PFUNZIRO 3
Ko ntontholo wabwino ni wochokeradi kwa Mulungu?
1. Ko munichiro wa Baibolo ni mbani?
Yahova ndiye munichiro wa Baibolo. M’baibolo ndimo mwitichagumana ntontholo wabwino womwe ungatibatsire kukhala na moyo pasi pano, mpakana kalekale. (Salimo 37:29). Mu Baibolo muli mabukhu yakukwana 66. Kuti ayinembe, adaphatisa basa akume okwana 40. M’bodzi wa iwo ni Mose. Mabukhu yashanu yakuyambilira, ndiye adayanemba. Papinda magole 3.500, kuchoka pomwe adayanemba. Bukhu yakumalizira adanemba ni mtumi Yohane magole 2.000 mbuyomu. Ko wonemba angadziwa tani vakuti anembe? Mulungu angasewera nawo, mwa kuphatisa basa m’zimu wa kuchena. (2 Samueli 23:2) Ndipomwapa munikachiro wa Baibolo ni Yahova osati wanthu. — Lewengani 2 Timoteyo 3:16; 2 Petulo 1:20, 21.
2. Ko n’chani chichatichitisa kukhulupirira kuti Baibolo ni mawu ya Mulungu?
Tichakhulupirira kuti Baibolo ni yakuchokerara kwa Mulungu, ndawa ichanena vakutsogolo. Nthawe zose vayichakamba vichachitika. Wanthu angakwaniselini kuchita vimwevi. (Yoswa 23:14) Mulungu wa mphamvu zose, ndiye yekha achadziwa va kutsogolo. — Lewengani Yesaya 42:9; 46:10.
Bukhu yakuchokera kwa Mulungu, ichadikana kukhala yakusiyana na yanango. Ntenepolini? Baibolo niyosiyana na mabukhu yose! Yagawiwa yakupindirira 2 biliyoni, mu viseweredwe vakupindirira 450. Viribe basa kuti Baibolo niyakale-kale, koma ikambanena va sayansi ichalungamisa. Akume omwe adayinemba Baibolo adakhala na moyo nthawe zakusiyana-siyana. Podiya kuti viritenepo, vose vadanemba vichabverana. Baibolo ichatipfunzisa soti va chikondi. Ili ninga njira yomwe ingatibatsire kudziwa va munikachiro yemwe ni Mulungu wa chikondi. * Chinangosoti, Baibolo inamphamvu yakuchinja moyo wa wanthu. Ndipomwapa azinji achakhulupirira kuti Baibolo ni bukhu ya Mulungu. — Lewengani 1 Atesalonika 2:13.
3. Ko m’Baibolo muli nkhani zanyi?
Nkhani ikulu yomwe iri mu Baibolo, ni ntontholo wabwino wochokera kwa Mulungu. Iye achada kuti tikhale na tsogolo yabwino. Baibolo ichafotokoza momwe Adamu na Hava adaluzira mwayi wakukhala na moyo wosapera mu paradayiso. Ichatiwuza soti momwe dziko idzakhalire paradayiso kutsogolo. — Lewengeni Chivumbulutso 21:4, 5.
Baibolo ichafotokoza vose vomwe Mulungu adachitira wanthu kuyambira kalekale. Tikambalewenga vomwe Mulungu adachitira wanthu wake, vichatipfunzisa momwe iye aliri. Ndipomwapa, Baibolo ingakubatsireni kumudziwa bwino Mulungu. M’baibolo tichagumana soti malamulo, malango na uphungu, vomwe vingakubatsireni kuti mukhale pa ushamwali na Mulungu. — Lewengani Salimo 19:7, 11; Yakobo 2:23; 4:8.
4. Ko imwepo mungayibvesese tani Baibolo?
Bulosha ino ingakubatsireni kubvesesa Baibolo. Iyo inamalemba, ndipo ichafotokoza bwinobwino thandawuzo yake. Yesu pakupfunzisa wanthu angachitambo vimwevo. — Lewengani Luka 24:27, 45.
Mulungu anantontholo wabwino maninge! Tsono wanthu anango achawufunalini ntontholo moyu. Imwepo lekani kubva m’nkhongono na vimwevi. Dziwani ivi, kuti mukhale na moyo wosapera, muchadikana kudziwa Mulungu. — Lewengani Yohane 17:3.
^ ndi. 3 Wonani bulosha yakuti: Buku la Anthu Onse.
