PFUNZIRO 10
Ko mungachidziwe tani chipembedzo chayicho-yicho?
1. Ko chiripo chipembedzo chibodzi chayicho-yicho?
‘Khalani tcheru na apolofita wabodza.’ — MATEYU 7:15.
Inde chilipo. Ndicho chomwe Yesu angapfunzisa. Iye adanena kuti chili ninga msewu. Wanthu adiki-diki ndiwo achachigumana, ndipo angadzagumane moyo wosapera. (Mateyu 7:14) Wale achada kukondweresa Mulungu achadikana kuchita vichapfunzisa Baibolo. Wose ali muchipembedzo chayicho-yicho achakhulupilira vibodzi-bodzi. — Lewengani Yohane 4:23, 24; 14:6; Aefeso 4:4, 5.
2. Ko vipembedzo vose vichapfunzisa chowonadi?
Iwo achanena kuti achamudziwa Mulungu, koma achachitalini vachada iye. — TITO 1:16.
Neye. Yesu adakamba va apolofita wakunama. Achawoneka ninga achachita vachada Mulungu. Iwo achanena kuti achatewedza Yesu. Imwepo mungadziwe kuti vachasewera nivabodza. Ndawa chani? Ndawa vachachita vinkusiyana na vomwe Yesu adanena. — Lewengani Mateyu 7:13-23.
3. Ko mungachidziwe tani chipembedzo chayicho-yicho?
Wonani vinthu vishanu (5) vomwe wanthu ali mu chipembedzo chayicho-yicho achachita.
-
Achakhulupirira kuti Baibolo ni mawu ya Mulungu. Wanthu omwe ali mu chipembedzo chayicho-yicho achayesa kutewedzera uphungu wa m’Baibolo. Vipembedzo vizinji vichatewedza malamulo ya wanthu. (Mateyu 15:7-9) Ali mu chipembedzo chayicho-yicho achapfunzisa na kuchita vomwe Baibolo ichakamba. — Lewengani Yohane 17:17; 2 Timoteyo 3:16, 17.
-
Achapfunzisa na kuphatisa basa dzina ya Mulungu yakuti Yahova. Yesu angalemekeza dzina ya Mulungu ndipo angawonesa kuti niyakudikana maninge. Iye angapfunzisa va Mulungu, ndipo mu pemphero yakulinganiza adanena kuti: ‘Dzina yanu ichenesewe.’ (Mateyu 6:9) Ko muchachidziwa chipembedzo chomwe chichapfunzisa wanthu va dzina yakuti Yahova? — Lewengani Yohane 17:26; Aroma 10:13, 14.
-
Achalalikira za Ufumu wa Mulungu. Yesu angapfunzisa nkhani zabwino, zomwe Ufumu wa Mulungu udzachite. Ufumu moyu udzapeze kubonera kose kwa wanthu. Yesu anganena mwevi mpakana nthawe yomwe adaphewa. (Luka 4:43; 8:1; 23:42, 43) Iye adawatumiza atumi wake kukalalikira za Ufumu moyu. Ko n’chiti chipembedzo chichachita mwevi ntsiku zino? — Lewengani Mateyu 24:14.
-
Alirini mbali ya dziko yotongewa na Satana. Wanthu wa mu chipembedzo chayicho-yicho achapindiralini nkhani za ndale olo kuyambisa phiringu. (Yohane 17:16; 18:36) Kuyingizira pamwapo, iwo achachita nawolini vakuyipa vomwe tichaviwona. — Lewengani Yakobo 4:4.
-
Achakondana. Wanthu womwe ali mu chipembedzo chayicho-yicho achapfunzira m’Baibolo kulemekeza wanthu wose. Vipembedzo vakunama vichamenya nawo nkhondo. Tsono womwe ali muchipembedzo chayicho-yicho achachitalini mwevi. (Malaki 4:1-3) Akhrisitu chayiwo-yiwo achaphatisa basa nthawe na mali yawo pakubatsira ayawo. — Lewengani Yohane 13:34, 35; 1 Yohane 4:20.
4. Ko mwachidziwa chipembedzo chayicho-yicho?
Ko ni chipembedzo chiti chichatewedza va m’Baibolo na kuphatisira basa dzina ya Mulungu? Ko ni chipembedzo chiti chichalalikira kuti Ufumu wa Mulungu ndiwo udzapeze mabvuto yathu? Ko ni wanthu ati achakondana, ndipo achapindiralini mu nkhondo? Ko mwawadziwa? — Lewengani 1 Yohane 3:10-12.
