Mulengi wathu ananzeru zizinji kuposha zathu. Iye ni Baba wachikondi ndipo achatiganizira. Iye ndiye achatichitisa kuti tikhale wakukondwa. (Yeremiya 10:23) Ninge wana achadikana kubatsiriwa na abereki, tose tichadekana kubatsiriwa na Mulungu. (Yesaya 48:17, 18) Angatibatsire kuchokera m’Baibolo. Iyo ni mphaso yakuchokera kwa Mulungu. — Lewengani 2 Timoteyo 3:16.

Tikabvera malamulo ya Yahova, tingakhale wakukondwa ntsiku zino, na kudziwa vomwe tingachite kuti tidzakhale wakukondwa kutsogolo mpakana kale-kale. Pakuti Mulungu ndiye adatisika, chinthu chakudikana maninge ni kumubvera. — Lewengani Salimo 19:7, 11; Chivumbulutso 4:11.

Nthawi zinango, Baibolo ichachita kuneneratu kuti ichi n’choyipa, ichi n’chabwino. (Deuteronomo 22:8) Koma nthawe zinango, tichadikana kuphatisa basa nzeru zathu kuti tidziwe momwe Baibolo ingatibatsirire kusalula vochita pa moyo wathu. (Miyambo 2:10-12) Mwakulinganiza, Baibolo yichati, moyo ni mphaso yakuchoka kwa Mulungu. Kudziwa mwevi kuchatichitisa kuti timbasamalire moyo wa ayathu na wathu. Tichawusamalira moyo tikambaphata basa, tikakhala pamuyi, na pawulendo. — Lewengani Machitidwe 17:28.

Yesu adanena kuti pali malamulo yawiri yakudikana maninge. Yakuyamba, ichawonesa kuti chakulinga chathu pa moyo  ni kudziwa Mulungu, kumukonda na kumutumikra. Tikanati kusalula vochita, timbayambe takumbuka mwevi. (Miyambo 3:6) Tikayitengera siliyasi lamulo mweyi, tingakhale pawushamwali na Mulungu. Tingakhale soti wakukondwa na kudzakhala na Moyo wosapera. — Lewengani Mateyu 22:36-38.

Yachiwiri, ichatibatsira kukhala pamtendere na ayathu. (1 Akorinto 13:4-7) Kuti tichite vomwe lamulo mweyi ichanena, tichadekana kuwona wanthu ninga momwe Yahova achawawonera. — Lewengani Mateyu 7:12; 22:39, 40.

Baibolo ichapfunzisa mabanja kuti yakhale yakukondana na kubverana. (Akolose 3:12-14) Iyo ichati, Banja ichadikanalini kupera. Mwevi vichachitisa kuti banja ikhale yakulimba. — Lewengani Genesis 2:24.

Kuchita vomwe Baibolo ichapfunzisa kuchatithandiza munjira zizinji. Mwakulinganiza, Baibolo ichatibatsira kukhala wachilungamo pa basa, na kulimbikira basa. Kulikose, mabwana yachada nyabasa watene. (Miyambo 10:4, 26; Aheberi 13:18) Baibolo ichanena soti kuti ushamwali wathu na Mulungu niwakudikana kuposha mali. Iyo ichanena soti kuti tikakhala na vakudikana pamoyo, mwevi vimbatikwanire. — Lewengani Mateyu 6:24, 25, 33; 1 Timoteyo 6:8-10.

Kubvera vayichanena Baibolo kuchabatsira soti moyo wathu. (Miyambo 14:30; 22:24, 25) Mwakulinganiza, Baibolo ichalambizalini kumwa mowa, koma ichatsindika kuti kuledzera nikoyipa. Kubvera lamulo mweyi kuchateteza moyo wathu ku matenda na ngozi. (Salimo 104:15; Miyambo 23:20; 1 Akorinto 6:10) Baibolo ichatibatsira soti kuti timbaganize bwino tikambachita vinthu. (Salimo 119:97-100) Kuchita vomwe Baibolo ichanena ni ubwino wathu. Atumiki wa Mulungu achachita mwevi kuti alemekeze Mulumgu, osati kuti akhale na moyo wabwino basi. — Lewengani Mateyu 5:14-16.