1, 2. (a) Ndawa chani tingalewe kuti mwayi wa pemphero ni mphaso yakudikana maninge kwa ise? (b) Ndawa chani tichadikana kudziwa vomwe Baibolo ichanena pa nkhani ya pemphero?

DZIKO yapasi ni ing’ono maninge tikailinganiza na vinthu vizinji vomwe viri muchilengedwe. Ndipo Yahova akambanyang’ana padziko, achawona makhaindi yose ya wanthu ninge dontho ya madzi yochokera mumtsuko. (Salimo 115:15; Yesaya 40:15) Podiya kuti ndise adiki maninge tikadzilinganiza na vinthu vinango vadasika, lemba ya Salimo 145:18, 19 ichati: ‘Yahova ali pafupi na wose wochemerera pa iye. Iye ali pafupi na wose womwe achamuchemera mu chowonadi. Ndipo wanthu womwe achamugopa adzawachitire vomwe iwo achada, adzabve kukuwa kwawo kokumbira thandizo ndipo adzawapulumuse.’ Tingati moyu ni mwayi ukulu maninge. Yahova achada maninge kuti akhale nase pa ushamwali ndipo niwokonzeka kubvesera mapemphero yathu podiya kuti iye ni Mulengi wamphanvu zose. Ndipomwapa, mwayi wopemphera kwa Yahova ni mphaso yakudikana maninge yomwe iye waipereka kwa wose.

² Koma kuti Yahova ambatibve tikambapemphera, tichadekana kumbapemphera mu njira yomwe iye achada. Ko tingachite tani vimwevi? Naboni tiwone vomwe Baibolo ichanena pa nkhani ya pemphero.

3. Ndawa chani muchadikana kumbayankhula na Yahova m’pemphero?

³ Yahova achada kuti timbayankhule naye m’pemphero. Ko tinkudziwa tani vimwevi? (Lewengani Afilipi 4:6, 7.) Mawu yomwe yali pamavesi mwaya niyochitisa chidwi. Wolamulira wachilengedwe chose achakukondani ndipo achada kuti mumbamuwuze mabvuto yamunkugumana nayo na momwe munkubvera.

4. Ko kuyankhulana kawiri-kawiri m’pemphero na Yahova kungalimbise tani ushamwali wanu na iye?

 ⁴ Pemphero ichatithandiza kukhala pa ushamwali na Yahova. Wanthu womwe ali pachishamwali akambayankhulana pafupi-pafupi, kumbawuzana mabvuto yomwe ankugumana nayo na momwe ankubvera, angakhale obverana maninge. Nchibodzi-bodzi na kuyankhula na Yahova m’pemphero. Mulungu achaphatisira basa Baibolo kutiwuza maganizo yake na momwe ankubvera pa nkhani iliyose. Achatiwuza soti vomwe adzachite kutsogolo. Kuyankhula na Mulungu m’pemphero nthawe zose kuchakupasani mwayi wakumuwuza momwe munkubvera m’moyo mwanu. Mukambachita vimwevi, ushamwali wanu na Yahova udzalimbe maninge.​—Yakobo 4:8.

5. Ko tinkudziwa tani kuti Yahova achabveseralini mapemphero yose?

⁵ Ko Yahova achabvesera mapemphero yose? Neye. Mu nthawe ya mneneri Yesaya, Yahova adawuza Aizilayeli kuti: ‘Mukapfuthula manja yanu, nimbakubisireni maso  yangu, olo mupereke mapemphero yazinji tani, inepano ningakubverenilini. Manja yanu yadzala na magazi yamwakhesa.’ (Yesaya 1:15) Ndipomwapa tikaleka kusamala, tingachite vinthu vomwe vingasokoneze ushamwali wathu na Yahova, vomwe vingachitise kuti aleke kubvesera mapemphero yathu.

6. Ndawa chani chikhulupiriro ni chakudekana? Ko mungawonese tani kuti munachikhulupiriro?

⁶ Peno tichada kuti Yahova ambabvesere mapemphero yathu, tichadekana kumbamukhulupirira. (Maliko 11:24) Mtumi Paulo adafotokoza kuti: ‘Palibe chikhulupiriro, vingakwanisikelini kukondweresa Mulungu. Ndawa aliyese wofika kwa Mulungu achadikana kukhulupirira kuti iye alikodi, nakuti iye achapereka mphoto kwa wanthu womwe achamufaga-faga na moyo wose.’ (Aheberi 11:6) Koma kundonena kuti tinachikhulupiriro nkosakwanira. Tichadekana kubvera Yahova ntsiku iliyose kuti tiwonese kuti tinachikhulupirirodi.​—Lewengani Yakobo 2:26.

