1. Ko ni mbani angatiwuze njira chaiyo yopempherera Mulungu?

MATCHETCHI yazinji yachalewa kuti yachapfunzisa wanthu vinthu chaivo va Mulungu. Koma mwaiyi ni bodza ndawa ivo vichapfunzisa vinthu vosiyana maninge pa nkhani yakuti Mulungu ni mbani na momwe tichadekana kumupempherera. Tsono tingayidziwetani njira chaiyo yopempherera Mulungu? Yahova yekha ndiye angatiwuze.

2. Ko tingachitetani kuti tidziwe njira chaiyo yopempherera Mulungu?

² Yahova adatipasa Baibolo kuti itithandize kudziwa njira chayiyo yomupempherera. Ndipomwapa muchadikana kupfunzira Baibolo, ndipo iye adzakuthandizeni kuphindula na vomwe mukupfunzira ndawa achakukondani maninge.​—Yesaya 48:17.

3. Ko nchani chomwe Mulungu achada kuti timbachite?

³ Wanthu azinji achalewa kuti vipembedzo vandokhala njira zizinji zoyenda kumalo yabodzi, koma mwevi nivosiyana na vomwe Yesu adalewa. Iye adati: ‘Sikuti aliyese wochemera ine kuti ‘Ambuya, Ambuya’ adzangene mu Ufumu wa kudzulu ayi, koma wochita vomwe Ababa wangu achada basi.’ Ndipomwapa nivakudikana kudziwa vomwe Mulungu achada nkumbavichita. Nkhani mweyi tichadekanalini kuyitengera masenzeka, ndawa Yesu adati ‘wanthu wosabvera malamulo’ ankupalamula mulandu.​—Mateyu 7:21-23.

4. Fotokozani kusiyana pakati pa nsewu wopapatidza na wophanyuka.

⁴ Yesu adatichenjezeratu kuti tikambayesesa kuchita  vomwe Mulungu achada tidzagumane na mabvuto. Iye adati: ‘Ngenani pansewu wopapatidza. Ndawa nsewu ukulu na wophanyuka uchatsogolera wanthu kuti akachenekewe ndipo wanthu azinji ankufamba mumo. Koma nsewu womwe uchatsogolera wanthu kumoyo ni wopapatidza, ndipo womwe ankuwugumana ni adiki-diki.’ (Mateyu 7:13, 14) Nsewu wopapatidza womwe unkuyimira njira yabwino yopempherera Mulungu, ndiwo ungathandize munthu kudzagumana moyo wosapera. Koma nsewu ukulu womwe unkuyimira njira yosabvumizika popempherera Mulungu uchatsogolera wanthu kukachenekewa. Ndipomwapa Mulungu wapereka mwayi kwa aliyese kuti amudziwe.​—2 Petulo 3:9.

5. Ko tingawadziwe tani womwe achapempherera Mulungu munjira yobvumizika?

⁵ Yesu adalewa kuti nivokwanisika kuwadziwa wanthu womwe achapemphera chaivo. Tingawadziwe pa vochita vawo na vomwe achakhulupirira. Iye adati: ‘Mudzawazindikire na vipaso vawo.’ Iye adalewa pomwe kuti: ‘Muti uliwose wabwino uchabalambo vipaso vabwino.’ (Mateyu 7:16, 17) Koma mwevi vinkuthandawuzalini kuti Akhrisitu chaiwo achaphonyesalini vinthu. Kundoti iwo nthawe zose achayesesa kuchita vinthu vabwino. Naboni manje tikambirane vinthu vomwe vingatithandize kuwadziwa Akhrisitu chaiwo.

6, 7. (a) Ndawa chani Akhrisitu chaiwo achaphatisa basa Baibolo? (b) Ko tinkupfunzira chani pa chitsanzo cha Yesu?

