1. Ko Mulungu adawasikiranyi wanthu?

POMWE Mulungu angasika wanthu, wenze na cholinga chabwino maninge. Iye adasika Adamu na Hava kuti ambakhale m’munda wokomedza maninge. Angada kuti wanthu mwawa abale wana, akonze dziko kuti ikhale paradaiso na kusamalira vinyama. —Genesis 1:28; 2:8, 9, 15; wonani mawu yakumapeto 6.

2. (a) Nchani chinkutitsimikizira kuti wanthu adzakhale mu paradaiso? (b) Ko Baibolo ichati ni wanthu aponi omwe adzakhale na moyo wosapera?

² Ko imwepo muchawona kuti vomwe Mulungu angada kuti dziko ikhale paradaiso vidzachitike? Yahova achatiwuza kuti: ‘Ine nidapolomisa, ndipo nidzavikwanirise.’ (Yesaya 46:9-11; 55:11) Mawu mwaya yachawonesa kuti vose vomwe Mulungu achada vidzachitike ndipo palibe chingamukangise. Yahova achati dziko adaikonza na cholinga. Iye ‘alibe kuyisika alibe cholinga.’ (Yesaya 45:18) Iye adasika dziko kuti wanthu ambakhalemo. Ko Mulungu achada kuti mukhale wanthu wotani? Ndipo kwa nthawe itali tani? Baibolo ichati: ‘Wolungama [panango kuti wobvera] adzatambire dziko yapasi ndipo adzakhalemo mpakana kale-kale.’​—Salimo 37:29; Chivumbulutso 21:3, 4.

3. Ko ni mbvunzo uponi womwe ni Baibolo yokha ingadawire?

³ Koma ntsiku zino wanthu achadwala na kufa. M’madziko yazinji wanthu achamenyana na kuphana. Vimwevi ndivolini vomwe Mulungu angada. Ko nchani chidachitika? Baibolo yokha ndiyo ingadawire mbvunzo moyu.

4, 5. (a) Ni mbani adayankhula na Hava pophatisira basa nyoka m’munda wa Edeni? (b) Nchani chingachitise munthu wabwino-bwino kuchinja nkukhala mbava?

⁴ Baibolo ichanena kuti panam’zondi wa Mulungu yemwe ‘dzina yake ni Satana Ndyerekezi.’ Satana adaphatisira basa nyoka pakuyankhula na Hava m’munda wa Edeni. (Chivumbulutso 12:9; Genesis 3:1) Satana ndiye adachitisa kuti nyoka imbawoneke ninge inkuyankhula.​—Wonani mawu yakumapeto 7.

⁵ Ko Mulungu ndiye adalenga Satana Ndyerekezi? Neye. M’ngelo munango yemwe angali kudzulu pomwe Mulungu angalenga dziko yapasi kuti Adamu na Hava ambakhalemo, adachinja nkukhala Ndyerekezi. (Yobu 38:4, 7) Ko mwevi vidakwanisika tani? Vomwe vidachitika ni volingana na momwe munthu wabwino, angachinjire nkukhala mbava. Munthu achabadwalini mbava. Koma akayamba kukhumbira chinthu cha munichiro nkumbandochiganizira, maganizo mwaya yangakule, ndipo akadzagumana mpata angadzabe. Umu ni momwe munthu wabwino-bwino angachinjire nkukhala mbava.​—Lewengani Yakobo 1:13-15; wonani mawu yakumapeto 8.

6. Ko vidakwanisika tani kuti m’ngelo munango achinje nkukhala m’zondi wa Mulungu?

⁶ Ivi ni vomwe m’ngelo moyu adachita. Pomwe Yahova adalenga Adamu na Hava, adawauza kuti abale wana ndipo ‘adzadze dziko yapasi.’ (Genesis 1:27, 28) Panango m’ngelo moyu angakumbuka kuti, ‘vingadzakhale bwino kuti wanthu mwawa ambadzapempherere ine osati Yahova.’ Maganizo mwaya yadakula m’moyo mwake, mpakana adayamba kukhumbira ulamuliro wa Yahova. M’ngelo moyu angada kuti wanthu achinje ambapempherere iye. Iye adawuza Hava vinthu vabodza vomwe vidamuchitisa hava kusabvera Mulungu. (Lewengani Genesis 3:1-5.) Vochita va m’ngelo moyu ndivo vidamuchitisa kuti akhale Satana Ndyerekezi na m’dani wa Mulungu.