7. (a) Ko ndawa chani tichadekana kukhala wodzichepesa na waulemu tingambayankhula na Yahova m’pemphero? (b) Ko tingawonese tani kuti mapemphero yathu ni yochokera pasi pa moyo?

⁷ Tichadekana kukhala wodzichepesa na waulemu tikambayankhula na Yahova m’pemphero. Ndawa chani? Tikada kuyankhula na pulezidenti panango mpfumu, tichayesesa kuyankhula nawo mwaulemu. Yahova ni Mulungu wamphanvu zose, ndipomwapa tikambayankhula naye tichadekana kudzichepesa na kuwonesa ulemu ukulu kuposha momwe tingachitire pakuyankhula na mpfumu panango na pulezidenti. (Genesis 17:1; Salimo 138:6) Tichadekana kuyankhula vinthu vomwe viridi m’moyo wathu osati kumbandobwerezera mawu yabodzi na yabodzi.​—Mateyu 6:7, 8.

8. Ko tichadekana kuchita chani tikakumbira vinthu m’pemphero?

⁸ Chinthu chomalizira ni chakuti, tikakumbira Yahova kuti atithandize pabvuto yathu, tichadekana kuchita vinthu vomwe vingatithandize kugumana vatichada. Mwakulinganiza, peno takumbira Yahova kuti atithandize kugumana vinthu vakudikana pamoyo wathu ninge chakudya na vovala, tichadekanalini kukhala manja mbwe, nkumbandodikhirira kuti Yahova  atichitire chilichose. Tichadekana kuphata basa mwakhama na kubvuma basa iliyose yagumanika yomwe tingakwanise kuphata. (Mateyu 6:11; 2 Atesalonika 3:10) Peno tapemphera kwa Yahova kuti atithandize kusiya khalidwe yoyipa, tichadekana kupewa vinthu vomwe vingatichitise kuchita khalidwe mweyo. (Akolose 3:5) Manje, naboni tikambirane mibvunzo yonena va pemphero yomwe wanthu azinji anayo.

9. Ko tichadekana kupemphera kwa mbani? Ko lemba ya Yohane 14:6 ichatipfunzisa chani pa nkhani ya pemphero?

⁹ Ko tichadekana kupemphera kwa mbani? Yesu adapfunzisa opfunzira wake kuti ambapemphere kwa ‘Ababa wathu wakudzulu.’ (Mateyu 6:9) Adanena soti kuti: ‘Inepano ndine njira, chowonadi na moyo. Palibe angakwanise kufika kwa Ababa osadzera mwa ine.’ (Yohane 14:6) Ndipomwapa tichadekana kupemphera kwa Yahova yekha koma kudzera mwa Yesu. Ko kupemphera kudzera mwa Yesu kuchathandawuza chani? Kuti Yahova adawire mapemphero yathu, tichadekana kuwonesa kuti tichatembeja udindo wapadera womwe Yesu adapasiwa. Ninge mwatidapfunzirira kale, Yesu adabwera padziko yapasi kuti adzatipulumuse ku uchimo na impfa. (Yohane 3:16; Aroma 5:12) Yahova adasalula Yesu kuti akhale Nkulu wa antsembe na Woweruza.​—Yohane 5:22; Aheberi 6:20.

10. Ko tichadekana kukhala mwapadera tikambayankhula na Mulungu m’pemphero? Fotokozani.

¹⁰ Ko tichadekana kukhala mwapadera tikambayankhula na Mulungu m’pemphero? Neye, Yahova achatiwuzalini kuti timbagwade, kukhazikika panango kuyimirira tikambapemphera. Baibolo ichatiwuza kuti tingayankhule na Yahova munjira iliyose yatingakhale yomwe ingawonese kuti tinkumulemekeza. (1 Mbiri 17:16; Nehemiya 8:6; Danieli 6:10; Maliko 11:25) Vomwe Yahova achanyang’ana kwa ise tikambayankhula naye m’pemphero ni momwelini takhalira koma achawona vili m’moyo mwathu. Tingapemphere mwa mawu yakubveka panango chamumtima, pamalo yaliyose na nthawe iliyose peno ni masikati panango usiku. Tikambapemphera tichadekana kukhulupirira  kuti Yahova ankubva vomwe tinkulewa olo kuti vinkubvekalini kwa wanthu anango.​—Nehemiya 2:1-6.

