MSOLO 6
Ko tikafa tichayenda kuti?
1-3. Ko ni mibvunzo yati yomwe wanthu achakhala nayo yonena va wakufa, ndipo vipembedzo vinango vichadawira tani mibvunzo mwaya?
BAIBOLO ichatipolomisa kuti ntsiku inango ‘kudzakhalelini soti impfa.’ (Chivumbulutso 21:4) Mu msolo 5, tidapfunzira kuti dipo idachitisa kuti vikhale vokwanisika kudzakhala na moyo wosapera. Koma wanthu adakafa basi. (Mlaliki 9:5) Vimwevi vichatichititsa kuti timbadzibvunze kuti ‘ko munthu akafa achayenda kuti?’
2 Mdawiro wa mbvunzo moyu uchakhala wakudikana maninge tikaferewa munthu wapamoyo. Tingakanganisike nkumbadzibvunza kuti: ‘Wayenda kuponi? Iye ankutiwona? Angakwanise kutithandiza? Tidzamuwone soti?’
3 Vipembedzo vizinji vichadawira mibvunzo mwaya mwakusiyana-siyana. Vinango vichapfunzisa kuti peno munthu angachita vinthu vabwino, akafa achayenda kudzulu, peno angachita voyipa achayenda kumoto. Vinango vichati achasanduka mzimu ndipo achayenda kukakhala pabodzi na abereki wake womwe adafa kale-kale. Ndipo vinango vichati achayenda kunango kukabadwa soti ninge munthu panango chinyama.
4. Ko vipembedzo vose vichapfunzisa mpfundo ibodzi iponi yonena va impfa?
4 Vipembedzo vichapfunzisa vinthu vosiyana maninge pa nkhani mweyi. Koma pafupi-fupi vipembedzo vose vichapfunzisa mpfundo ibodzi. Ivo vichapfunzisa kuti munthu akafa, mbali inango ya thupi yake ichapitiriza kukhala na moyo. Ko vimwevi ni shuwadi?
KO MUNTHU AKAFA ACHAYENDA KUPONI?
5, 6. Ko vichatikhalira tani tikafa?
5 Yahova achadziwa chomwe chichachitika ise tikafa, ndipo iye achatiwuza kuti munthu akafa, moyo wake uchapera. Impfa ni yakusiyana na moyo. Munthu akafa, nzeru zake na maganizo yake yachaperera mwapo. * Tikafa tingakwaniselini kuwona, kubva olo kuganiza chinthu.
6 Mpfumu Solomo adanemba kuti ‘wakufa achadziwalini chilichose.’ Wakufa angatikondelini olo kuyipidwa nase, ndipo ‘kulibe kuphata basa, kudziwa vinthu olo nzeru Kumanda.’ (Lewengani Mlaliki 9:5, 6, 10.) Pa Salimo 146:4, Baibolo ichatiwuza kuti munthu akafa, ‘nzeru zake’ zichafambo.
KO YESU ADATI CHANI PA NKHANI YA IMPFA?
Yahova adasika wanthu kuti ambakhale kosapera padziko yapasi
7. Ko Yesu adati chani pa nkhani ya impfa?
7 Shamwali wake Lazaro padafa, Yesu adawuza opfunzira wake kuti: ‘Shamwali wathu Lazaro ankugona.’ Koma Yesu angathandawuzalini kuti Lazaro angapuma. Patsogolo pake Yesu adalewa kuti: ‘Lazaro wafa.’ (Yohane 11:11-14) Apa Yesu adalinganiza impfa na tulo. Iye alibe kunena kuti Lazaro wenze kudzulu olo kuti wenze na abereki wake womwe adafa kale-kale. Ndipo alibe kulewa kuti Lazaro angaboneresewa ku gehena olo kuti wenze adabadwa ninge munthu munango olo ninge nyama. Koma venze ninge wagona tulo twakufa nato. Malemba yanango yachalinganiza impfa na tulo twakufa nato. Ndipo Baibolo ichati Setefano padaphewa, ‘adagona mu impfa.’ (Machitidwe 7:60) Mtumi Paulo adanembambo kuti Akhrisitu anango ‘adagona mu impfa.’—1 Akorinto 15:6.
