Yahova ni Mulungu wakukondwa, ndipo achada kuti mabanja yambakhale yakukondwa. (1 Timoteyo 1:11) Ndiye adayambisa kuti wanthu ambalowolane. Vimwevi vichawonesa kuti womwe achada kukhala pabodzi ayambe akanembese kuboma. Ndipomwapa akhrisitu achanembesa kuboma mwakulingana na malamulo ya dziko yawo. Vimwevi vichachitisa kuti akhale na banja yabwino nakuti ambakhale wakukondwa. — Lewengani Luka 2:1, 4, 5.

Kwa Mulungu, banja ni mgwirizano wa mkume na nchembere. Iye achada kuti wose awiri ambakhulupirirane. (Aheberi 13:4) Mulungu achazonda kumalisa banja. (Malaki 2:16) Ko m’bodzi akachita chigololo? Mulungu achabvuma kuti banja ipere, peno wophonyerewa achada kumalisa, kuti alowole panango kulowodwa soti. — Lewengani Mateyu 19:3-6, 9.

Yahova achada kuti wakulowolana ambathandizane. (Genesis 2:18) Mkume m’banja, achadekana kuphata basa kuti ambadyese banja yake na kupfunzisa va Mulungu wana wake na mkazi wake. Mkume yemwe achakondadi mkazi wake achamuchitira vabwino. Wanthu wolowolana achadikana kulemekezana mbanja. Wanthu wolowolana achadekana kukhululukirana ndawa tose tichaphonya. — Lewengani Aefeso 4:31, 32; 5:22-25, 33; 1 Petulo 3:7.

Neye. Ndawa yakuti banja iliyose ichagumana na mabvuto, nkume na mchembere achadekana kukambirana mwachikondi kuti apeze mabvuto yawo. (1 Akorinto 13:4, 5)  Baibolo yichati tikagumana na mabvuto, ayi kuthamangira kumalisa banja, ndawa ndiyolini njira yabwino yopezera mabvuto. — Lewengani 1 Akorinto 7:10-13.

Yahova achada kuti wana ambakhale wakusangalala m’banja. Ndipomwapa achawapasa malango. Mwakulinganiza, Yahova achadziwa kuti wana angapfunzire vizinji kwa makolo yawo ndawa agumana na vizinji pamoyo wawo. (Akolose 3:20) Wana achadikana soti kubvera Mulungu. Alumbwana na Atsikana womwe achabvera Yahova na Yesu, achakhala wakukondwa. — Lewengani Mlaliki 11:9–12:1; Mateyu 19:13-15; 21:15, 16.

Wana achadekana chakudya, vovala na nyumba yakuti ambakhalemo. (1 Timoteyo 5:8) Koma angakhaledi wakukondwa akambakonda Mulungu na kupfunzira va iye. Abereki achadekana kuwapfunzisa vimwevi wana wawo. (Aefeso 6:4) Ko mungawapfunzise tani wana wanu? Chakuyamba, abereki achadikana kuyamba ndiwo kukonda Mulungu, vimwevi vingachitise kuti wana amukondembo maninge. Chachiwiri, pakuwapfunzisa ambaphatisire basa Baibolo. Vimwevi vingawachitise kuti ambasalule vinthu vabwino pa moyo wawo. — Lewengani Deuteronomo 6:4-7; Miyambo 22:6.

Mumbawatembeje wana wanu akachita vinthu vabwino. Koma akaphonya, mumbawapfunzise na kuwayeluza, kuti aleke kugumana na mabvuto yazinji. (Miyambo 22:15) Pakuwayeluza, abereki achadikanalini kuwachitira tcheni (nkhanza) wana wawo. — Lewengani Akolose 3:21.

A Mboni za Yahova anamabukhu yazinji yomwe yangabatsire abereki na wana. Mabukhu mwayo yana malango ya m’Baibolo. — Lewengani Salimo 19:7, 11.