PFUNZIRO 5
Ndawa chani Mulungu adasika dziko?
1. Ko ndawa chani Mulungu adakonza dziko?
Dziko adayikonza kuti wanthu ambakhalamo. Mulungu adakonza mkume na nchembere wakuyamba nkuwayika mmunda wa Edeni. Yahova angada kuti Adamu na Hava, na wana wawo akhale pa dziko mpaka kalekale. (Genesis 2:15-17) Vimwevi vinkuwonesa kuti dziko ndiye muyi wathu. Kudzulu ni kwa angelo. —Yobu 38:4, 7. — Lewengani Salimo 37:29; 115:16.
Pakuyamba, munda wa Edeni wokha ndiye wenze paradayiso. Adamu na Hava adakabereka wana ndipo wanthu akadawanda. Wanthu adakakonza dziko yose kuti yikhale paradayiso. (Genesis 1:28) Mulungu adzayichenekelini dziko. Iyo ni muyi wathu mpaka kalekale. — Lewengani Salimo 104:5.
2. Ko ndawa chani dziko ilirini paradayiso?
Adamu na Hava alibe kubvera Mulungu, ndipomwapa adawathamangisa m’munda wa Edeni. Iwo adaluza mwayi wakukhala mu paradayiso. Ndipo palibe kudzawoneka soti malo yabwino ngati mwayale. Baibolo yichakamba kuti: ‘dziko yose idadzala na wanthu wakuyipa.’ —Yobu 9:24. — Lewengani Genesis 3:23, 24.
Ko chakulinga cha Yahova chakuti wanthu akhale mu paradayiso, chidamalira pamwapo? Neye. Iye ni wamphanvu zose, ndipomwapa adzachite vomwe adanena. (Yesaya 45:18) Wanthu achadzakhala na moyo wosapera padziko, ninga momwe Mulungu angafunira pakuyamba. — Lewengani Salimo 37:11, 34.
3. Ko nilini pomwe dziko idzakhale paradayiso?
Dziko yidzakhale paradayiso Yesu akadzayamba kutonga. Iye adzamange Satana kwa magole 1.000. Baibolo yichakamba soti kuti, pankhondo yakuchemelewa Arumagedo, Yesu na Angelo adzaphe wanthu wose womwe achabveralini Mulungu. Tsono wale achabvera Mulungu adzaphewelini, ndawa Yesu adzawapulumuse. Iwo adzakhale na moyo wosapera pa dziko yapasi. — Lewengani Chivumbulutso 20:1-3; 21:3, 4.
4. Ko nilini pomwe kubonera kudzapere?
Mulungu achadzamalisa kubonera na kuyipa. Ko nilini pati adzachite vimwevi? ‘Panavizindikiro’ vomwe Yesu adalewa, ndipo vichabatsira wanthu kudziwa kuti mapeto yali pafupi. Dziko manje yafika pakuyipa maninge, mwakuti vinkuwoneselatu kuti mapeto yafika. — Lewengani Mateyu 24:3, 7-14, 21, 22.
Yesu adzatonge dziko kwa magole 1.000 ali kudzulu, pa nthawe mweyo kubonera kudzapereretu. (Yesaya 9:6, 7; 11:9) Kuyingizira pamwapa, Yesu adzachose machimo yose ya wanthu wakubvera Mulungu. Yahova adzaphatisire basa Yesu kuti amalise matenda, kukalamba na impfa. — Lewengani Yesaya 25:8; 33:24.
5. Ko mbani adzakhale mu paradayiso?
Ku Nyumba ya Ufumu, imwepo mukadziwane na wanthu womwe achakonda, na kupfunzira va Mulungu
Wanthu wakubvera Mulungu adzakhale mu paradayiso. (1 Yohane 2:17) Yesu adawuza wopfunzira wake kuti fagani na kupfunzisa wanthu womwe achada kupfunzira va Mulungu. Ntsiku zino wanthu azinji ankupfunzira vomwe angachite kuti akondwese Mulungu. (Zefaniya 2:3) Ku Nyumba ya Ufumu ya Mboni za Yahova, wanthu mwawa achapempherera Mulungu, ndipo iwo achapfunzira kuti akhale alume, akazi, abereki na wana wabwino. Iwo achakhala wakukondwa ndawa ya ntontholo wabwino wa M’baibolo. — Lewengani Mika 4:1-4.