⁶ Vose vachakhulupirira vichachokera mu Baibolo. Baibolo ichati: ‘Malemba yose yadawuziriwa na Mulungu, ndipo yachapasa phindu pa kupfunzisa, kutsuwula, kuthamula vinthu na kulangiza mu chilungamo. Kuti munthu wa Mulungu akhale woyenerera bwino na wakukonzeka mwakukwana kuphata basa iliyose yabwino.’ (2 Timoteyo 3:16,  17) Mtumi Paulo adanembera Akhrisitu kuti: ‘Pomwe mudatambira mawu ya Mulungu yamudayabva kwa ise, mulibe kuyatambira ninge mawu ya munthu neye, koma ninge momwe yaliridi kuti ni mawu ya Mulungu.’ (1 Atesalonika 2:13) Ndipomwapa, atumiki chaiwo wa Mulugnu achaphatisa basa Baibolo popemphera. Iwo achatewedzeralini maganizo ya wanthu panango miyambo, koma mpfundo za m’Baibolo basi.

⁷ Vinthu vose vomwe Yesu angapfunzisa vingachokera m’mawu ya Mulungu. (Lewengani Yohane 17:17.) Kazinji-kazinji iye angashotalini kutomola lemba. (Mateyu 4:4, 7, 10) Atumiki chaiwo wa Mulugnu achatengerambo chitsanzo cha Yesu ndipo vipfunziso vawo vose vichokera m’Baibolo.

8. Ko Yesu adapfunzisa chani pankhani ya kupempherera Yahova?

⁸ Achapempherera Yahova yekha. Lemba ya Salimo 83:18 ichati: ‘Imwepo, womwe dzina yanu ndimwe Yahova, Imwepo ndimwe wapadzululetu pa vinthu vose vapadziko.’ Yesu angada kuti wanthu amudziwe bwino Mulungu chaiye ndawa yakuti iye angapfunzisa dzina ya Mulungu muyo. (Lewengani Yohane 17:6.) Yesu adati: ‘Yahova Mulungu wako ndiye uchadikana kumupempherera, ndipo uchadikana kumbatumikira iye yekha basi.’ (Mateyu 4:10) Ndipomwapa atumiki wa Mulungu achatewedzera chitsanzo cha Yesu. Iwo achapempherera Yahova yekha. Iwo achaphatisa basa dzina yake ndipo achapfunzisa anango va dzina ya Mulungu na vomwe adzachitire wanthu.

9, 10. Ko tichawonesa tani kuti tichakonda wanthu wose?

⁹ Achawonesa chikondi chaicho kwa wanthu. Yesu adapfunzisa wopfunzira wake kuti ambakondane. (Lewengani Yohane 13:35.) Viribe basa kuti ndise wosiyana komwe tidachokera, koma tichakondana, olo kuti ndise wosiyana chikhalidwe, wosawuka panango wolemera. Chikondi chichatithandiza kuti timbawonane ninga  wanthu wa m’banja ibodzi. (Akolose 3:14) Tichayendalini kukamenya nawo nkhondo olo kupha wanthu. Baibolo ichanena kuti: ‘Wana wa Mulungu na wana wa Ndyerekezi achadziwika bwino-bwino na mpfundo iyi: Aliyese yemwe achachitalini vinthu volungama alibe kuchokera kwa Mulungu, nchibodzi-bodzi na munthu yemwe achakondalini m’bale wake.’ Ichanena pomwe kuti: ‘Timbakondane, osati ninge Kaini, yemwe adachokera kwa wakuyipa nkupha m’bale wake.’​—1 Yohane 3:10-12; 4:20, 21.

¹⁰ Tichaphatisa basa mphanvu zathu, nthawe yathu na chuma chathu pakuthandiza abale wathu na kumbalikisana. (Aheberi 10:24, 25) ‘Tichayesesa kuchita vinthu vabwino kwa wanthu wose.’​—Agalatiya 6:10.

