikuti bukhu mweyi inamalemba yothandiza pa nkhani zose. Koma ni poyambira pabwino peno munkufuna kufagafaga nkhani inango. (Miy 2:1-6) Kuti mudziwe vizinji phatisirani basa referências cruzadas na notas de estudo da Tradução do Novo Mundo da Bíblia Sagrada. Ndipo kuti mupfunzire vizinji pa nkhani ya matanthauzo ya Malemba ya m’Baibolo na momwe mungayaphatisire basa, phatisirani basa Bukhu yofagira ya Mboni za Yahova panango Índice das Publicações da Torre de Vigia onani pomwe vofalisa vomwe vakonzewa manjemanje kuti mutsimikizire kuti peno munkubvesadi chonadi cha m’Malemba.

Tinkudikhira kuti bukhu mweyi yakuti Malemba yotithandiza pa moyo wathu wachikhrisitu ikuthandizeni imwepo kuti mukwanise kugumana nzeru, kudziwa vinthu, na kubvesa vomwe viri m’malemba yochena. Pomwe munkuphatisira basa bukhu mweyi, imwepo mudzayingizire chitsimikizo chanu chakuti Mawu ya Mulungu ni ni yamoyo na yamphanvu.”—Ahe 4:12.