Mu vipembedzo vose, achagumanika wanthu anango womwe achafunisisa kukondweresa Mulungu. Ndipo Mulungu, achawaganizira wanthu mwawa. Tsono vipembedzo vinkuchita vinthu voyipa maninge. (2 Akorinto 4:3, 4; 11:13-15) Manyunzipepa yachanena kuti, matchetchi yachapindira mu nkhondo na ugananga. Nthawe zizinji abusa, abishopu na atsogoleli wa matchetchi achagona na wana adiki. Wanthu womwe achakonda Mulungu, vichawayipira mwevi. — Lewengani Mateyu 24:3-5, 11, 12.

Kuyingizira mwapa, vipembedzo vonama vichapfunzisa vabodza pankhani za Mulungu na wanthu womwe adafa. Kumoku ni kusowa ulemu na Mulungu. Yahova achada kuti wanthu adziwe chowonadi. Chipembedzo chayicho-yicho chichapfunzisa va m’Baibolo. — Lewengani Ezekieli 18:4; 1 Timoteyo 2:3-5.

Tsontsono Mulungu adzachenekeretu vipembedzo vose vabodza. Iye achawona vose vichachitika mu vipembedzo. Lekani kunamiziwa na vomwe achanena, ndawa achachitalini vomwe Mulungu achada. (Yakobo 4:4) Baibolo yichati vipembedzo vose vabodza ni Babulo Mkulu, ndipo adzavicheneke. Babulo yenze dzina ya thawundi yinango yakale-kale, mu nthawe za Nowa. Mu thawundi mweyi ndimo mudayambira vipembedzo vabodza, pachidapera chigumula cha Nowa. — Lewengani Chivumbulutso 17:1, 2, 5, 16, 17; 18:8.

Ko chidzachitike n’chani kwa wanthu womwe ali mu chipembedzo chabodza, koma achada kuchita vomwe Mulungu achada? Yahova alibe kuwaduwala. Iye ankuwapasa mpata kuti apfunzire Baibolo, nakuti achokeretu ku vipembedzo mwevi. — Lewengani Mika 4:2, 5.

Yahova ankuwuza wanthu wose womwe achada kupfunzira chowonadi kuti achoke mu chipembedzo chabodza. Iye achawaganizira maninge wanthu mwawa. Wose womwe achakonda Mulungu, achabvuma kuchita vachanena iye. — Lewengani Chivumbulutso 18:4.

Kalekale, wanthu azinji adapfunzira ntontholo wabwino wa Mulungu, womwe atumi angapfunzisa. Iwo adapfunza momwe angakondweresere Yahova, ndipo adakhala na chidikiro chabwino cha kutsogolo. Isepano, tingachitembo vomwe iwo adachita. Kubvera Yahova ni chinthu chakudikana maninge pa moyo wathu. — Lewengani 1 Atesalonika 1:8, 9; 2:13.

Yahova achafunisisa kuti wanthu womwe ali mu vipembedzo vabodza abule, n’kubwera mu banja yake ya chikondi. Imwepo mukachita mwevi, mudzakhale shamwali wa Yahova, nkukhala mu gulu yake na kudzagumana moyo wosapera. — Lewengani Maliko 10:29, 30; 2 Akorinto 6:17, 18.

Ntontholo wabwino ni wakuti vipembedzo vabodza vidzachenekewe, pamwapo wanthu wose adzamasukiretu. Palibe adzanamiziwe soti. Wose adzapemphere kwa Mulungu chayiye-yiye m’bodzi yekha, munjira yomwe iye achada. — Lewengani Chivumbulutso 18:20, 21; 21:3, 4.