1, 2. Ko tichadekana kuthemba mbani tikagumana na mabvuto?

TILINGANIZE kuti munkufamba munsewu ndipo kunja kwayamba kuchinja. Mitambo ya nvula yayamba kubwera, mwakuti kunkubwera pomwe chim’dima cha nvula, tuphaliwali twayamba kucheruka, ndipo dedza ankugunda. Ndipo chinvula champhanvu chayamba kuwunga. Nthawe mweyo imwepo munkufaga-faga malo yakuti muyose. Mungabve bwino maninge mukagumana pamalo powuma na pabwino.

² Ntsiku zino tinkugumana na mabvuto yazinji yomwe yali ninge chinvula champhanvu. Vinthu vinkuyipa maninge mudziko. Panango muchadzibvunza kuti, ‘ko nithawire kuti?’ Yemwe adanemba Masalimo adanena kuti: ‘Nidzamuwuze Yahova kuti: ‘Imwepo ndimwe pakuthawirapo pangu na malo yangu yachitetezo, Mulungu wangu yemwe nichamukhulupirira.’’ (Salimo 91:2) Mawu mwaya yankuwonesa kuti Yahova angatithandize pa mabvuto yathu manjewuno, na kudzatipasa moyo wabwino kutsogolo.

3. Ko tingachitetani kuti Yahova akhale malo yathu yothawira?

³ Tsono Yahova achatiteteza tani? Iye angakwanise kutithandiza kugwebana na mabvuto yose yatingakhale nayo ndipo anamphanvu zizinji zakuposha munthu aliyese yemwe angafune kutidzonga. Olo kuti tidzongeke, Yahova angatithandize kuti vinthu vidzakhale bwino mtsogolo. Baibolo ichatilimbikisa kuti: ‘Pitirizani kuchita vinthu vomwe vingachitise kuti Mulungu akukondeni.’ (Yuda 21) Tichadekanalini kusiyana na Yahova kuti ambatithandize pamabvuto yathu. Ko tingachite tani kuti tileke kusiyana na Yahova?

4, 5. Ko Yahova achawonesa tani kuti achatikonda?

⁴ Kuti tipitirize kukhala paushamwali na Yahova,  tichadekana kuzindikira kuti iye achatikonda maninge. Ndoganizirani va vinthu vose vomwe Yahova achatichitira. Watipasa dziko yapasi yabwino ndipo adayikhamo vinyama na vomera vokomedza maninge. Adatipasa soti vakudya vakukoma na madzi kuti timbamwe. Pakuphatisira basa Baibolo, Yahova adatipfunzisa dzina yake na makhalidwe yake yosangalasa. Ndipo umboni ukulu wakuti achatikonda adawuwonesa padatumiza mwana wake wapamoyo Yesu, padziko yapasi kuti adzapereke moyo wake kuti atipulumuse. (Yohane 3:16) Ntsembe mwiyi idatipasa mwayi wodzakhala na moyo wabwino maninge kutsogolo.

⁵ Yahova adakhazikisa Ufumu wa Mesiya, womwe ni boma yakudzulu yomwe ntsontsono imalise mabvuto yose ya wanthu. Ufumu moyu udzachinje dziko yose nkukhala paradaiso, momwe wanthu adzakhale mwantendere na mwakukondwa mpakana kale-kale. (Salimo 37:29) Yahova wawonesa soti kuti achatikonda pakutipfunzisa vinthu vomwe vichatithandiza kukhala na moyo wabwino manjewuno. Achatilimbikisa soti kuti timbayankhule naye m’pemphero nthawe zose ndipo iye niwokonzeka kutibvesera. Moyu ni umboni wakuti Yahova achakonda munthu aliyese.