8. Ko tinkudziwa tani kuti Yahova alibe kusika wanthu kuti ambafe?
8 Ko Mulungu dasika Adamu na Hava kuti patsogolo pake adzafe? Neye! Yahova adawasika kuti ambakondwe na moyo wangwiro wosapera mpakana kale-kale. Pomwe Yahova adasika wanthu, iye adawapasa shungu yakuda kukhala na moyo mpakana kale-kale. (Mlaliki 3:11) Abereki angakondwelini kumbawona wana wawo ankukalamba achifa. Yahova achabvambo chibodzi-bodzi akambatiwona. Peno Yahova alibe kutisika kuti timbafe, ndawa yanyi tsono tinkufa?
NDAWA CHANI TICHAFA?
9. Ndawa chani tingalewe kuti lamulo yomwe Yahova adapereka kwa Adamu na Hava yenze yosashupa?
9 M’munda wa Edeni, Yahova adamuwuziratu Adamu kuti: ‘Vipaso va m’miti yose yomwe yali m’munda ungadye. Koma va m’muti wodziwisa chabwino na choyipa, ayi kuti udye, ndawa ntsiku yati udzadye udzafe.’ (Genesis 2:9, 16, 17) Lamulo mweyi yenze yosashupa kutewedza, ndipo Yahova ndiye wenze na udindo wa kuwuza Adamu na Hava vinthu vomwe venze vabwino na vakuyipa. Adakabvera Yahova, adakawonesa kuti ankulemekeza ulamuliro wake. Adakawonesa soti kuti ankutembeja pa vinthu vose vabwino vomwe Yahova adawapasa.
10, 11. (a) Ko Satana adawanamiza tani adamu na Hava? (b) Ko ndawa chani tingati iwo enze alibe vifukwa vobveka pa vomwe adachita?
10 Mosayembekezereka Adamu na Hava adasalula kusabvera Yahova. Satana adawuza Hava kuti: ‘Ko ni shuwadi kuti Mulungu adakuwuzani kuti ayi kudya vipaso vose va m’munda moyu?’ Hava adadawira kuti: ‘Adatiwuza kuti vipaso vose va munda tidye. Koma Mulungu adatiwuza kuti muti womwe uli pakati pa munda: ‘Ayi kuti mudye vipaso vake, ayi kumuphata, ndawa ntsiku yati mudzadye mudzafe.’’—Genesis 3:1-3.
11 Pamwapo Satana adati: ‘Imwepo chipo mudzafelini. Mulungu ankudziwa kuti ntsiku yati mudzadye, maso yanu yadzafunguke ndipo mudzalingane na Mulungu, muchidziwa vabwino na voyipa.’ (Genesis 3:4-6) Satana angada kuti Hava aganize kuti angakwanise kumbasalula yekha vomwe ni vabwino na vomwe nivoyipa. Ndipo pa nthawe ibodzi-bodziyo adamunamiza kuti angafelini. Hava adadya chipaso ndipo adapasambo mwamuna wake . Adamu na Hava angadziwa kuti Yahova adawawuza kuti ayi kuti adye chipaso. Pomwe iwo adadya, adasalula kusabvera lamulo yosashupa. Mwakudya chipaso mwechi adawoneseratu kuti angalemekezalini Baba wawo wachikondi. Iwo enze alibe vifukwa vobveka pa vomwe adachita!
12. Ndawa chani tingalewe kuti ni vokwinyilirisa maninge kuti Adamu na Hava alibe kubvera Yahova?
12 Ni vakupasa ntsisi kuti abereki wathu woyambirira alibe kubvera Mulengi wawo. Mwakulinganiza, ko mungabvetani wana wanu pamuyi akaleka kumbakubverani nkumbachita vinthu votsutsana namwe? Ni vosachita kubvunza kuti mungakwinyirire maninge.
Adamu adachokera kupfumbi, ndipo adabwerera soti kupfumbi muko
13. Ko Yahova angathandawuza chani padalewa kuti ‘kupfumbi muko udzabwerere’?
13 Pomwe iwo alibe kubvera, adaluza mwayi wakukhala mpakana kale-kale. Yahova adawuza Adamu kuti: ‘Pakuti ndiwe mpfumbi kupfumbi muko udzabwerere.’ (Lewengani Genesis 3:19.) Kuthandawuza kuti Adamu adakakhala soti pfumbi, ninge mwevenzere akanati kusikiwa. (Genesis 2:7) Adamu padachimwa, adafa ndipo iye kulibe.
