PFUNZIRO 15
Ndawa yanyi muchadikana kupitiriza kupfunzira Baibolo?
1. Ko ndawa yanyi muchadikana kupitiriza kupfunzira Baibolo?
Vomwe mwapfunzira mu Baibolo, vinkuwonekeratu kuti chikondi chanu kwa Yahova chayingizirika. Imwepo muchadikana kupitiriza kupfunzira Baibolo, kuti chikondi chanu kwa Yahova chipitirize kukula. (1 Petulo 2:2) Imwepo mungakhale na moyo wosapera. Tsono kuti vikwanisike, muchadikana kulimbisa ushamwali wanu na Mulungu. — Lewengani Yohane 17:3; Yuda 21.
Mukambapfunzira va Mulungu, chikhulupiriro chanu chichalimbiratu. Chikhulupiriro chanu chichakubatsirani kuchita vinthu vokondwesa Mulungu. (Aheberi 11:1, 6) Kuchita mwevi kuchakubatsirani imwepo kuleka kuchita vinthu voyipa, n’kumbachita vabwino. — Lewengani Machitidwe 3:19.
2. Ko imwepo mungawabatsire tani ayanu?
Imwepo mungakhalembo mugulu ya wanthu wa Mulungu
Wanthu azinji achada ntontholo wabwino. Ndipomwapo yimwepo muchadikana kuwawuza ayanu ntontholo wabwino wa Yahova. Kuti mukwanise kuwawuza ayanu ntontholo moyu, pitirizani kupfunzira Baibolo. — Lewengani Aroma 10:13-15.
Mungayambe kudziwisa azibale wanu na azishamwali wanu. Muchadikanalini kunyoza chipembedzo chawo. Muchadikana kuwawuza vinthu vabwino vomwe Mulungu adzachite. Chinango soti, muchadikana kuchita vinthu vabwino. Dziwani kuti wanthu achanyang’ana maninge vochita vanu, kusiyana na vomwe muchakamba. — Lewengani 2 Timoteyo 2:24, 25.
3. Ko kupfunzira Baibolo kungakubatsireni tani?
Kuti ushamwali wanu na Yahova ulimbe, muchadikana kupitiriza kupfunzira Baibolo. Imwepo mungakhale pondayapa-mpondembo na Yahova. Mwevi n’vakukomedza. Munkuwona tani? — Lewengani 2 Akorinto 6:18.
4. Ko mungalimbise tani chikhulupiriro chanu kwa Yahova?
Chinthu chakuyamba kuchita, ndicho kupitiriza kupfunzira Baibolo. (Aheberi 5:13, 14) Imwepo mungakumbire m’bodzi wa Mboni za Yahova kuti ambakupfunziseni Baibolo, mwa kuphatisira basa bukhu ya Zimene Baibulo Limaphunzitsa. Imwepo mudzakomedzewe maninge, mukapitiriza kupfunzira va Mulungu. — Lewengani Salimo 1:1-3; 73:27, 28.
Muchadikana kusonkhana na gulu yake, kuti mulimbise ushamwali wanu na Yahova. (Aheberi 10:24, 25) Yahova anantontholo wabwino kuna imwepo. Iye achada kuti mukhale na moyo chayiwo-yiwo. Mukalimbikira kuchita vomwe iye achada, mudzakhale na moyo wosapera. Palibe chinthu chabwino kuposha kukhala pa ushamwali na Mulungu. — Lewengani 1 Timoteyo 1:11; 6:19.
Panango mungakondepomwe kudziwa ivi
BASA YAPADERA
Ndawa yanyi tichadekana kupfunzira Baibolo?
Baibolo inkudawira mibvunzo ya wanthu azinji padziko yose yapasi. Ko imwepo muchada kukhala mugulu ya wanthu mwawa?