7. (a) Ndawa chani Adamu na Hava adafa? (b) Ndawa chani ise tichakalamba na kufa?

⁷ Adamu na Hava adapandukira Mulungu ndipo adadya chipatso chomwe enze adalambiziwa.  (Genesis 2:17; 3:6) Mweyi ndiyo tchimo yadachita. Padadya, iwo adakhala wochimwa ndipo nkupinda kwa nthawe adafa ninge momwe Yahova adawawuzira pakuyamba. (Genesis 3:17-19) Adamu na Hava adabala wana alikale wochimwa, ndipomwapa wanthu achafa. (Lewengani Aroma 5:12.) Kuti tibvese bwino tilinganize tene: Imwepo munachikombole chowumbira vidina koma icho ni chobenda. Ko munkuganiza kuti vidina vose vingabule muchikombole mwechi vingakhalembolini vobenda? Mwakulingana na mwevi, pomwe Adamu na Hava adachimwa, adakhala na chilema. Ise tose tidachokera kwa iwo ninge ‘chikombole’ chathu. Ndipomwapa tichabadwa ochimwa, tichakalamba na kufa. —Aroma 3:23; wonani mawu yakumapeto 9.

8, 9. (a) Ko Satana angada kuti Adamu na Hava ambawone kuti Mulungu ni wotani? (b) Ndawa chani Mulungu alibe kuwapheratu wopanduka nthawe mweyo?

⁸ Satana adachitisa Adamu na Hava kusabvera Mulungu, ndawa ya vimwevi adayambisa kagulu kopandukira ulamuliro wa Mulungu. Iye angada kuti Adamu na Hava ambawone kuti Yahova ni wabodza, achatongalini bwino ndipo achadalini kuti vinthu vimbawafambire bwino wanthu. Ambawone soti kuti wanthu achadikanalini kuti Mulungu ambawawuze vochita. Satana adati Adamu na Hava achadikana kumbasalula wokha vomwe achawona kuti ni vabwino panango voyipa. Ko Mulungu adachita chani? Iye adakakwanisa kuwapha opanduka mwawa nthawe mweyo. Koma ko vimwevi vidakawonesa kuti vomwe Satana anganena ni vabodza? Neye.

⁹ Ndipomwapa Yahova alibe kuwapha wopanduka nthawe mweyo. Iye adawona kuti pachadikana kupita nthawe wanthu ankudzitonga wokha. Vimwevi vidapereka mpata woti wanthu atsimikizire kuti Satana ni wabodza nakuti Yahova ndiye achadziwa vinthu vomwe wanthu achadikana. Tidzabve vizinji pankhani mweyi mu msolo 11. Ko munkuwona kuti Adamu adachita vabwino? Ko  adachita bwino kubvera Satana osati Mulungu? Vinthu vose vomwe Adamu na Hava enze navo adapasiwa na Mulungu. Adawapasa moyo wabwino, malo yokomedza yakuti akhalepo, na basa yokondwesa. Koma palibe chabwino chomwe Satana adawapasako. Mudakakhala kuti imwepo mwenzepo nthawe mweyo mudakachita chani?

10. Ko manjewuno aliyese achadikana kusalula chani?

 ¹⁰ Ntsiku zino, aliyese wa ise achadikana kusalula vomwe angachite, ndawa moyo wathu uchathemba pa vomwe tingasalule manjewuno. Tingasalule kubvera Yahova kuti ambatitonge ndipo vimwevi vingatithandize kuwonesa kuti Satana ni wabodza. Tingasalule soti kutongewa na Satana peno tichada. (Salimo 73:28; lewengani Miyambo 27:11.) Ntsiku zino ni wanthu adiki-diki womwe achabvera Mulungu. Viritene ndawa ankutonga dziko ni Satana. Koma ko vimwevi ndivo vomwe Baibolo ichanena?

11, 12. (a) Ko vomwe Satana adanena pakuwuza Yesu kuti amupase mawufumu yapadziko yapasi, vikuwonesa chani? (b) Ko ni malemba yati yankuwonesa kuti Satana ndiyedi ankutonga dziko?