11. Ndawa chani tichakhulupirira kuti Yesu ni njira ya Mulungu yopulumusira wanthu?

¹¹ Achakhulupirira kuti Yesu ndiye njira ya Mulungu yopulumusira wanthu. Baibolo ichati: ‘Chipulumuso chichagumanikalini kwa munthu aliyese, ndawa palibe dzina inango pasi pano yomwe yaperekewa kwa ise kuti tipulumusiwe nayo.’ (Machitidwe 4:12) Mu msolo 5 tidapfunzira kuti Yahova adatumiza Yesu padziko yapasi kuti adzapereke moyo wake ninge dipo yowombolera wanthu. (Mateyu 20:28) Yahova adasalula pomwe Yesu kuti adzatonge dziko yapasi. Ndipomwapa Baibolo ichatiwuza kuti tichadekana kubvera Yesu kuti tidzagumane moyo wosapera.​—Lewengani Yohane 3:36.

12. Ndawa chani tichapitiralini mu ndale?

¹² Achapitiralini mu ndale. Yesu ambachitalini nawo vandale. Panthawe yomwe angaimbiwa mulandu, Yesu adawuza wolamulira munango wachiroma dzina yake Pilato kuti: ‘Ufumu wangu ulilini kusaidi ya dziko ino.’ (Lewengani Yohane 18:36.) Isembo tichakhulupirika maninge ku Ufumu wa Mulungu ndipomwapa tichapindiralini mu ndale. Olo kuti viritene, Baibolo ichatilamula kuti timbabvere ‘olamulira akulu-akulu,’ omwe ni  maboma ya wanthu. (Aroma 13:1) Tichabvera malamulo ya mudziko yomwe tichakhala. Koma sikuti tindobvera virivose. Yakakhala yosabverana na malamulo ya Mulungu, tichatewedzera atumi omwe adalewa kuti: ‘Tichadekana kubvera Mulungu ninga wolamulira osati wanthu.’ —Machitidwe 5:29; Maliko 12:17.

13. Ko ni vinthu viponi vomwe tichalalikira va Ufumu wa Mulungu?

¹³ Achalalikira kuti Ufumu wa Mulungu ndiwo wokha womwe udzamalise mabvuto yose padziko. Yesu adanena kuti: ‘Ntontholo wabwino moyu wa Ufumu’ uchadikana kulalikiriwa padziko yose yapasi. (Lewengani Mateyu 24:14.) Palibe boma iliyose ya wanthu yomwe ingakwanise kutichitira vomwe Ufumu wa Mulungu udzatichitire. (Salimo 146:3) Yesu adatipfunzisa kuti timbapempherere Ufumu wa Mulungu pomwe adanena kuti: ‘Ufumu wanu ubwere. Vamuchada vichitike ninga kudzulu, chibodzi-bodzi pasi pano.’ (Mateyu 6:10) Baibolo ichatiwuza kuti Ufumu wa Mulungu udzacheneke maboma yose ya wanthu ndipo ‘udzakhale mpaka kale-kale.’​—Danieli 2:44.

14. Ko imwepo munkuwona kuti ni mbani womwe achapempherera Mulungu munjira yomwe iye achada?

¹⁴ Patamaliza kukambirana mpfundo zimwezi, dzibvunzeni kuti: ‘Ko ni wanthu wa muchipembedzo chiponi womwe achapfunzisa vinthu vochokera m’Baibolo vokha-vokha? Ko ni wanthu aponi omwe achawuza anango va dzina ya Mulungu? Ko ni mbani womwe achawonesana chikondi chayicho, ndipo achakhulupirira kuti Mulungu adatumiza Yesu kudzatipulumusa? Ko ni mbani womwe achapitiralini mu nkhani za ndale? Ko ni mbani womwe achachalalikira kuti Ufumu wa Mulungu ndiwo wokha womwe udzamalise mabvuto ya wanthu?’ Ni Mboni za Yahova basi.​—Yesaya 43:10-12.

