1. Ko ni mbvunzo uponi womwe mungadzibvunze patsogolo pakuti mwapfunzira Baibolo pakuphatisira basa bukhu ino?

KUPFUNZIRA Baibolo pophatisa basa bukhu mweyi kwakuthandizani kudziwa vinthu vosiyana-siyana ninge polomisi ya Mulungu ya moyo wosapera, momwe wakufa aliri na vakuti wanthu womwe adamwalira adzamukisiwe. (Mlaliki 9:5; Luka 23:43; Yohane 5:28, 29; Chivumbulutso 21:3, 4) Panango mudayendako kale kumisonkhano ya Mboni za Yahova ndipo mudawona kuti iwo achapempherera Mulungu mu njira chaiyo. (Yohane 13:35) Panango mwayamba kale kukhala pa ushamwali na Yahova ndipo  muchada kumutumikira. Koma panango mungambadzibvunze kuti, ‘ko ningachitetani kuti nimbatumikire Mulungu?’

2. Ko ndawa chani munthu munango wa ku Itiyopiya adakumbira kuti abatiziwe?

² Mbvunzo wolingana na moyu ni womwe munthu munango waku Itiyopiya wenze nawo. Iye, adalalikiriwa na wopfunzira munango wa Yesu dzina yake Filipo. Pamwapa penze padapita magole yazinji kuchokera pomwe Yesu adamukisiwa. Filipo adathandiza munthu moyu kudziwa kuti Yesu wenze Mesiya. Iye adakondwa maninge na vomwe adapfunzira mwakuti nthawe mwiyo adanena kuti: ‘Wonani! Si aya madzi yazinji? Manje nchani chinkunikangisa kubatizika?’ ​—Machitidwe 8:26-36.

3. (a) Ko Yesu adawuza wopfunzira wake kuti ambachite chani? (b) Ko munthu achadikana kubatiziwa tani?

³ Baibolo ichafotokoza mobveka bwino kuti peno muchada kutumikira Yahova muchadikana kubatizika. Yesu adawuza wopfunzira wake kuti: ‘Kapfunziseni wanthu wakhayindi yose kuti akhale wopfunzira wangu. Ndipo mumbawabatize.’ (Mateyu 28:19) Yesu adapereka chitsanzo chabwino pa nkhani mweyi ndawa nayembo adabatiziwa. Pomwe angabatiziwa adavuwikiwa thupi yose, osati kundomuwaza madzi mumsolo. (Mateyu 3:16) Ntsiku zino, Akhrisitu akambabatiziwa achadikana kuvuwikiwa thupi yose m’madzi.

4. Ko ubatizo uchawonesa chani?

⁴ Mukabatizika muchawonesa wanthu anango kuti mukufunisisa kukhala paushamwali na Mulungu ndipo muchada kumutumikira. (Salimo 40:7, 8) Koma panango mungadzibvunze kuti, ‘ko nichadekana kuchita chani kuti nibatizike?’

5. (a) Ko ni chiti chinthu choyamba chomwe muchadikana kuchita kuti mubatiziwe? (b) Ndawa chani misonkhano yachikhrisitu ni yakudikana maninge?

⁵ Mukalibe kubatizika, muchadikana kudziwa Yahova na Yesu. Mudayamba  kale kuchita mwevi pa nthawe yamudayamba kupfunzira Baibolo. (Lewengani Yohane 17:3.) Koma kundodziwa Yahova na Yesu nkosakwana. Baibolo ichanena kuti muchadikana ‘kudziwa chaivo’ vomwe Yahova achada. (Akolose 1:9) Kuyenda kumisonkhano ya Mboni za Yahova kungakuthandizeni kuti mumudziwe bwino Yahova. Ndipomwapa, muchadikana kumbagumanika pa misonkhano mwaya nthawe zose.​—Aheberi 10:24, 25.

6. Ko muchadikana kudziwa mpfundo za m’baibolo zizinji tani kuti mubatizike?

⁶ Koma Yahova achadikhiriralini kuti mukalibe kubatiziwa mudziwiretu vinthu vose viri m’Baibolo. Iye angadikhiriralini kuti munthu wa ku Itiyopiya ule adziwiretu vose akalibe kubatizika. (Machitidwe 8:30, 31) Ndipo tidzapitirize kupfunzira va Mulungu mpakana kale-kale. (Mlaliki 3:11) Koma kuti mubatizike muchadikana kudziwa na kuyamba kukhulupirira mpfundo zoyambirira za m’Baibolo.​—Aheberi 5:12.