¹¹ Yesu angadziwa kuti Satana ndiye ankutonga dziko. Pa nthawe inango Satana adawonesa Yesu ‘mawufumu yose yapadziko na ulemerero wake.’ Pamwapo adamupolomisa kuti: ‘Nikupaseni vinthu vose mwevi mukandonigwadirako na kunijolimira kabodzi basi.’ (Mateyu 4:8, 9; Luka 4:5, 6) Vidakakhala kuti mawufumu mwaya ni yakelini Satana, ko adakamuwuza Yesu kuti nikupase? Neye. Vimwevi vinkuwonesa kuti maboma yose yapadziko yapasi yali m’manja mwa Satana.

¹² Panango imwepo munkudabwa kuti, ‘ndawa chani Satana ndiye ankutonga dziko? Ko si Yahova wamphanvu zose yemwe adasika vinthu vose?’ (Chivumbulutso 4:11) Inde ndiye. Koma Yesu adaleweratu kuti Satana ndiye ‘wolamulira wa dziko.’ (Yohane 12:31; 14:30; 16:11) Mtumi Paulo adachemera Satana kuti ‘mulungu wa nthawe ino.’ (2 Akorinto 4:3, 4) Ndipo mtumi Yohane adanemba pomwe va iye kuti ‘dziko yose ili m’manja mwa wakuyipa.’​—1 Yohane 5:19.

13. Ndawa chani tichadekana dziko inyowani?

¹³ Dziko inkuyenda  ichiyipira-yipira. M’madera yazinji munkuchitika nkhondo, chinyengo na ugananga. Podi kuti wanthu ayeseretani, angakwaniseilini kumalisa mabvuto mwaya. Koma tsontsono Mulungu adzacheneke dziko ya Satana pa nkhondo ya Arumagedo achikhazikisa dziko yachilungamo.​—Chivumbulutso 16:14-16; wonani mawu yakumapeto 10.

14. (a) Ko Mulungu adasalula mbani kuti akhale Mfumu ya Ufumu wake? (b) Ko Baibolo idaneneratu chani va Yesu?

¹⁴ Yahova adasalula Yesu Khrisitu kuti akhale Mpfumu ya Ufumu wake. Papinda magole yazinji Baibolo yalewa kale kuti Yesu ‘adzatonge mwantendere’ ndipo boma yake idzaperelini. (Yesaya 9:6, 7) Yesu adapfunzisa ateweri wake kuti ambapempherere boma mweyi. Iye adawawuza kuti ambapemphere tene: ‘Ufumu wanu ubwere. Kuda kwanu kuchitike ninge kudzulu, chibodzi-bodzi pasi pano.’ (Mateyu 6:10) Mu msolo 8 tidzapfunzire momwe Ufumu wa Mulungu udzayambire kutonga padziko yose. (Lewengani Danieli 2:44.) Ndipo Ufumu moyu udzachitise kuti dziko yose ikhale paradaiso wabwino maninge.​—Wonani mawu yakumapeto 11.

15. Ko ‘dziko inyowani’ ni chani?

¹⁵ Baibolo idapolomisa kuti: ‘Pali kudzulu kwanyowani na dziko yapasi yanyowani vomwe ise tinkudikhira,’ ndipo ‘mumo mudzakhale chilungamo.’ (2 Petulo 3:13; Yesaya 65:17) Nthawe zizinji Baibolo ikambalewa va ‘dziko,’ ichanena va wanthu omwe ali padziko. (Genesis 11:1) Baibolo ikambati ‘dziko yanyowani,’ inkulewalini malo yanango. Tsono ‘dziko yanyowani’ ni chani? Ni wanthu wobvera omwe Mulungu adzawadalise powapasa paradaiso.

16. (a) Ko ni mphaso yabwino iponi yomwe Mulungu adzawapase wanthu mu dziko inyowani? (b) Ko tichadekana kuchita chani kuti tidzatambire mphaso mweyi?

 ¹⁶ Yesu adapolomisa kuti womwe adzakhale mu dziko inyowani adzapasiwe ‘moyo wosapera.’ (Maliko 10:30) Ko tichadekana kuchita chani kuti tidzatambire mphaso mweyi? Kuti mugumane m’dawiro, lewengani Yohane 3:16 na 17:3. Manje naboni tiwone vomwe Baibolo ichanena momwe moyo udzakhalire m’paradaiso.

