Gulu yathu ichakonza na kugawira Baibolo mamiliyoni yazinji na mabukhu yanango padziko yose fovolo. Tichakonza na kusamalira Nyumba za Ufumu na nthambi zathu. Tichasamalira mamiliyoni ya abale womwe ankutumikira mu mabeteli na amishonale, tichathandiza kukachitika ngozi zachilengedwe. Panango imwepo mungadzibvunze kuti: ‘Ko mali mwizi tichazigumana kuponi?’

Vose tichalipirisalini, tiperekalini chakhumi ne kufambisa peleti ya mali. Podi kuti pachadikana mali zizinji kuti basa yathu yolalikira ifambe, titsonkhesalini kobiri. Ninge mwayidanenera Nsanja ya Olonda, yomwe idafalisiwa kale-kale, ise tichakhulupirira kuti Yahova ndiye achatithandiza pa basa mweyi ndipo ‘tidzachichimizelini wanthu panango kuwakumbira mali kuti atsogolere basa mweyi.’ —Mateyu 10:8.

Basa yathu ichafamba na vopereka vaufulu. Wanthu azinji achalemekeza basa yathu yopfunzisa Baibolo ndipo achachita vopereka mwakuda kwawo kuti athandize. Mboni za Yahova zichapereka mokondwa nthawe yawo, mphanvu, mali na vinthu vinango kuti athandize kukwanirisa vomwe Mulungu achada padziko yose yapasi. (1 Mbiri 29:9) Aliyese achapereka mali mu bokosi mwakuda kwake mu Nyumba za Ufumu na mumisonkhano yathu ikulu-ikulu. Nivakukwanisika pomwe kuchita vopereka mwevi pakuphatisira basa webusaiti yathu ya jw.org. Kazinji-kazinji, mali zomwe zichatambiriwa zichachokera kwa wanthu womwe ni wosawuka, ninge mwevenzere na nkazi wamasiye yemwe Yesu adamutembeja ndawa yothusa tukobiri tuwiri mu bokosi yapakachisi. (Luka 21:1-4) Aliyese angakwanise kukhala na chizolowezi ‘chosunga kadiki-diki pasaidi’ kuti ‘apereke ninge mwawalinganizira m’moyo mwake.’ —1 Akorinto 16:2; 2 Akorinto 9:7.

Tinkutsimikizira kuti Yahova apitirize kulimbikisa womwe achada ‘kumulemekeza na vinthu vawo vakudikana’ kuti apitise patsogolo basa ya Ufumu kuti vomwe iye achada vikwanisike. —Miyambo 3:9.

• Ko gulu yathu ni yosiyana tani na matchetchi yanango?

• Ko vopereka vichaphata basa yanyi?