Moyo wa Yesu udayambira kudzulu. Iye ni chakulengewa chakuyamba cha Yahova. Akanati kubwera pa dziko, wenze kudzulu ngati mngelo. (Yohane 8:23) Yesu adawabatsira ababa wake pakusika vinthu vinango. M’baibolo iye achachemerewa kuti ‘Mwana wakuyamba kubadwa’. Vimwevi vichawonekeratu kuti ndiye yekha adachita kulengeweratu na Mulungu. (Yohane 1:14) Mulungu akada kunena chinthu angaphatisira basa Yesu, ndipomwapa achachemerewa kuti ‘Mawu.’ — Lewengani Miyambo 8:22, 23, 30; Akolose 1:15, 16.

Yesu adabwera pa dziko ndawa ya vinthu vitatu ivi. (1) Kudzapfunzisa chowonadi cha Mulungu, (2) kudzawonesa momwe tingachitire vachada Mulungu pa nthawe za mabvuto na (3) kudzapereka moyo wake wakulungamiratu kuti adzatimasule ninga ‘chakuwombolera’. Ko Yesu adabwera tani pasi pano kuchoka kudzulu? Mulungu adachita chakudabwisa, namwali Maria adakhala na pathupi. Achibereka mwana mkume, dzina yake Yesu. —Luka 1:30-35. — Lewengani Mateyu 20:28.

Tose tichafa ndawa ndise wakuchimwa, ndipomwapa tichadekana kuwombolewa. Padalenga Adamu, Mulungu angadalini kuti wanthu timbakalambe na kufa. Iye angada kuti Adamu ambamubvere nakuti akhale na moyo wosapera. Manje Adamu alibe kubvera. (Genesis 2:16, 17; 5:5) Wanthu  wose ni wochimwa ndawa adachokera kwa Adamu. Pangafunika chakuwombolera kuti timasuliwe. Chakuwombolera ni malipiro yomwe munthu achapereka kuti awombole muyake kuti aleke kuphewa. — Lewengani Aroma 5:12; 6:23.

Tsono ni mbani adakakwanisa kutiwombola ku impfa? Pangadikana munthu alibe uchimo. — Lewengani Salimo 49:7-9.

Yesu adafa ndawa angakonda wanthu. Iye angadikalini kufa, ndawa wenze wakulungamiratu. Koma iye adabvera Ababa wake, ndipo adafa kuti atiwombole ku machimo. Ndawa ya vomwe Yesu adachita, Mulungu achakhululukira machimo ya wanthu. Chikondi cha Mulungu chidawoneka, pomwe adatumiza mwana wake kudzatiwombola. — Lewengani Yohane 3:16; Aroma 5:18, 19.

Nyang’anirani vidiyo yakuti Ndawa chani Yesu adafa?

Yesu ankutonga kudzulu ninga Mpfumu. Yesu pewenze pasi pano, adamukisa wakufa, adachiza wakudwala, angabatsira wakubonera. (Mateyu 15:30, 31; Yohane 5:28) Pomwe iye adafa, Mulungu adamumusa kuti akakhale na moyo kudzulu. (1 Petulo 3:18) Kumuko Yesu adadikhira mpaka Mulungu adanena kuti nthawe yakwana kuti iye ayambe kutonga. (Aheberi 10:12, 13) Ntsiku zino, wanthu azinji achamubvera ndipo achapfunzisa anango kuti iye ni Mpfumu. Vinthu vabwino vomwe adachita pasi pano vichabatsira kudziwa vati adzachite kutsogolo. — Lewengani Danieli 7:13, 14; Mateyu 24:14.

Tsontsono, wanthu wakuipa adzaphewe na Yesu, ndipo palibe adzabonere soti. Kuti tidzakhale na moyo wosapera, tichadekana kubvera na kukhulupilira Yesu. — Lewengani Salimo 37:9-11.