Peno kukhale nvula, dzuwa, panango tigumane na mabvuto yakulu pa moyo wathu, tilekalini kuyenda kumisonkhano. Podi tigumane na mabvuto ya khaindi na khaindi, panango kuneta na basa, tilovalini basi. Ko ndawa chani?

Vichatikomedza kukhalira pabodzi. Pakulewa va wale watichasonkhana nawo pabodzi mumpingu, Paulo adalewa kuti ‘timbaganizirane.’ (Aheberi 10:24) Mwevi vinkuthandawuza kuti tichadekana kuyesesa ‘kuwadziwa bwino’ abale wathu. Mawu mwaya yankutilimbikisa kuganizira anango. Tikadziwa mabanja yanango yachikhrisitu, tichazindikira kuti iwombo ankugwebana na mabvuto ninge yathu ndipo iwo angatithandize kupirira.

Vichachitisa kuti tikhale pa ushamwali wakulimba. Kumisonkhano yathu, sikuti tindosonkhana pabodzi ndawa yodziwana, koma ndawa yakuti ndise azishamwali wapamoyo. Nthawe zinango tichakhalira pabodzi kuti titandale na kusenzekera pabodzi. Ko macheza mwaya yachatiphindulisa tani? Tichapfunzira kulemekezana, ndipo mwevi vichalimbisa chikondi pakati pathu. Ndipomwapa tichathandiza mwakankulumize abale na alongo akagumana na mabvuto. (Miyambo 17:17) Tikambakhalira pabodzi na wanthu wa mumpingu mwathu, tichawonesa kuti ‘tinkuganizirana.’ —1 Akorinto 12:25, 26.

Tinkukulimbikisani kusalula azishamwali omwe achachita vomwe Mulungu achada. Imwepo mungagumane azishamwali ninge mwawa mugulu ya Mboni za Yahova. Ayi kubvuma kuti chilichose chikukangiseni kukhala mu gulu mweyi.

• Ndawa chani vichatikomedza kukhalira pabodzi kumisonkhano?

• Nilini pati mudzabwereko kumisonkhano yathu?