PFUNZIRO 14
Ndawa yanyi Mulungu anagulu yake?
1. Ndawa yanyi Mulungu adasalula mtundu wa Aizilayeli?
Mulungu adanena kuti banja ya Abulahamu idzakule nkukhala wanthu azinji. Banja mweyi idachemerewa kuti Aizilayeli. Mulungu adasalula wanthu mwawa kuti ambamutumikire. Iwo angadikana kuti ambabvere malamulo ya Mulungu nkumbamutumikira mu njira yabwino. (Salimo 147:19, 20) Wanthu wose anango adakabatsiriwa na Mulungu kuchoka kwa mwawa Aizilayeli. — Lewengani Genesis 22:18.
Mulungu adasalula Aizilayeli kuti akhale Mboni zake. Wanthu anango adakamudziwa Mulungu kuchokera kwa Aizilayeli. Mbiri ya wanthu mwawa yichawonesa kuti kubvera Mulungu nkwabwino. — Deuteronomo 4:6; Lewengani Yesaya 43:10, 12.
2. N’viti vinkuwonesa kuti gulu ya Mulungu niyogwirizana?
Kupinda kwa nthawe, Aizilayeli adaleka kubvera Mulungu. Yahova alibe kufunasoti kuti Aizilayeli akhale Mboni zake. Mulungu adasalula mtundu munango wa wanthu. (Mateyu 21:43; 23:37, 38) Manjewuno Mulungu achaphatisa basa akhrisitu chayiwo-yiwo kuti akhale mboni zake. — Lewengani Machitidwe 15:14, 17.
Yesu adakonzekeresa wopfunzira wake kuti akapfunzise wanthu wa khaindi yose. (Mateyu 10:7, 11; 24:14; 28:19, 20) Mapeto ya dziko yakuyipa ino yali pafupi maninge. Akhrisitu chayiwo-yiwo ankulalikira za boma ya Mulungu padziko yose yapasi. Uku nkuyamba kuti Mulungu akhale na mamiliyoni ya wanthu azinji pa dziko yose yapasi. (Chivumbulutso 7:9, 10) Akhirisitu chayiwo-yiwo achakondana, achabatsirana ndawa niwobverana. Padziko yose yapasi achapfunzira vibodzi-bodzi va m’Baibolo. — Lewengani Aheberi 10:24, 25.
3. Ko gulu ya Mboni za Yahova ya ntsiku zino idayamba tani?
Kundochokera mu 1870, kagulu kadiki-diki ka wanthu wakupfunzira Baibolo kadayamba kubvesesa viyingapfunzisa Baibolo. Iwo angadziwa kuti Yesu angada kuti akhrisitu ambalalikire va boma ya Mulungu. Ndipomwapa iwo adayamba kulalikira va boma ya Mulungu padziko yose. Mu 1931, adayamba kuphatisa basa dzina yakuti Mboni za Yahova. — Lewengani Machitidwe 1:8; 2:1, 4; 5:42.
4. Ko ntsiku zino Yesu achaphatisa basa mbani kuti atsogolere basa ya Mboni za Yahova?
Yesu ndiye Mtsogoleri wa akhrisitu chayiwo-yiwo kuchokera kalekale. Iye adaphatisa basa kagulu ka wanthu kuti apfunzise na kubatsira mipingu. Kagulu mwaka kenze ka atumi na akulu. (Machitidwe 16:4, 5) Ntsiku zino kagulu ka akume wanzeru kachatsogolera basa yomwe Mboni za Yahova zinkuchita. Kagulu mwaka kachachemerewa kuti Bungwe Yakutonga. Iwo achanyang’anira basa ya kutsumbudzulira, kudinda na kugawanisa mabukhu yakufotokoza Baibolo mu viseweredwe voposha 750 pa dziko yose. Bungwe Yakutonga ichaphatisa basa Baibolo kuti ipfunzise mipingu yoposha 110.000. Mu m’pingu uliwose akume wa makhalidwe yabwino achatumikira ninga akulu. Iwo niwabwino mtima ndipo achachengeta bwino nkhosa za Mulungu. — Lewengani 1 Petulo 5:2, 3.
Mboni za Yahova zichalalikira va boma ya Mulungu. Ninga mwangachitira atumi, isembo tichayenda nyumba na nyumba. (Machitidwe 20:20) Tichapfunzisa wanthu wose womwe achada kudziwa Mulungu. Koma osati kuti Mboni za Yahova zandokhala chipembedzo basi. Ndise wa m’banja ya Baba wachikondi. Ndise abale na alongosi ndipo tichabatsirana. (2 Atesalonika 1:3) Ndise banja yakukondwa ndawa tichachita chifuniro cha Mulungu ndipo tichabatsira ayathu. — Lewengani Salimo 33:12; Machitidwe 20:35.