11. Ko ni vinthu vinango viponi vomwe tingamuwuze Yahova m’pemphero?

¹¹ Ko tichadekana kukumbira vinthu viponi m’pemphero? Tingakumbire vinthu virivose vomwe Yahova achawona kuti nivakudikana. Baibolo ichanena kuti: ‘Chilichose chatingamukumbire mwakubverana na vomwe iye achada, achatibva.’ (1 Yohane 5:14) Tsono nivabwino kumbamuwuza Yahova mabvuto yathu na vinthu vinango vomwe ise tichada? Inde. Timbayankhule na Yahova m’pemphero ninge mwatichachitira na shamali wathu wapamoyo. Ise tingamuwuze Yahova vose viri m’moyo mwathu. (Salimo 62:8) Ise tingapemphere kwa iye kuti atipase mphanvu yake ya mzimu wakuchena kuti atithandize kuchita vabwino. (Luka 11:13) Tingamukumbire soti Yahova kuti atipase nzeru, kuti timbasalule bwino vinthu pamoyo, nakuti atipase mphanvu kuti tigwebane na mabvuto. (Yakobo 1:5) Tichadekana kumukumbira pomwe Yahova kuti atikhululukire machimo yathu. (Aefeso 1:3, 7) Tichadekana soti kumbaguma ayathu, banja yathu pabodzi na abale na alongo mu mpingu tikambayankhula na Yahova m’pemphero.​—Machitidwe 12:5; Akolose 4:12.

12. Ko nkhani zakudikana maninge kuziguma tikambayankhula na Yahova n’ziponi?

¹² Ko nchani chakudikana maninge kuchiguma tikambayankhula na Yahova m’pemphero? Ni Yahova na chakulinga chake. Tichadekana kumutembeja kuchokera pasi pamoyo ndawa ya vinthu vose vomwe achatichitira. (1 Mbiri 29:10-13) Ise tinkudziwa vimwevi ndawa ya vomwe Yesu adapfunzisa wopfunzira wake ali padziko yapasi pano momwe angambayankhulirire na Yahova m’pemphero. (Lewengani Mateyu 6:9-13.) Iye adawawuza kuti chakuyamba achadikana kumbaguma dzina ya Mulungu kuti ichenesewe, panango kuti imbawonewe kuti niyopatulika. Patsogolo pake Yesu adawonesa kuti tichadekana kumbakumbira kuti Ufumu wa Mulungu ubwere nakuti vomwe iye achada vichitike padziko yose yapasi. Yesu adayamba kuguma vinthu mwevi vakudikana, basi nkulewa bwino vinango vomwe  ise tichada. Tikayamba kuguma dzina ya Yahova na vomwe iye achada, tichawonesa kuti vinthu vimwevi nivakudikana maninge.

13. Ko mapemphero yathu yachadikana kukhala yatali tani?

¹³ Ko mapemphero yathu yachadikana kukhala yatali tani? Baibolo ichalewalini. Mapemphero yathu yangakhale yafupi panago yatali, malingana na momwe vinthu viliri. Mwakulinganiza, tingachite pemphero ifupi tikanati kuyamba kudya, koma tingachite pemphero itali tikakhala patekha olo pomutembeja Yahova pa vomwe watichitira panango pakumuwuza  mabvuto yathu. (1 Samueli 1:12, 15) Tichadekanalini kuchita mapemphero yatali pakuda kudziwonesa kwa wanthu, ninga momwe angachitira wanthu anango munthawe ya Yesu. (Luka 20:46, 47) Yahova achaipidwa na mapemphero ninge mwaya. Vomwe Yahova achada ni vakuti timbayankhule naye kuchokera pasi pa moyo.

14. Ko tichadekana kuyankhula na Yahova kangasi pantsiku, ndipo vimwevi vinkutipfunzisa chani va iye?

¹⁴ Ko timbapemphere kangasi pantsiku? Yahova achatiwuza kuti timbayankhule naye nthawe iliyose. Baibolo ichati ‘pempherani mosalekedza,’ ‘pitirizani kupemphera,’ na ‘kuyankhula naye pafupi-pafupi.’ (Mateyu 26:41; Aroma 12:12; 1 Atesalonika 5:17) Nthawe zose Yahova niwokonzeka kutibvesera. Tingamutembeje ntsiku iliyose ndawa ya chikondi chake kwa ise na vinthu vabwino vomwe achatipasa. Tingamukumbire soti malangizo, mphanvu na chilimbikiso. Peno tinkutembeja mwayi watinawo woyankhula  na Yahova mpemphero, timbayesese kuyankhula naye nthawe iliyose.

