PFUNZIRO 6
N’chani chichachitika munthu akafa?
1. Ko Mulungu adzamukisedi akufa?
Lazaro, na azilongoti wake, Mariya na Malita, angakhala kufupi na Yerusalemu. Pomwe Yesu adafika, penze padapinda tsiku zinayi kuchokera pomwe Lazaro adafa. Malita na Mariya adayenda naye Yesu kumanda komwe adayikha Lazaro. Wanthu azinji adawatewera. Kumuko Yesu adamumukisa Lazaro! Kumbukani mwadabvera Mariya na Malita pomwe adawona m’bale wawo akukhala soti na moyo. — Lewengani Yohane 11:21-24, 38-44.
Malita angadziwa kale nkhani yakuti Mulungu adzamukise akufa. Yahova adzamukise wanthu wose wakufa kuti adzakhale soti na moyo padziko yapasi. — Lewengani Yobu 14:14, 15.
2. N’chani chichachitika munthu akafa?
Mulungu adawuza Adamu kuti: ‘Pakuti ndiwe dongo, kudongowuko udzabwerere.’—GENESIS 3:19.
Mulungu adatilenga kuchokera ku dongo. (Genesis 2:7; 3:19) Tikafa, palibe chichakhala soti na moyo mthupi mwathu. Tikafa, ulupi wathu uchafambo, ndipo nzeru na maganizo yathu yachapera. Ni vomwe vidachitikira Lazaro pomwe adafa. — Lewengani Mlaliki 9:5, 6, 10.
Ko Mulungu achawotcha wanthu wakuyipa kumoto? Neye. Nkhani mwiyi niyabodza, ndawa Baibolo yichati wakufa achabvalini chinthu. Chipfunziso mwechi chichachitisa wanthu kuganiza kuti Mulungu niwakuyipa. Iye angawotchelini munthu kumoto, ndipo achachizonda chipfunziso mwechi. — Lewengani Yeremiya 7:31.
Nyang’anirani vidiyo yakuti Ko nchani chichachitika munthu akafa?
3. Ko wakufa angasewere na wanthu wamoyo?
Wakufa angasewerelini olo kubva. (Salimo 115:17) Koma kuli angelo wosabvera ndipo ni wakuyipa. Angelo mwawa achachitisa wanthu kukhulupirira kuti munthu wakufa angasewere. (2 Petulo 2:4) Yahova achalambiza kusewera na wanthu wakufa. — Lewengani Deuteronomo 18:10, 11.
4. Ko ni mbani adzamukisiwe?
Mamiliyoni ya wanthu adzamukisiwe pasi pano. Pali wanthu anango womwe alibe kupfunzira chowonadi, amwawa Mulungu adzawamukise. — Lewengani Luka 23:43; Machitidwe 24:15.
Akadzamukisiwa, iwo adzakhale na mwayi wakupfunzisiwa va Mulungu. Iwo angadzawonese chikhulupiriro mwa kubvera Yesu. (Chivumbulutso 20:11-13) Iwo akadzabvera, adzapasiwe moyo wosapera. — Lewengani Yohane 5:28, 29.
5. Ko kumukisiwa kwa wanthu kuchatiwuza chani va Yahova?
Akufa adzamukedi, ndawa Yahova adatumiza mwana wake kudzatifera. Mwapa vikuwonesa kuti Mulungu achatikonda maninge. Pa wanthu wose womwe adzamusiwe, ko imwepo muchada kudzawonako mbani? — Lewengani Yohane 3:16; Aroma 6:23.
