PFUNZIRO 8
Ndawa chani Mulungu wabvuma kuti timbabonere?
1. Ko kubonera kudayamba tani?
Vinkuwonekeratu kuti maboma ya wanthu yakangiwa kumalisa kubonera kwathu
Pakuyambilira Satana Ndyerekezi wenze mngelo. Iye angadziwa kuti tichadekana kupemphera kwa Mulungu. Tsono Satana, angada kuti wanthu ambapemphere kwa iye. Panthawe mweyi adayenda kukanamiza Hava. Ndipomwapa Baibolo yichalewa kuti ‘iye alibe kukhazikika mu chowonadi.’ (Yohane 8:44) Hava adachita vomwe Ndyerekezi angada, ndipo alibe kubvera Mulungu. Patsogolo pake Adamu alibembo kubvera Mulungu. Vidayambira mwapo kuti timbabonere na kufa. — Lewengani Genesis 3:1-6, 19.
Satana adayamba kutsutsa boma ya Mulungu. Iye angada kuti anango achitembo vibodzi-bodzi. Ndipomwapa adanamiza Hava. Wanthu azinji manjeuno, achadalini kutongewa na Mulungu, ndipo ali kusayidi ya Satana. Iye ndiye ankutonga dziko. — Lewengani Yohane 14:30; 1 Yohane 5:19.
2. Ko vomwe Mulungu adakonza venze na bvuto?
Neye. Vose vachakonza Mulungu ni vakulungama. Wanthu na angelo enze na ufulu wakubvera Mulungu. (Deuteronomo 32:4, 5) Mulungu adatipasa ufulu wa kusalula vabwino na vakuyipa. Peno tichakonda Mulungu, tichasalula kuchita vabwino. — Lewengani Yakobo 1:13-15; 1 Yohane 5:3.
3. Ndawa yanyi Mulungu ankuchebwa kupeza kubonera?
Satana achachitisa wanthu kukumbuka kuti angakhale bwino mosatsogolerewa na Mulungu. Tsono Mulungu wawapasa mpata wakuti awone kuti, vingakwanisikelini kudzitsogolera wokha. Nthawe ikumala, vafika pakuwonekeratu kuti boma ya Mulungu yokha ndiyo yingabwerese ntendere kwa wanthu. (Mlaliki 7:29; 8:9) Palibe boma ya wanthu yomwe yakwanisa kumalisa nkhondo, ukapondo, kusowa chilungamo na matenda. — Lewengani Yeremiya 10:23; Aroma 9:17.
Boma ya Mulungu ni yabwino, kusiyana na maboma ya wanthu ndawa iye achasamalira wanthu wake. (Yesaya 48:17, 18) Tsontsono, Mulungu adzapeze maboma yose ya wanthu. Koma wale achabvuma kutongewa na boma ya Mulungu, adzakhale padziko mpakana kalekale. — Yesaya 11:9; Lewengani Danieli 2:44.
Nyang’anirani vidiyo yakuti Ndawa chani Mulungu wabvuma kuti timbabonere?
4. Ko tingawonese tani kuti Satana ni wabodza?
Tingawonese kuti tichada boma ya Mulungu panango ya wanthu. Vatichasalula vichawonesa momwe tiliri. Satana adanena kuti palibe achatumikira Mulungu ndawa ya kumukonda. Tsono tingamuwonese kuti nkunama kwake tikambabvera Mulungu. — Lewengani Yobu 1:8-12; Miyambo 27:11.
5. Ko tingawonese tani kuti tichada kutongewa na Mulungu?
Tikambasalula vabwino, tichawonesa kuti tili ku sayidi ya Mulungu
Tichawonesa kuti tichada kutongewa na Mulungu, tikambapfunzira Baibolo na kumbachita vomwe iye achada. (Yohane 4:23) Ninge Yesu, tichapindiralini nkhani za ndale na nkhondo. Vimwevi vichawonesa kuti tili kusayidi ya Mulungu, osati ya Satana. — Lewengani Yohane 17:14.
Satana achachitisa wanthu kuwona vinthu vakuyipa ngati vabwino. Tikaleka kuchita voyipa abale na ashamwali wathu angatizonde, panango kutikalipira. (1 Petulo 4:3, 4) Ko imwepo mungabvere mbani, wanthu panango Mulungu? Satana adanena kuti wanthu achabvera Mulungu ngati vinthu viribwino. Tsono malamulo ya Mulungu yachachitisa kuti vinthu vitifambire bwino. Tikambabvera malamulo ya Mulungu, tichawoneseratu kuti Satana ni wabodza. — Lewengani 1 Akorinto 6:9, 10; 15:33.
Tinkutsimikizira kuti Mulungu adzamalise kubonera, ndawa achakonda wanthu. Womwe achakhulupirira vimwevi, na kubvera Mulungu, adzakhale na moyo wosapera padziko. — Lewengani Yohane 3:16.