6. Ko tichadekana kuchita chani ndawa ya chikondi chomwe Yahova adatiwonesa?

⁶ Tichadekana kuwonesa kuti tichatembeja chikondi chomwe Yahova achatiwonesa. Yahova watichitira vinthu vizinji, koma nivakupasa ntsisi kuti wanthu azinji achatembejalini. Vimwevi ndivo vidachitika soti panthawe yomwe Yesu wenze padziko yapasi. Nthawe inango Yesu adapolesa wanthu 10 wakhate, koma m’bodzi yekha ndiye adatembeja. (Luka 17:12-17) Tichadekana kukhala ninge munthu adatembeja ule. Nthawe zose tichadekana kumbatembeja vomwe Yahova achatichitira.

7. Ko timbamukondetani Yahova?

⁷ Isepano tichadekana kukonda Yahova. Yesu adawuza wopfunzira wake kuti achadekana kukonda Yahova na mtima  wawo wose, moyo wawo wose na maganizo yawo yose. (Lewengani Mateyu 22:37.) Ko vimwevi vinkuthandawuza chani?

8, 9. Ko tingawonese tani kuti tichakonda Yahova?

⁸ Ko kundolewa kuti nichakonda Yahova nikokwanira? Neye. Vochita vathu ndivo vingawonese kuti tichakonda Yahova na mtima wathu wose, moyo wathu wose na maganizo yathu yose. (Mateyu 7:16-20) Baibolo ichanena mobveka bwino kuti peno tichakonda Mulungu, tichadekana kubvera malamulo yake. Ko kungashupe kuchita vimwevi? Neye, ndawa ‘malamulo yake ni yosanetesa.’​—Lewengani 1 Yohane 5:3.

⁹ Tikambabvera Yahova tichakhala wakukondwa. (Yesaya 48:17, 18) Koma ko ni chani chingatithandize kuti tipitirize kukhala paushamwali na Yahova? Naboni tiwone.

10. Ndawa chani tichadekana kupitiriza kupfunzira va Yahova?

¹⁰ Ko imwepo mudachinja vinthu viponi kuti mukhale shamwali wa Yahova? Kupfunzira kwanu Baibolo kwakuthandizani kumudziwa bwino Yahova na kukhala naye paushamwali. Ushamwali wanu na Yahova uli ninge moto womwe uchadikana kuwukwinjikira kuti uleke kuthimwa. Moto uchadikana nkhuni kuti upitirize kugaka. Kuti ushamwali wathu na Yahova ukhale wolimba tichadekana kupitiriza kupfunzira va iye. ​—Miyambo 2:1-5.

11. Ko vomwe tichapfunzira mu Baibolo vingatithandize tani?

¹¹ Mukapitiriza kupfunzira Baibolo mudzadziwe mpfundo zomwe zidzakufikeni pamoyo. Ganizirani momwe wopfunzira awiri wa Yesu adabvera pomwe Yesu adawafotokozera ulosi wa m’Baibolo. Iwo adalewa kuti: ‘Ko si pale mitima yathu imbanjenjemera pangayankhula nase pa msewu, na kufotokoza malemba mobveka bwino?’ ​—Luka 24:32.

12, 13. (a) Ko ni chani chingachitike peno munthu waleka kupfunzira va Mulungu? (b) Ko tingachitetani kuti tilimbise ushamwali wathu na Mulungu?

 ¹² Ninga momwe wopfunzira wale adafikiriwa pamoyo nkubvesa mpfundo za m’Malemba, imwepo panango mudabva chibodzi-bodzi pamudayamba kupfunzira mpfundo za m’Baibolo. Vimwevi vidakuthandizani kuti mumudziwe Yahova nakuti muyambe kumukonda. Tinkukhulupirira kuti mungafunelini kuti chikondi mwichi chimale.​—Mateyu 24:12.

¹³ Mukakhala paushamwali na Mulungu, muchadikana kuyesesa kuwulimbisa. Muchadikana kupitiriza kupfunzira va iye na va Yesu, kumbaviganizira na kuwona mwamungaviphatisire basa pamoyo wanu. (Yohane 17:3) Mukambalewenga panango kupfunzira Baibolo muchadikana kudzibvunza kuti: ‘Ko vomwe nalewenga vinkunipfunzisa chani va Yahova Mulungu? Ndawa chani nichadekana kumukonda na mtima wangu wose na moyo wangu wose?’​—1 Timoteyo 4:15.