7. Ko kupfunzira Baibolo kungakuthandizeni tani?

⁷ Baibolo ichanena kuti: ‘Palibe chikhulupiriro, vingakwanisikelini kukondweresa Mulungu.’ (Aheberi 11:6) Muchadikana kukhala na chikhulupiriro mukalibe kubatizika. Baibolo ichatiwuza kuti wanthu anango muthawundi ya Akorinto adabva vomwe wopfunzira wa Yesu angapfunzisa ndipo ‘adayamba kukhulupirira ndipo adabatizika.’ (Machitidwe 18:8) Mwakulingana na wanthu mwawa, kupfunzira Baibolo kwamunkuchita kungakuthandizeni kuti mumbakhulupirire vomwe Mulungu adapolomisa na kukhulupirira soti ntsembe ya Yesu yomwe ingatipulumuse ku uchimo na impfa.​—Yoswa 23:14; Machitidwe 4:12; 2 Timoteyo 3:16, 17.

8. Ko nchani chingakuchitiseni kuti mumbawuze anango vomwe munkupfunzira?

⁸ Mukapitiriza kupfunzira Baibolo na kuwona momwe  inkukuthandizirani pamoyo wanu, chikhulupiriro chanu chidzakule. Mudzakhale na shungu yowuza anango vomwe munkupfunzira. (Yeremiya 20:9; 2 Akorinto 4:13) Ko mungayambe kuwuzako mbani vomwe munkupfunzira?

9, 10. (a) Ko mungayambe kuwuzako mbani vomwe muchapfunzira m’Baibolo? (b) Ko muchadikana kuchita chani peno muchada kumbalalikira pabodzi na mpingu?

⁹ Mungambawuze azibale wanu, anzanu, avizinyu panango wanthu womwe muchaphata nawo basa. Kuchita mwevi nikwabwino koma muchadikana kuvichita mwachikondi na mwaulemu. Nkupita kwa nthawe, mudzakwanise kukhala wokonzeka kumbalalikira na mpingu. Mukadzawona kuti mungakwanise kumbalalikira na mpingu, mudzawuze wa Mboni yemwe muchapfunzira naye Baibolo kuti nichada kuyamba kulalikira pabodzi na mpingu. Peno iye angawone kuti ndimwedi wokonzeka ndipo muchatewedza mpfundo za m’Baibolo, padzakonzewe vakuti mugumane na akulu awiri wa mumpingu mwanu.

¹⁰ Ko ndawa chani muchadikana kugumana na akulu mwawo? Iwo adzakambirane namwe kuti awone peno munkubvesa na kukhulupirira mpfundo zoyambirira za m’Baibolo, peno muchatewedza vomwe Baibolo ichanena, nakuti peno muchada kukhala wa Mboni za Yahova. Dziwani kuti akulu achasamalira wanthu wose mumpingu kuphatanidza imwepo, ndipomwapa muchadikanalini kumbachita mantha kucheza nawo. (Machitidwe 20:28; 1 Petulo 5:2, 3) Patsogolo pa kukambirana, akulu mwawa adzakuwuzeni peno mungayambe kulalikira pabodzi na mpingu.

11. Ndawa chani munthu achadikana kuchinja makhalidwe yanango akalibe kuyamba kulalikira pabodzi na mpingu?

¹¹ Akulu angakuwuzeni peno panavinthu vinango vomwe muchadikana kuchinja mukalibe kuyamba kulalikira  pabodzi na mpingu. Ko kuchinja vinthu vomwe akuwuzani ni kofunika ndawa chani? Ndawa tikambalalikira tichakhala tikuyimira Yahova. Ndipomwapa, khalidwe yathu ichadikana kukhala yabwino yomwe ingachitise wanthu kulemekeza Yahova.​—1 Akorinto 6:9, 10; Agalatiya 5:19-21.

12. Ndawa chani munthu aliyese achadikana kulapa?

¹² Panachinthu chinango chomwe muchadikana kuchita mukalibe kubatizika. Mtumi Petulo adanena kuti: ‘Lapani na kuchinja kuti machimo yanu yapfudziwe.’ (Machitidwe 3:19) Ko kulapa nkutani? Kulapa kuchathandawuza kubva ntsisi ndawa ya voyipa vose vomwe tidachita. Mwakulinganiza, peno pakuyamba mwenze na khalidwe ya chigololo, muchadikana kulapa. Olo vitakhala kuti nthawe zose muchayesesa kuchita vinthu vabwino muchadikana kulapa basi ndawa tose ndise wochimwa ndipo tichada kuti Mulungu atikhululukire.​—Aroma 3:23; 5:12.

