PFUNZIRO 2
Mulungu ni mbani?
1. Ndawa yanyi tichadekana kutumikira Mulungu?
Tichadekana kutumikira Mulungu ndawa ndiye adalenga moyo wathu na vinthu vose. Iye alibe pakuyambira ne pakumalizira. (Salimo 90:2) Kuthumizira mwapo, iye ndiye adatipasa ntontholo wabwino wa m’Baibolo. (1 Timoteyo 1:11) Pakuti Iye ndiye adatipa moyo, tichadekana kukhala naye pawushamwali. — Lewengani Chivumbulutso 4:11.
2. Ko Mulungu achawoneka tani?
Palibe angamuwone Mulungu ndawa iye ni mzimu achakhala kudzulu. (Yohane 1:18; 4:24) Tikambawona vadasika tichadziwa mwalili. Mwakulinganiza, iye adasika vipatso vizinji na maluwa. Vimwevi vichatichitisa kudziwa kuti iye ananzeru ndipo achatifuna. Tikambawona nyenyezi, dzuwa na dziko yapasi tichadziwa kuti iye anamphanvu zizinji. — Lewengani Aroma 1:20.
Tingadziwe vizinji va Mulungu tikambalewenga Baibolo. ichakamba vomwe Mulungu achada na vachazonda na momwe achakhalira na ise wanthu. — Lewengani Salimo 103:7-10.
3. Ko Mulungu anadzina?
Inde anayo. Yesu adati: ‘Ababa wathu wakudzulu, dzina yanu ichenesewe.’ (Mateyu 6:9) Dzina ya Mulungu ichachemerewa mwakusiyanasiyana malingana na chiseweredwe. Mu chiphimbi tichati ‘Yahova’. Mawu ninga Mulungu, Dedza nimadzinalini chayiyo. — Lewengani Salimo 83:18.
Payidanembewa Baibolo, dzina ya Mulungu yenzemo kupindilira ka 7.000. Yesu adawapfunzisa wanthu va dzina mweyi ndipo niyakufunika kuti tiyidziwembo. Tsono wanthu anango adayipfudza dzina ya Mulungu mumabaibolo nkuyikha yakuti Mulungu na Dedza. — Lewengani Yohane 17:26.
4. Ko Mulungu achatiwerengera?
Ninga momwe baba uyu achamukondera mwana wake, Mulungu achawerengera wanthu wose
Ntsiku zino wanthu ankubonera maninge. Anango achati ni Mulungu ankutibonelesa ndawa achatiwerengeralini, ankuchita vimwevi kuti atiyese chikhulupiriro chathu. Tsono mweyi ni bodza. — Lewengani Yakobo 1:13.
Mulungu adatipasa ufulu wosalula vochita. Ko nivabwinolini kusalula tekha vitichada? (Yoswa 24:15) Manje bvuto niyakuti azinji achaphatisira basa ufulu moyu kuchita naye vakuyipa, vimwevi vichabweresa mabvuto yazinji. Mulungu achawawiwa akambawona vimwevi vikuchitika. — Lewengani Genesis 6:5, 6.
Yahova achakuwerengerani imwepo. Iye achada kuti mukhale na moyo wabwino. Iye adzamalise kubonera na kudzonga wanthu wakuchita voyipa. Manje, wanthu ankubonera basi. Kutsogoloku tidzadziwe ndawa yake Mulungu akanati kumalisa mabvuto. Msolo 8, udzanene vimwevi. — Lewengani 2 Petulo 2:9; 3:7, 13.
5. Ko tingatani kuti tikhale shamwali wa Mulungu?
Kuti tikhale shamwali wa Yahova, Tichadikana kusewera naye mupemphero. Yahova achada kuti tikhale shamwali wake. (Salimo 65:2; 145:18) Chinthu chinango ni kulimbikira kuchita vinthu vabwino. Tose ndise wakuchimwa. Podi kuti ndise wochimwa, vingakwanisike kukhala naye pawushamwali ndawa yakuti achatikhululukira vakuphonya vathu. — Lewengani Salimo 103:12-14; Yakobo 4:8.
Tichadekana kukonda maninge Mulungu kuposa aliyese pamoyo wathu. (Maliko 12:30) Ko mungawonese tani kuti muchamukondadi Mulungu? Mukambalewenga mawu yake nakuchita vomwe achanena. Mwevi vingachitise kuti ushamwali wanu na iye ukhale wakulimba. — Lewengani 1 Timoteyo 2:4; 1 Yohane 5:3.
