Yahova achada kuti wanthu wa mitundu yose ambasewere naye m’pemphero. (Salimo 65:2) Koma mwevi vikuthandawuza lini kuti iye achabva mapemphero yose. Mwakulinganiza, mkume watcheni (wankhanza) na nkazi wake, Yahova achamubveralini mapemphero yake. (1 Petulo 3:7) Pomwe Aizilayeli angapitiriza kuchita voipa, Mulungu adaleka kubvesera mapemphero yawo. Wanthu womwe ambondochita machimo ne kuleka, Mulungu achabveralini mapemphero yawo. Koma munthu akalapa nkuleka voyipa, Mulungu achamubvera mapemphero yake. — Lewengani Yesaya 1:15; 55:7.

Tichadekana kupemphera kwa Yahova mulengi wathu basi. Mwevi vingawonese kuti tichakhulupirira kuti iye yekha ndiye Mulungu. (Mateyu 4:10; 6:9) Tichadekana kupemphera kwa iye mudzina ya Yesu. (Yohane 14:6) Yahova achadalini kuti mapemphero yathu yambakhale yakubwereza-bwereza, panango kuyachita kunemba mubukhu. Timbapemphere kuchokera pasi pa moyo. — Lewengani Mateyu 6:7; Afilipi 4:6, 7.

Mulungu achabva mapemphero yathu olo yamumtima. (1 Samueli 1:12, 13) Tingapemphere nthawi iliyose, peno ni kuseni, masikati, pakudya, pakugona na nthawi iliyose yatagumana na mabvuto. — Lewengani Salimo 55:22; Mateyu 15:36.

Munthu yemwe ni shamwali wa Mulungu, vingamushupe kukhala na wanthu womwe achakhulupiriralini  Mulungu. (2 Timoteyo 3:1, 4; 2 Petulo 3:3, 13) Munthu yemwe achakonda Mulungu ndipo achada kumutumikira achadikana kumbasonkhana kuti ambalimbikisane. — Lewengani Aheberi 10:24, 25.

Kukhala na wanthu womwe achakonda Mulungu ni kwabwino ndawa kungatichitise kuti ushamwali wanthu na Mulungu ulimbe. Kumisonkhano ya Mboni za Yahova tichagumana wanthu womwe achatibatsira kukhala na chikhulupiriro. — Lewengani Aroma 1:11, 12.

Kuti mukhale shamwali wa Mulungu muchadikana kupatula nthawe nkumbaganizira vamwapfunzira m’Baibolo. Ganizirani vinthu vomwe Yahova wachita, malango yake na vomwe wapolomisa. Tikambaganizira vinthu mwevi na kupemphera kwa Yahova tingawone nzeru zake na chikondi chake kwa ise. — Lewengani Yoswa 1:8; Salimo 1:1-3.

Muchadikana soti kukhala na chikhulupiriro. Chikhulupiriro chili ninge mbewu za kudimba. Kuti zikule zichadikana kuzithiriza. Mwakulingana na mwevi, chikhulupiriro chichakula imwepo mukambapfunzira va Mulungu. — Lewengani Mateyu 4:4; Aheberi 11:1, 6.

Yahova achasamalira azishamwali wake. Iye achatiteteza ku vinthu vilivose vomwe vingatikangise kudzagumana moyo wosapera. (Salimo 91:1, 2, 7-10) Iye achatiwuza soti vomwe tingachite kuti tikhale na moyo wabwino na wakukondwa. Iye achatipfunzisa njira yabwino kuti tikhale na moyo wakukondwa. — Lewengani Salimo 73:27, 28; Yakobo 4:4, 8.