15. Ndawa chani tichadekana kulewa kuti ‘ame’ kumapeto kwa pemhero?

¹⁵ Ndawa chani tichadekana kulewa kuti ‘ame’ kumapeto kwa pemphero? Mawu yakuti ‘ame’ yachathandawuza kuti ‘shuwadi’ panango kuti ‘vikhaledi tene.’ Tikalewa mawu mwaya, ndiye kuti tinkudawikiza kuti ndivo virimbo m’moyo mwathu. (Salimo 41:13) Baibolo ichatiwuza kuti tichadekana kulewa kuti ‘ame,’ mwakukuwa panango chamumtima, kumapeto kwa pemphero yapagulu pakuwonesa kuti tinkubverana na vomwe valewewa.​—1 Mbiri 16:36; 1 Akorinto 14:16.

16. Ko Yahova achadawiradi mapemphero yathu? Fotokozani.

¹⁶ Ko Yahova achadawiradi mapemphero yathu? Inde achadawira. Baibolo ichanena kuti iye ni ‘Wakubva pemphero.’ (Salimo 65:2) Yahova achabva na kudawira mapemphero yochokera pasi pa moyo yomwe wanthu azinji achachita, ndipo achayadawira mapemphero mwaya mwakusiyana-siyana.

17. Ko Yahova achaphatisa tani basa angelo na atumiki wake wa padziko yapasi pakudawira mapemphero ya wanthu?

¹⁷ Yahova achaphatisira basa angelo na atumiki wake wapadziko yapasi pakudawira mapemphero yathu. (Aheberi 1:13, 14) Panavitsanzo vizinji va wanthu omwe adakumbira kuti Mulungu awathandize kubvesa mpfundo za m’Baibolo ndipo nthawe pang’ono, Mboni za Yahova zidadafika nkuyamba kupfunzira nawo Baibolo. Baibolo ichawonesa kuti angelo achaphatambo nawo pabodzi basa yolalikira ‘ntontholo wabwino’ padziko yose yapasi. (Lewengani Chivumbulutso 14:6.) Panango azinji wa ise tidakumbira Yahova kuti  atithandize pa bvuto inango, panango kuti atithandize kugumana vinthu vinango vakudikana ndipo patsogolo pake tidathandiziwa na Akhrisitu anzathu.​—Miyambo 12:25; Yakobo 2:16.

18. Ko Yahova achaphatisa basa tani mzimu wakuchena na Baibolo pakudawira mapemphero yathu?

¹⁸ Yahova achaphatisa basa soti mzimu wakuchena pakudawira mapemphero yathu. Tikakumbira kuti atithandize kupirira bvuto inango, iye angatipase mzimu wake wakuchena kuti utitsogolere na kutithandiza kupirira. (2 Akorinto 4:7) Nthawe zinango Yahova achaphatisa soti basa Baibolo pakudawira mapemphero yathu na kutithandiza kusalula vinthu mwanzeru. Tikambalewenga Baibolo, tingagumane lemba yomwe ingatithandize. Yahova angachitise soti m’bale panango mulongo munango kupereka m’dawiro pansonkhano womwe ungatithandize pa bvuto yathu. Angachitise pomwe mkulu kuti atiwuze mpfundo inango ya m’Baibolo yomwe ingatithandize. ​—Agalatiya 6:1.

19. Ndawa chani nthawe zinango vingawoneke ninge Yahova ankudawiralini mapemphero yathu?

¹⁹ Koma nthawe zinango tingambadzibvunze kuti, ‘tsono ndawa chani Yahova ankudawiralini mapemphero yangu mpakana lero?’ Kumbukirani kuti iye achadziwa nthawe na njira yakudikana yakudawirira mapemphero yathu. Iye achadziwa vinthu vomwe tichadikana. Koma tichadikana kupitiriza kuyankhula naye kuti tiwonese kuti vomwe tinkuvikumbira tinkuvifunadi, nakuti tichamuthemba maninge. (Luka 11:5-10) Nthawe zinango Yahova achadawira mapemphero yathu munjira yakusiyana na momwe timbaganizira. Mwakulinganiza, tingamukumbire kuti atithandize pa bvuto inango, koma m’malo mwakutichosera bvuto mweyo angandotithandiza kuti tiyipirire.​—Lewengani Afilipi 4:13.

20. Ndawa chani tichadekana kupemphera kwa Yahova nthawe zose?

²⁰ Mpfundo zomwe takambirana mu nkhani mweyi, zinkuwonesa kuti pemphero ni mwayi wakudikana maninge. Ayi kuti timbakayikire kuti Yahova achabva mapemphero yathu. (Salimo 145:18) Isepano tikambayankhula na Yahova m’pemphero pafupi-pafupi mochokera pasi pamoyo, ushamwali wathu na iye udzalimbe.