14. Ndawa chani tichafa?
14 Adamu na Hava adakabvera Mulungu, sembe anamoyo mpakana tsiku zino. Koma pakuti alibe kumubvera, iwo adachimwa ndipo adafa. Uchimo uli ninge matenda yakulu yomwe tidatengera kwa abereki wathu woyambirira. Munthu aliyese achabadwa ali wochimwa, ndipomwapa tichafa. (Aroma 5:12) Koma mwechi ndicholini chakulinga cha Mulungu kwa wanthu. Mulungu chipo achadalini kuti wanthu timbafe. Baibolo ichachemera impfa kuti ni ‘m’zondi.’—1 Akorinto 15:26.
CHOWONADI CHICHATIMASULA
15. Ko kudziwa chaivo pankhani ya impfa, kungatithandize tani kukhala womasuka?
15 Kudziwa chaivo pankhani ya impfa kuchatimasula ku mabodza. Baibolo ichatipfunzisa kuti wakufa achabvalini kuwawa olo kukwinyirira. Na iwo tingayankhulanelini olo kuthandizana. Iwo angatidzongelini, ndipomwapa ayi kuti timbawagope. Koma vipembedzo vizinji vichapfunzisa kuti munthu akafa achapitiriza kukhala na moyo kunango ndipo tingamuthandize tikambapereka mali kwa azitsogoleri wa vipembedzo panango kwa wanthu omwe achawonewa ninge wochena kuti amupempherere. Koma tikadziwa chaivo palibe angatinamize.
16. Ko ni mabodza yati yomwe vipembedzo vizinji vichapfunzisa pa nkhani ya wakufa?
16 Satana achaphatisira basa vipembedzo vonama kuti atinamize kuti wakufa ali moyo. Mwakulinganiza, vipembedzo vinango vichapfunzisa kuti tikafa, mbali yathu yathupi ichapitiriza kukhala na moyo kunango. Ko ndivo vomwe chipembedzo chanu chichapfunzisa, o panango chichapfunzisa vomwe Baibolo ichanena pa nkhani ya impfa? Satana ankusewenzesa mabodza mwaya kuti afutuse wanthu kwa Yahova.
17. Ndawa chani tingalewe kuti nzeru yakuwotcha wanthu kumoto ichanyozesa Yahova?
17 Vomwe vipembedzo vizinji vichapfunzisa vichawawisa moyo. Mwakulinganiza, vinango vichapfunzisa kuti wanthu wakuyipa achawotchewa kumoto wa gehena mpaka kale-kale. Bodza mweyi ichanyozesa Yahova. Iye angabonereselini wanthu mwa khayindi mweyi! (Lewengani 1 Yohane 4:8.) Ko mungabve tani kuwona munthu ankuwotcha mwana wake manja pamoto? Imwepo mungati ni wabwino moyo munthu moyu? Mungafune kukhala naye pachishamwali munthu watene? Tsono Satana achada kuti ise timbamuwone tene Yahova!
18. Ndawa chani tichadekanalini kugopa wakufa?
18 Vipembedzo vinango vichapfunzisa kuti munthu akafa, achakhala mzimu. Vichapfunzisa kuti tichadekana kulemekeza mizimu na kuyigopa ndawa iyo yangakhale shamwali panango adani wathu. Wanthu azinji achakhulupirira bodza mweyi. Iwo achagopa wakufa mpakana kuwapempherera m’malo mopempherera Yahova. Koma timbakumbukire kuti wakufa achabvalini chinthu olo kuganiza chilichose, ndipo tisambawagope. Yahova ndiye adatisika. Iye ni Mulungu chaiye, ndipo tichadikana kupempherera iye yekha basi.—Chivumbulutso 4:11.
19. Ko kudziwa chaivo pa nkhani ya impfa kungatithandize tani?
19 Tikadziwa chaivo pa nkhani ya wakufa, tidzanamiziwelini na vipembedzo vonama. Chowonadi chingatithandize kubvesesa mapolomisi yosangalasa yomwe Yahova wanena pankhani ya moyo wathu na tsogolo yathu.
20. Ko tidzapfunzire chani mu msolo wakutsogolo?
20 Kale-kale, mtumiki wa Mulungu dzina yake Yobu adabvunza kuti: ‘Ko munthu akafa, angadzakhale soti na moyo?’ (Yobu 14:14) Apa ni shuwadi kuti munthu yemwe adafa kale-kale adzakhale soti na moyo? Mulungu ankutidawira chaivo m’Baibolo. Mu msolo wapatsogolo tidzapfunzire nkhani mweyi.
^ ndi. 5 Wanthu anango achakhulupirira kuti munthu akafa, mzimu uchapitiriza kukhala na moyo. Kuti mudziwe vizinji, wonani Mawu yakumapeto 17 na 18.