17, 18. Ko tinkudziwa tani kuti padziko yose padzakhale ntendere na chitetezo?

¹⁷ Nkhondo, kusabvera malamulo, ugananga na vinthu vose voyipa vidzapere. Padziko yapasi padzagumanikelini wanthu woyipa. (Salimo 37:10, 11) Mulungu ‘adzamalise nkhondo mpakana kumalekedzero ya dziko yapasi.’ (Salimo 46:9; Yesaya 2:4) Dziko yapasi idzadzale na wanthu womwe achakonda Mulungu na kumubvera. Padziko yose padzakhale ntendere mpakana kale-kale.​—Salimo 72:7.

¹⁸ Wanthu wa Yahova adzakhale wotetezeka. Kale-kale Aizilayeli akambabvera Mulungu, angakhala pantendere ndawa Mulungu angawateteza. (Levitiko 25:18, 19) Mu paradaiso tidzagopelini chinthu panango munthu. Nthawe zose tidzakhale wotetezeka! ​—Lewengani Yesaya 32:18; Mika 4:4.

19. Ndawa chani tinkutitsimikizira kuti padziko yose padzakhale chakudya chizinji?

¹⁹ Aliyese adzakhale na chakudya chizinji. ‘Padziko yapasi padzakhale tirigu uzinji. Padzulu pa mapiri padzakhale tirigu uzinji.’ (Salimo 72:16) Yahova yemwe ni ‘Mulungu wathu adzatidalise’ ndipo ‘dziko yapasi idzabale vipaso vake.’​—Salimo 67:6.

20. Ko tinkudziwa tani kuti dziko yose idzakhale paradaiso?

²⁰ Dziko yose idzakhale paradaiso. Wanthu adzakhale na nyumba zabwino na malo yokomedza. (Lewengani Yesaya  65:21-24; Chivumbulutso 11:18.) Dziko yose idzakhale yokhuza ninge mwewenzere munda wa Edeni. Yahova adzatipase vose vatichada. Baibolo ichanena kuti Yahova ‘achapfuthula djanja yake nkukhutirisa shungu ya chamoyo chilichose.’​—Salimo 145:16.

21. Ko tinkudziwa tani kuti wanthu adzakhale pantendere na vinyama?

²¹ Wanthu adzakhale pantendere na vinyama. Vinyama vidzadzongelini wanthu. Wana adiki adzagopelini kusenzeka na vinyama vomwe ntsiku zino ni vopasa mantha.​—Lewengani Yesaya 11:6-9; 65:25.

22. Ko Yesu adzawachitire chani wose wodwala?

²² Palibe wati adzadwale. Yesu ali padziko yapasi adachiza wanthu azinji. (Mateyu 9:35; Maliko 1:40-42; Yohane 5:5-9) Koma ninge Mpfumu ya Ufumu wa Mulungu, Yesu adzachize wanthu wose. Panthawe mwiyo palibe adzanene kuti: ‘Ninkudwala.’​—Yesaya 33:24; 35:5, 6.

23. Ko Mulungu adzawachitire chani wanthu omwe adafa?

²³ Wanthu womwe adafa adzakhale soti na moyo. Mulungu ankupolomisa kuti wanthu azinji omwe adafa adzawamukise. ‘Kudzakhale kumukisiwa kwa wolungama na wosalungama.’​—Lewengani Yohane 5:28, 29; Machitidwe 24:15.

24. Ko muchabva tani mukaganizira kuti mudzakhale mu paradaiso?

²⁴ Tose tina ufulu wosalula kupfunzira va Yahova nkumbamutumikira panango neye. Peno tasalula kutumikira Yahova, tingadikhirire kudzakhala na moyo wabwino maninge kutsogolo. Yesu adawuza munthu yemwe adamanikiwa naye pabodzi kuti: ‘Iwepo udzakhale na ine mu paradaiso.’ (Luka 23:43) Tidzapfunzire vizinji va Yesu na momwe adzachitisire kuti vabwino vomwe Mulungu adapolomisa vikwanisike.