13. Ko ‘kuchinja’ kuchathandawuza chani?

¹³ Ko kundobva ntsisi na vomwe tidachita ni kokwana? Neye. Petulo adanena kuti tichadekana soti ‘kuchinja.’ Vimwevi vinkuthandawuza kuti muchadikana kupewa khalidwe iliyose yoyipa yomwe mungachita pakuyamba nkumbachita vinthu vabwino. Kuti tibvese mpfundo mweyi, tilinganize kuti munkuyenda kumalo yomwe mukalibe kuyendako. Pomwe mwafamba nsenga utali, munkuzindikira kuti mwasokera. Ko mungachite tani? Tinashuwa kuti mungaimirire, nkubwerera kuti mukaphate njira chaiyo. Mwakulingana na mwevi, vingakwanisike kuti vamwakhala munkupfunzira mu Baibolo vakuthandizani kudziwa kuti panakhalidwe na vinthu vinango vomwe muchadikana kusiya. Muchadikana kukhala wokonzeka ‘kuchinja’ panango kuti kubwerera, nkuyamba kumbachita vinthu vabwino.

14. Ko mungadzipereke tani kwa Mulungu?

¹⁴ Chinthu chinango chakudikana kuchita mukanati kubatizika ni kudzipereka kwa Yahova. Mungadzipereke kwa Yahova, pakumupolomisa mpemphero kuti mumbatumikire iye yekha nakuti munkuwona kuti kuchita vomwe iye achada nkwakudikana maninge pamoyo wanu.​—Deuteronomo 6:15.

15, 16. Ko nchani chingachitise munthu kuti adzipereke kwa Mulungu?

¹⁵ Kupolomisa kuti mumbatumikire Yahova yekha kuli ninge kupolomisa kuti mudzakhale na munthu yemwe mudzamukonde mpakana kale-kale. Tilinganize kuti mwamuna na nkazi ali pachibwenzi. Mwamuna akamudziwa bwino-bwino m’ntsikana muyo, achayamba kumukonda maninge ndipo patsogolo pake angamulowole. Olo kuti udindo wake ukule akamulowola, iye angamulowole basi nkazi muyo ndawa yakuti achamukonda.

¹⁶ Imwembo mukambapfunzira va Yahova, mudzamukonde maninge ndipo mudzachite vose vamungakwanise kuti mumutumikire. Kuchita vimwevi kungakulimbikiseni kuti mumupolomise m’pemphero kuti mudzamutumikire. Baibolo ichanena kuti aliyese yemwe achada kutewera Yesu, ‘adzilambe yekha.’ (Maliko 8:34) Ko vimwevi vinkuthandawuza chani? Vinkuthandawuza kuti mumbawone kuti kubvera Yahova ni chinthu chadikana maninge. Mumbawone kuti vomwe Yahova achada kuti mumbachite nivakudikana maninge kuposha vanu.​—Lewengani 1 Petulo 4:2.

17. Ndawa chani wanthu anango achadalini kudzipereka kwa Yahova?

¹⁷ Wanthu anango achadalini kudzipereka kwa Yahova ndawa yoganiza kuti angakwaniselini kuchita vomwe adamupolomisa kuti ambamutumikire. Iwo achadalini kukwinyiririsa  Yahova, panango achakhala na mantha na maganizo yakuti peno adziperekelini, ndiye kuti Yahova angawawonelini kuti niwakuphonya pa vomwe ankuchita.

18. Ko nchani chingakuthandizeni kuti mumalise mantha yakuti mungadzakwinyiririse Yahova?

¹⁸ Mukakhala kuti muchamukondadi Yahova, mungachitelini mantha yakuti mungadzachite vinthu vakumukwinyiririsa. Chikondi chanu chidzakuchitiseni kuti muyesese kuchita vinthu vomwe mudamupolomisa. (Mlaliki 5:4; Akolose 1:10) Mungawonelini kuti kuchita vomwe Yahova achada nikoshupa. Mtumi Yohane adanemba kuti: ‘Ndawa kukonda Mulungu kuchathandawuza kubvera malamulo yake ndipo malamulo yake ni yosalemera.’​—1 Yohane 5:3.

