Padandosala padiki-diki kuti afe, Yesu adalewa kuti: ‘Ntontholo wabwino wa Ufumu udzalalikiriwe padziko yose yapasi komwe kuna wanthu, kuti ukhale umboni kwa wanthu wa khayindi yose, pamwapo mapeto yadzafike.’ (Mateyu 24:14) Ko basa mweyi yolalikira padziko yose ikadachitika tani? Mwa kutewedzera chitsanzo chomwe Yesu adasiya pewenze padziko yapasi. —Luka 8:1.

Tichayesesa kucheza na wanthu m’mamiyi mwawo. Yesu adapfunzisa opfunzira wake kuti ambalalikire ntontholo wabwino muyi na muyi. (Mateyu 10:11-13; Machitidwe 5:42; 20:20) Alaliki mwawa wa nthawe zakale-kale, angatambira gawo yawo kuti alalikire. (Mateyu 10:5, 6; 2 Akorinto 10:13) Mwakulingana na mwevi, basa yathu yakulalikira ntsiku zino ichaphatiwa mwadongosolo. Mpingu uliwose uchatambira gawo yake kuti umbalalikire. Mwevi vichachitisa kuti tikwanise lamulo ya Yesu ‘yolalikira na kuchitira umboni mwakukwana.’ —Machitidwe 10:42.

Isepano tichachita khama kuti tikalalikire wanthu kulikose komwe ankugumanika. Yesu adatipasa chitsanzo chabwino pankhani ya kulalikira m’malo yomwe yachagumanika wanthu azinji, ninge m’mbali mwa nyanja na m’michera yangatunga madzi wanthu. (Maliko 4:1; Yohane 4:5-15) Ninge mwangachitira Yesu, isembo tichacheza na wanthu va m’Baibolo kulikose kwatingawagumane ninge munsewu, m’malo yogulisira vinthu ndipo tingaphatise pomwe basa foni. Nthawe zose peno n’vokwanisika tichalalikira avizinyu wathu, anzathu wakubasa, wakushikola na azibale. Mamidyawu ya wanthu padziko yose angakwanise kubva ‘ntontholo wachipulumuso’ ndawa ya khama yathu. —Salimo 96:2.

Ko panamunthu yemwe mungamuwuzeko va ntontholo wabwino wa Ufumu wa Mulungu na kumufotokozera momwe vinkukhudzira tsogolo yake? Wawuzeni ayanu va chidikhiro chimwechi mwakanfulumize.

• Ko ni ‘ntontholo wabwino’ uponi womwe uchadikana kulalikiriwa?

• Ko Mboni za Yahova zinkutewedzera tani chitsanzo cha Yesu pakulalikira?