14. Ko pemphero ingatithandize tani kulimbisa ushamwali wathu na Yahova?

 ¹⁴ Mukakhala na mwanzanu yemwe muchamukonda maninge, muchayesesa kuti nthawe zose mumbayankhule naye. Vimwevi vichathandiza kuti ushamwali wanu ukhale wolimba. Nchibodzi-bodzimbo na ushamwali wanu na Yahova. Tikambayankhula naye m’pemphero thawe zose, ushamwali wathu na iye uchalimba maninge. (Lewengani 1 Atesalonika 5:17.) Pemphero ni mphaso yakudikana maninge yomwe Baba wathu wakudzulu adatipasa. Nthawe zose tichadekana kumbamuwuza vomwe viri kumoyo wathu. (Salimo 62:8) Tichadekanalini kumbandobwerezera mapemphero yabodzi na yabodzi panango kumbapereka mapemphero yondozolowera, koma yachadikana kumbachokera pasi pa moyo. Kupfunzira Baibolo na kupemphera mochokera pasi pa moyo kungatithandize kuti ushamwali wathu na Yahova ukhale wolimba.

15, 16. Ko imwepo muchaiwona tani basa yolalikira?

¹⁵ Panachinthu chinango chomwe tichadekana kuchita peno tichada kukhala pa ushamwali na Yahova. Tichadekana kumbawuza anango vomwe tichakhulupirira. Kuwuza anango va Yahova ni mwayi ukulu maninge. (Luka 1:74) Dziwani kuti Yesu adapereka basa mweyi kwa Akhrisitu chaiwo. Ndipomwapa tose tichadekana kuphata basa mweyi yolalikira ntontholo wabwino wa Ufumu wa Mulungu. Ko imwepo mudayambakale kulalikira?​—Mateyu 24:14; 28:19, 20.

¹⁶ Mtumi Paulo angawona kuti basa yolalikira niyakudikana maninge ndipo adati iyo ni ‘chuma.’ (2 Akorinto 4:7) Palibe basa inango yakudikana maninge kuposha basa yakuwuza wanthu va Yahova na cholinga chake. Mukambachita vimwevi muchakhala kuti munkumutumikira Yahova ndipo iye achatembeja maninge. (Aheberi 6:10) Kuphata basa yolalikira kungathandize imwepo na wanthu womwe ankubvesera ntontholo wanu kukhala paushamwali na Yahova na kudzagumana moyo wosapera. (Lewengani 1 Akorinto  15:58.) Palibe basa inango yaphindu na yakukondwesa ninge imweyi.

17. Ndawa chani basa yakulalikira ichadikana kuphatiwa mwakanfulumize?

¹⁷ Manjewuno, basa yolalikira ichadikana kuphatiwa ‘mwakanfulumize.’ Tichadikana kuphata basa mweyi yolalikira ‘mwakudzipereka.’ (2 Timoteyo 4:2) Wanthu ankudikana kubva va Ufumu wa Mulungu. Baibolo ichati: ‘Ntsiku ikulu ya Yahova iri pafupi. Iri pafupi ndipo inkubwera mwakanfumize maninge.’ Mapeto ‘yachebwelini.’ (Zefaniya 1:14; Habakuku 2:3) Vimwevi vinkuwonesa kuti Yahova adzonge dziko ya Satana manje-manje. Vimwevi vikanati kuchitika, wanthu achadikana kuchenjezewa kuti asalule peno achada kutumikira Yahova.

18. Ko ndawa chani tichadekana kutumikira Yahova pabodzi na Akhrisitu chaiwo?

¹⁸ Yahova achada kuti timbamutumikire pabodzi na Akhrisitu chaiwo. Baibolo ichati: ‘Ndipo tichadekana kuganizirana kuti tilimbikisane pa chikondi na mabasa yabwino. Ayi kuleka kusonkhana pabodzi ninga momwe anango adadjayirira kulova kumisonkhano. Koma naboni tiyingizire kulimbikisana, ninga momwe tinkuwonera kuti ntsiku inkufendera.’ (Aheberi 10:24, 25) Tichadekana kuyesesa kugumanika pamisonkhano yose, ndawa tichalimbikisana pamisonkhano mwaya.