19. Ko ndawa chani muchadikanalini kugopa kudzipereka kwa Yahova?

¹⁹ Sikuti munthu akadzipereka kwa Yahova ndiye kuti angaphonyelini. Yahova achadalini kuti timbachite vinthu vomwe tingakwaniselini. (Salimo 103:14) Iye adzakuthandizeni kuti mumbachite vinthu vabwino. (Yesaya 41:10) Mumbakhulupirire Yahova na moyo wanu wose, ndipo ‘iye adzathamule njira zanu.’ ​—Miyambo 3:5, 6.

20. Ko mukadzandodzipereka kwa Mulungu, chinthu chinango chidzakhale chani?

²⁰ Ko mukuwona kuti ndimwe wokonzeka kudzipereka kwa Yahova? Mukadzandodzipereka kwa Yahova, padzakhale chinthu chibodzi chati mudzachite. Mudzadikane kubatiziwa.

21, 22. Ko imwepo ‘mungadzidziwikise’ tani kwa wose za chikhulupiriro chanu?

²¹ Muchadikana kumudziwisa wogwirizanisa basa ya akulu wa mumpingu wanu kuti mudadzipereka kwa Yahova ndipo muchada kubatizika.  Patsogolo pake iye adzakonze vakuti akulu anango akambirane namwe mpfundo zinango zoyambirira za m’Baibolo. Peno iwo angatsimikizire kuti mukudikanadi kubatiziwa adzakudziwiseni kuti mudzabatiziwe pa nsonkhano ukulu wa Mboni za Yahova uli patsogolo. Pa nsonkhano moyu padzakambiwe nkhani yomwe idzafotokoze bwino-bwino thandawuzo ya ubatizo. Wati adzakambe nkhani, adzabvunze wanthu womwe ankudikhirira kubatiziwa kuti adawire mibvunzo  yawiri yosashupa. Pakudawira mibvunzo mwayo muchakhala ‘munkudzidziwikisa kwa wose’ va chikhulupiriro chanu.​—Aroma 10:10.

²² Nkhani ikadzapera, mukabatiziwe. Mudzavuwikiwe thupi yose m’madzi. Ubatizo moyu udzawonese kwa  wanthu wose kuti mudadzipereka kwa Yahova ndipo manje ndimwe wa Mboni za Yahova.

23. Ko kubatiziwa mu dzina ya ‘Ababa, ya Mwana na ya mzimu wakuchena’ kuchathandawuza chani?

²³ Yesu adanena kuti wopfunzira wake ambadzabatiwe ‘mu dzina ya Ababa, ya Mwana na ya mzimu wakuchena.’ (Lewengani Mateyu 28:19.) Ko vimwivi vinkuthandawuza chani? Vinkuthandawuza kuti munkudziwa ulamuliro womwe Yahova anawo na udindo womwe Yesu anawo pa kukwanirisa vomwe Mulungu achada. Vichathandawuza soti kuti muchadziwa kuti Mulungu achaphatisa basa mzimu wakuchena pakukwanirisa vomwe achada.​—Salimo 83:18; Mateyu 28:18; Agalatiya 5:22, 23; 2 Petulo 1:21.

24, 25. (a)  Ko ubatizo uchayimira chani? (b) Ko tidzakambirane chani mu msolo womalizira?

²⁴ Ubatizo uchayimira chinthu chinango chakudikana maninge. Mukavuwikiwa m’madzi, muchawonesa kuti mwafa panango kuti mwasiya moyo wanu wakale. Mukavuwuliwa muchayamba moyo munango wanyowani wochita vomwe Mulungu achada. Vichayonesa kuti kuyambira mwapo mumbatumikire Yahova. Muchadikana kukumbukira kuti mulibe kudzipereka kwa munthu, bungwe panango ku basa inango. Koma mudadzipereka kwa Yahova.

²⁵ Kudzipereka kudzakuthandizeni kuti ushamwali wanu na Yahova ukule. (Salimo 25:14) Koma vimwevi vinkuthandawuzalini kuti munthu angapulumuke ndawa yakuti wabatiziwa. Mtumi Paulo adanemba kuti: ‘Pitirizani kukonza chipulumuso chanu mwamantha na kunjenjemera.’ (Afilipi 2:12) Ubatizo ni poyambira chabe. Ko mungachite tani kuti mupitirize kukhala paushamwali na Yahova? Msolo womalizira wa bukhu mwayino udzadawire mbvunzo moyu.