15. Ko tichadekana kuchita chani kuti timbapemphere munjira yomwe Mulungu achada?

¹⁵ Kundokhulupirira kuti Mulungu aliko nikokwaniralini ndawa navombo viwanda vichakhulupirira kuti Mulungu aliko, koma vichamubveralini. (Yakobo 2:19) Peno tichada kuti Mulungu abvumize kupemphera kwathu,  tichadekana kumbamubvera.

16. Ndawa chani tichadekana kubula mu chipembedzo chonyenga?

¹⁶ Kuti Mulungu ambabvume kupemphera kwathu, tichadekana kubula muchipembedzo chonyenga. M’neneri Yesaya adanemba kuti: ‘Chokani pakati pake! Khalani wakuchena.’ (Yesaya 52:11; 2 Akorinto 6:17) Mwakubverana na mwevi, tichadikana kusiya chilichose chobverana na chipembedzo chonyenga.

17, 18. Ko ‘Babulo nkulu’ nchani, ndipo ndawa chani wanthu achadikana kubulamo mwakankulumize?

¹⁷ Chipembedzo chakunama ni chilichose chomwe chichapfunzisa vinthu vosiyana na vomwe vili m’mawu ya Mulungu. Baibolo ichachemera vipembedzo vose vakunama kuti ni ‘Babulo nkulu.’ (Chivumbulutso 17:5) Ndawa chani adavipasa dzina mweyi? Pachidapita chigumula cha Nowa, wanthu wa muthawundi ya Babulo adayamba kumbapfunzisa vinthu vizinji vabodza. Vinthu vomwe angapfunzisaivo vidayamba kuwanda padziko yose yapasi. Mwakulinganiza, wanthu wa kubabulo, angapempherera milungu yomwe ingakhalapo itatu-itatu. Ntsiku zathu zino, matchetchi yazinji yachapfunzisa kuti pana milungu itatu pa mulungu m’bodzi. Koma Baibolo ichapfunzisa kuti pali Mulungu m’bodzi chayiye, Yahova, ndipo Yesu ni mwana wake. (Yohane 17:3) Wanthu wa ku Babulo angakhulupirira pomwe kuti munthu akafa pali chinthu chinango chomwe chichapitiriza kukhala na moyo, ndipo chomwe chichakhala, chichayenda kukadzudzika ku moto. Koma mweyi ni bodza.​—Wonani mawu yakumapeto 14, 17 na 18.

¹⁸ Mulungu adaneneratu kuti vipembedzo vose vakunama vichenekewe manje-manje. (Chivumbulutso 18:8) Ndawa ya vimwevi muchadikana kubula mwakankulumize mu chipembedzo chakunama. Yahova Mulungu ankuda kuti mubule mu chipembedzo mwechi nthawe idakalipo. ​—Chivumbulutso 18:4.

19. Ko Yahova adzakusamaleni tani mukasalula kumutumikira?

¹⁹ Mukasalula kubula muchipembedzo chakunama nkuyamba  kutumikira Yahova, anzanu na azibale wanu angakondwerelini navo ndipo angambakushupeni. Koma Yahova adzakusiyenilini. Mudzangene m’banja yomwe inawanthu mamiliyoni yazinji omwe achakondana. Mudzakhale pomwe na mwayi wokhala na moyo wosapera mudziko inyowani. (Maliko 10:28-30) Panango kutsogolo anzanu na abale wanu womwe ankukushupani ndawa yakuti mudasalula kutumikira Yahova angadzayambe kupfunzira Baibolo.

20. Ko ndawa chani tichadekana kupempherera Mulungu munjira chaiyo?

²⁰ Manje-manje, Mulungu adzonge wanthu wose wakuyipa, ndipo Ufumu wake udzayambe kutonga dziko yose yapasi. (2 Petulo 3:9, 13) Nthawe mweyi idzakhale yakukondwesa maninge. Panthawe mweyo wanthu wose ambadzapempherere Yahova munjira yomwe munichiro achada. Ndipomwapa nthawe ino, ni nthawe yakudikana yakuti muyambe kutumikira Mulungu munjira chaiyo.