19. Ko ni chani chingatithandize kuti timbakonde abale na alongo wathu wachikhrisitu?

¹⁹ Mukayenda kumisonkhano, mukagumane wanthu womwe adzakhale anzanu chaiwo ndipo ambakulimbikiseni kutumikira Yahova. Mukagumane na abale na alongo wakusiyana-siyana womwe achayesesa kutumikira Yahova. Mwakulingana na imwepo, wanthu mwawa alibembo ungwiro ndipo achaphonyesa vinthu vinango. Peno akakuphonyereni, muchadikana kukhala wokonzeka kuwakhululukira. (Lewengani Akolose 3:13.) Nthawe zose mumbayesese kuwona makhalidwe yabwino yomwe  abale na alongo wanu anayo, ndawa kuchita vimwevi kudzakuthandizeni kuti mumbawakonde nakuti mukhale paushamwali na Yahova.

20, 21. Ko ‘moyo chaiwo’ ni uponi?

²⁰ Yahova achada kuti azishamwali wake wose ambakhale na moyo wabwino maninge. Baibolo ichafotokoza kuti kutsogolo kuno, moyo wathu udzakhale wakusiyana maninge na womwe tinawo manjewuno.

²¹ Panthawe mweyo tidzakhale na moyo mpakana kale-kale, osati magole 70 panango 80 basi. Tidzakondwe na ‘moyo wosapera’ mparadaiso wokomedza ndipo tidzakhale mwantendere, mwakukondwa ndipo tidzadwalelini. Umoyu ndiwo womwe Baibolo ichalewa kuti ni ‘moyo chaiwo.’ Yahova achada kutipasa moyo chaiwo moyu, ndipo ise tichadekana kuyesesa kuti ‘tiwuphatisise namphanvu.’​—1 Timoteyo 6:12, 19.

22. (a) Ko tingachitetani kuti ‘tiwuphatisise namphanvu moyo chaiwo’? (b) Ndawa chani tingalewe kuti moyo moyu tichachitalini kugula?

²² Ko tingachitetani kuti ‘tiwuphatisise namphanvu moyo chaiwo’? Tichadekana ‘kumbachita vabwino’ na kukhala ‘wolemera pa mabasa yabwino.’ (1 Timoteyo 6:18) Vimwevi vinkuthandawuza kuti tichadekana kutewedza vomwe tinkuphunzira m’Baibolo. Koma vinkuthandawuzalini kuti tikachita vimwevi ndiye kuti tagula kale moyo chaiwo. Moyo moyu ni mphaso ya fovolo yomwe Yahova achapereka kwa atumiki wake wokhulupirika ndipo achaupereka ndawa ya ‘kukoma moyo kukulu.’ (Aroma 5:15) Ababa wathu wakudzulu achada maninge kupereka mphaso mweyi kwa atumiki wake wokhulupirika.

23. Ko ndawa chani muchadikana kusalula vinthu mwanzeru manjewuno?

²³ Muchadikana kudzibvunza kuti: ‘Ko inepano nichatumikira Mulungu munjira yomwe iye achada?’ Peno mwawona kuti pachadikana kuchinja vinango, chinjani mwakanfulumize. Tikambayesesa kubvera Yahova na kumuthemba, iye adzakhale malo yathu yobishalirako. Iye achateteza  wanthu wake wokhulupirika mu ntsiku zomalizira mu dziko ya Satana. Patsogolo pake Yahova adzatipase mwayi wokhala na moyo m’paradaiso mpakana kale-kale ninge mwadapolomisira. Mukasalula vinthu mwanzeru mudzakhale na mwayi wakukhala na moyo chaiwo!