Nyumba ya Ufumu iliyose ya Mboni za Yahova ichaimira dzina yakuchena ya Mulungu. Ndipomwapa tichawona kuti ni mwayi wathu kukhuzisa malo yopempherera kuti yambawoneke bwino. Ndipo aliyese angakhuzisembo.

Mumbakukhuzise nawo pabodzi misonkhano ikapera. Yakandoti yapera misonkhano, mwakankulumize abale na alongo achaphata basa mwakubverana kuti akhuzise Nyumba ya Ufumu. Kabodzi pa sondo, pachaphatiwa basa yokhuzisa chilichose pa Nyumba ya Ufumu. Nkulu panango mtumiki wothandiza m’bodzi ndiye achanyang’anira basa mweyi. Mwakubverana na mwaviriri, aliyese angathandize pa kupsayira, kupukuta pasi, kukunkhumula pfumbi, kutsuka mipando, kutsuka kuchimbudzi, kuchenesa majanera, kutaya lisho kudindi, kutsuka kunja kwa Nyumba ya Ufumu, kusamalira mafololi na kapinga na kukwapa uswa. Vingakhale bwino maninge kusalula ntsiku yantero yokhuzisa. Dziwani kuti wana akambagumanika nthawe zose pa basa mweyi achapfuzira kulemekeza malo yopempherera. —Mlaliki 5:1.

Mumbagumanike akambakonza vodzongeka pa Nyumba ya Ufumu. Gole iliyose, abale achakhala pasi kuti awone vomwe vingakonzewe nkati na kunja kwa Nyumba ya Ufumu. Akandokambirana, ichayambika basa yakukonza vose vodzongeka kuti Nyumba ya Ufumu imbawoneke bwino. Vimwevi vichachitisa kuti asambacheneke mali zizinji. (2 Mbiri 24:13; 34:10) Nyumba ya Ufumu yokhuza ichakhala malo yabwino yopempherera Mulungu wathu. Kundogumanika pa basa yokhuzisa, tichawonesa kuti tichakonda Yahova na malo yake yomupempherera. (Salimo 122:1) Vimwevi vingachitise kuti olo wanthu wogwata ambailemekeze. —2 Akorinto 6:3.

• Ndawa chani tichadekanalini kunyalanyaza kukhuzisa malo yathu yopempherera?

• Ko pali makonzedwe yaponi kuti Nyumba ya Ufumu imbakhale yokhuza?